FIFA World Cup a ni emaw, Euro a ni emaw, eng inelna pawh ni se, player langsar khel lo tur an awm hian a uiawm a, an ram pawhin a tuar thin. Anmahni player te tana a hreawm dan tur chu sawi ngai lo ah dah i la, fans te tan tak pawh hian a runthlak em em a ni.
Tun tumah chuan inhliam vang emaw, an ram an inpetkai zawh loh vang leh chhan dang avanga Euro 2020 – a kan hmuh loh tur player langsar zual kan tarlang dawn a ni.
Erling Haaland (Norway)
Kum 20 chauh a upa ni mahse football khawvela striker langsar ber pawl a ni der tawh. Tun season liam ta khan Borussia Dortmund tan inelna hrang hrangah game 41 khelin goal 41 a thun ! Football level sanna Champions League top scorer a ni a, Euro – a kan hmu lo tur hi a uiawm hle. Norway hi an tling thelh a, play-off ah an vanduai ta a ni. Ram tan game 11 khelin goal 7 a thun tawh.
Virgil van Dijk (Netherlands)
Euro 2016 leh 2018 World Cup an khelh phak loh hnuin Netherlands in Euro 2020 an khel dawn a, mahse an captain Virgil van Dijk a inlan thei dawn lo. Liverpool defender hi khawvela defender tha ber pawl a ngaih a ni a, mahse nikum October thlaa a khup a tihnat atangin dam lam pan mahse Euro khel turin a ‘fit’ hman ta lo a ni ber e.
Dominik Szoboszlai (Hungary)
Mizo te’n kan la hriat lar lutuk loh Szoboszlai hi kum 20 chauh a upa a ni a, Euro 2020 an khelh theih nan hian play-off – ah hun tawp dawnah goal thunin an ram hi Euro khel turin a hlang kai a ni. Kumin January thla khan Hungarian footballer man to ber ni turin euro maktaduai 20 in Bundesliga club RB Leipzig a zawm a, a club thar tan pawh a la inlan hma hauhin hliamin a tlak buak a, Euro thlengin a khel thei dawn ta lo a ni.
Jan Oblak (Slovenia)
Slovenia captain hi kum 28 a upa a ni a, La Liga – a Atletico Madrid champion puitu a ni. Khawvela goalkeeper tha an sawi apianga sawi hmaih ngai loh, La Liga Best Goalkeeper lawmman vawi 4 dawng tawh a ni. A vanglai tak a ram leh ram inelna major tournament a khel pha lo tur hi a ui khawp ang.
Miralem Pjanic (Bosnia)
Juventus tana a khelh laia Serie A Team of the Year – a vawi 4 lang pha Pjanic hian Bosnia tan vawi 100 a khel tawh a, tun Euro – ah erawh a inpetkai pui zo ta lo. Barcelona tan a khel mek, Serie A club thenkhat leh Chelsea nen a sawi zawm mek Pjanic hi kan hmuh loh tur zing a uiawm ber pawl a tling.
Zlatan Ibrahimovic (Sweden)
Zlatan hi kum 39 – a upa ni tawh mahse season liam ta khan Milan tan Serie A – ah game 19 khelin goal 15 a la thun thei a, mi bik a nihzia a lang. Sweden tan 118 khel a goal 62 thun tawh hi khup hliam vangin a inlan thei dawn lo a, ani ang player tawnhriat ngah hi stage sangah chuan Sweden hian an mamawh khawpin a rinawm. Euro 2004 – a Italy laka a ‘back-heel lob’ kha goal of the tournament atan thlan a ni a, tun tumah erawh khatiang goal danglam bik kha kan hmu dawn ta lo.
Martin Odegaard (Norway)
Kum 16 a mi lek a nih laia khawvela rawlthar lar ber ni tawh Odegaard hian an ram tan vawi 29 a khel tawhin Norway captain a ni mek. Real Madrid player niin tun season chawhnu lam khan ‘loan’ in Arsenal tan a khel a, a khel chhe hran lo. Norway hian 1998 World Cup khan round of 16 lutin Euro 2000 khan group stage an khel bawk a, hemi hnu hian major tournament – an khel leh tawh lo. Odegaard hian football khawvelah a hming a chher lehzual tur chuan Norway hi a chet thatpui a ngai ang.
Dusan Vlahovic (Serbia)
Kum 21 lek a upa striker hian tun season liam ta khan Fiorentina tan Serie A – ah game 37 khelin goal 21 a thun ! Vlahovic hian ram tan vawi 7 chauh la khel mahse tun Euro – ah hian a inlan a nih ngat chuan a hlutna hi a sang lehzual tur a ngaih a ni a, mahse an ram an tling miau si lo. Europe – a rawlthar tha zual te hnena pek thin Golden Boy – a nominee ni pha a ni a, season tharah hian Liverpool kawr a ha a nih pawhin a mak lo ang.
Marc-André ter Stegen (Germany)
Barcelona goalkeeper hi thenkhat chuan goalkeeper vanduai ber pawl ti te pawhin an sawi thin. Khawvela goalkeeper tha ber pawl ni mahse Manuer Neuer a awm miau avangin ram tan a inlan tam hleithei lo a, kum 29 a upa hi Germany tan vawi 25 a inlan tawh. Nikum hmasa khan Neuer nen hian no.1 nih chungchangah an lo in bakkaih deuh tawh a, tun tumah hian a hliam enkawl a duh zawk avangin Germany tan a inlan dawn lo a ni.
Sergio Ramos (Spain)
Kum 35 a upa Real Madrid captain hian ram tan vawi 180 a khel tawh a, Spain tan a inlan hnem ber a ni. Defender ni chungin goal 23 a thun a, ram tana goal thun hnem lamah 8-na a ni phak ! Euro 2008, Euro 2012 leh 2010 World Cup an chawi theih nan player pawimawh a ni pha vek a, tun season – ah erawh a kum a lo tam ve ta deuh nen, hliamin a ti buai hrep a, Spain tan Euro khel turin koh a ni ve ta lo.
