Ningania I League round 5 khelh ah hmahruaitu Dempo SC an chak a, gameweek 5 a match ngaihven hlawh berah Mohun Bagan chuan an mikhual Churchill Brothers si thum faiin an hneh bawk. Mizo players te awm tamna Shillong Lajong FC erawh an chak zo lo thung.

Chirag United (Vineeth 62′) 1 – 2 Dempo SC (Martins Ranti 10′, 45′)

Dempo SC hian tun season I-League ah chak  loh an la nei lova, chak zawh loh takngial pawh an la nei lo. Ningani zânah Goa club ṭha hian Chirag United 2-1 a hnehin a zawnin vawi 5 an chak tawh. English Premier League-a hmahruaitu Manchester City nen an chetṭhat dan hi a tehkhin theih hial awm e.

He inkhelah hian minute 10 ah Dempo striker Martins Ranti Soleye chuan Clifford Miranda cross aṭangin a head goal. Chirag United players te an buai zui lova, an thawkrim em em a, first half-ah phei chuan an khel ṭha zawk a tih theih hial awm e.  Mahse player nei ṭha zawk Dempo in first half injury time-ah an pet goal leh a, a thuntu chu Ranti tho a ni.

Second half-ah pawh team pahnihten pet goal theihna chance an insiam leh nual mai. Minute 62 ah Vineeth chuan Kerela club tân hian a pet goal a, hei hi tun season-a Dempo in I League goal an chhuah hmasa ber a ni nghe nghe. ‘Chance ṭha’ ngah zawk Chirag United striker te vanneih ni a ni ngang lo a, huntawp thlengin goal dang a luhbelh lo.

Dempo hian game 5 ah point 15 hmu tawhin goal 15 an thun tawh a, goal 1 chiah an la chhuah. Indian player ṭha ho Debabrata Roy, Climax Lawrence, Clifford Miranda, Anthony Perreira leh Mahesh Gawli te ho an nei a, Nigerian striker pahnih Koko Sakibo leh Martins Ranti an awn bawk. 2007-08 leh 2009-10 champions te hian tun season-ah lungthu an kim thei angem? An player te enin an theih lohna tur chu awm lo mahse season tâwp erawh a la hla deuh si.

Mohun Bagan (Sunil Chhetri 28′, Asim Biswas 45′, Jewel Raja 95′) 3 – 0 Churchill Brothers

Gameweek 5 a match en chakawm leh nghahhlelhawm ber hi rin aiin an inhnehtawk lem lo. First half-ah mual neitu lam an khel ṭha a, Arrows-a Jeje-a te nena awmho ṭhin Mohun Bagan midfielder Jewel Raja a langsar hle. Minute 28 ah Indian striker Sunil Chhetri chuan penalty box pawn aṭangin a shot a, hei hi Churchill Brothers defender in lo dangpialin Bagan in 1-0 in hma an hruai. Bagan hian inkhel an thunun chhunzawm a, mahse Churchill Brothers tlarhnung an khawng ve tlat a, goal an thun thei mai bik lo. Mahse minute 45 ah Asim Biswas chuan amah aia sâng fe zuankhumin a head goal a, first half a tâwp zui.

Football-ah hi chuan minute 90 chhungin game a inthlak danglam zung zung thei hi a tihmuhnawmtu a ni awm e. First half-a khel ṭha em em Mohun Bagan hian second half-ah goal an chhuah thei teuh khawp mai a, substitute Jerry Zirsanga pawh kan hmu hnem khawp mai. Jerry hian minute 72 ah goal thun theihna chance a neih chu a head out hlauh a ni.

Huntawp lamah chuan Churchill inkhel hlir kan hmu ti ila kan uar lutuk awm lo e. Mahse Indian club dang te ang bawkin goal thun an harsat a, Bagan keeper chetchhiat ni a ni chungin Churchill hmatâwngten an pet goal ‘teuh’ ral a ni ber. Bagan goal 3 na hi minute 95 ah counter attack aṭanga Jewel Raja thun a ni.Bagan hian game 5 ah point 12 hmu tawhin 2 na an ni zel a, Churchill hian point 10 hmuin 4 na an ni.

Shillong Lajong FC 0 – 0 Air India

Shillong Lajong FC chuan Khuman Lampak Stadium-ah an mikhual Air India an hneh zo lova, inkhel thunun tak chungin point 1 chiah an hmu. Lajong hian chance an ngah khawp mai a, an vanduai ve hrim hrim chu thudang ni se, Air India keeper Pawan Kumar a chetṭhat ni ang nangfuh a, goal an thun thei lo. Lajong defender Aibor Khongjee chuan huntâwp dawnah penalty a pet goal lo bawk.

He inkhelah hian Thuammawia, Chhuanmawia leh Ramluaha te a tir aṭangin an lût a, Mahlima pawh bench aṭangin a tlanlut ve bawk.

Inkhel result dang

Champion lai Salgaocar pawh an chak ve ta a, 1-0 in Mumbai FC an hneh.

Salgaocar (Anthony Barbosa 10′) 1 – 0 Mumbai FC

HAL Bangalore 0 – 2 Prayag United (Kayne Vincent 10′, 84′)