London club inhal tak pahnih Arsenal leh Tottenham Hotspurs te chu inkhelh laia auhla dukdak lo (abusive chant) dodal kawngah an thawkdun mek.

Football match en tinuamtu leh ‘boruak ti hot tu’ pakhat chu stadium chhûnga fans te hi an ni awm e. An pawlte an au phûr mai a ni lova, lehlam auh el pawh a thiang vek a, team tamtak chuan an hmelmate auhelna hla ‘bik’ an nei hial. Hetih lai hian,  stadium chhunga au hla mawilo uchuak hman hi club tam zawk chuan an phal lova, chung zingah chuan Tottenham Hotspurs hi a la ‘serious’ ber pawl an ni awm e.

October 2, 2011-a North London derby boruak ‘hot’ tak karah Arsenal leh Spurs fans zingah lehlam players leh manager te mawilo taka au an awm a, heng fans ‘uchuak’ bikte zawngchhuak turin London club pahnihten ngawrh takin an bei mek.

Engtinnge an auh nawmnah?

Opposition fans ten Arsenal manager Arsene Wenger an auh nawmnah dan hi chu ziahchhuah pawh a chakawm loh a, Arsenal nena inkungkaihna nei lemlo tân pawh ngaihthlak a nuam lo. Arsenal leh Manchester United inel vanglai pawhin Sir Alex Ferguson chuan ManUtd fans te a lo dem tawh ṭhin a, English football-a mi langsar tak takin Arsene-a thlavang an hauh ṭhin a ni.

Hemi chungchangah hian Tottenham Hotspurs pawhin an fans te hi an zilh ṭhin a, Arsene-a’n player naupang a duhsak ṭhin avanga an au nawmnah ṭhin chu ‘thil ṭul lo’ a nih thu an sawi fo. Tun thlengin an la sim lova, Pathianni zânah pawh fans ṭhenkhat chuan an la chhunzawm. Club hotute thin in a tuar ta lova, heng fans luhlul zualte hi an zawnchhuah hunah damchhung atân Tottenham inkhel en thei lo tura hrem an ni ang. (Stadium chhungah bik)

Adebayor leh Togo pawh an bâng lo

Nikum African Cup of Nations khelh hmaa Togo national team bus beih a nih thu kha kan la hre nual awm e. Khami ṭum khan staff pahnih in nunna an chân a, hliam tuar pawh an awm nual a nih kha. Kha bus chhûngah khan Spurs striker Adebayor pawh a awm ve a, hliam erawh a tuar lo thung.

Pathianni zânah Arsenal fans ṭhenkhatin he thilthleng hi Adebayor auh nawmnah nan an hmang a, footballer tamtakin an dem thu an sawi tawh. Heng fans te pawh hi zawn mek zel an ni a, hrem lohin an chhuah a rinawm loh.

Mi tlemte avangin club pumpui a hmingchhe thei a, fans ‘ṭhenkhat’ uchuak bik vangin sum tamtak chawi thei dinhmunah an ding ṭhin. Hemi tihreh tuma club pahnihte an inlungrual hi a lawmawm a, club dangte pawh an khauh zual phah ngei a rinawm.