India in final lut!

#ZoFootyIndia in final lut!
Zanin dar 9.30-a khelh SAFF Championship league match hnuhnung berah India chuan 3-1 in a thlengtu leh champion lai Maldives an hneh a, final an lut.

India tan Manvir Singh chuan goal khat khungin Sunil Chhetri-a’n goal hnih a khung a, Maldives goal awmchhun hi penalty ațanga Ali Ashfaq khung a ni thung.


India leh Nepal in October ni 16 (Pathianni) zan dar 8.30 ah final an khel ang.


Tute nge khel?

India coach Igor Štimac chuan an match hnuhnung bera Nepal an hneh țuma Starting XI ngai bawk a hmang leh a, Mizo awmchhun Lalengmawia (Apuia) chuan inkhel bul a țan leh a ni.


India hian center back mumal hmang lo bawkin an khel leh a, Sandesh Jhingan inhliam laiin India defending-in beisei a pha lo tluang zel.
First half-ah goal khat ve veIndia in final lut turin chak an mamawh a, Maldives tan erawh draw a tawk thung.


Chak mamawh India in atir ațangin an nawr nghal a, game tempo thlakin high pressing game an khel a. Maldives erawh a thlengtu annih avangin home advantage an nei țha a, stadium khatin țantu an nei a, draw in final an lut thei tih an inhriat avangin an nawr ve duh lova, fimkhur taka khelin counter attack ah an in nghat a, chance țha an insiam teuh thei hle.

Minute 25 naah Sunil Chhetri-a’n Brandon Fernandes free kick ațangin goal a tauh goal teuh hle a, woodwork a tauh per. Mahse India an vanduai rei lova, minute 33 naah Chhetri hian striker pa sang Manvir Singh tan ball țha tak pein Manvir hian mawi takin a kil sirah a pet lut.


India an phur a, Apuia hovn midfield ah ro an rel chhunzawm bawk. India Coach Štimac chuan defender pahnih Rahul Bheke leh Mandar Rao Dessai ten yellow card an hmuh tawh avangin fimkhur angai tih a hria a, left back Mandar Dessai lachhuakin centre back Chinglensana Singh a dah lut a, Subhashish Bose chu a position diktak left back ah a awm tir a ni.


Mahse minute 43 naah India right back Pritam Kotal chuan Maldives player Hamza chu 18 yard box chhungah titlu in Maldives in penalty an hmu a, Ali Ashfaq chuan Gurpreet Singh bumin Maldives siphurh a sut a, 1-1 in a first half a tawp.

India chakna Chhetri leh bawk!

India in goal an khung hi chuan Chhetri-a hming a ni tlangpui antih țhin angin India goal hnihna pawh Chhetri khung niin minute 62 naah India hma a hruai pui. Hemi hnu lawk hian Ali Ashfaq chuan freekick ațangin Maldives ațangin a sut teuh hle a mahse Gurpreet-a’n a nam chhuak hman hram.

Dinhmun hima India an din theih nan Chhetri bawk a inlar leh a, minute 71 naah a hmingchhiatna hliahkhuh turin Pritam Kotal chuan freekick atangin Chhetri a siamsak a, Chhetri hian kil sir takah a tauh goal a, mual neitu leh a thlengtu Maldives thawm a reh chiang hle.

Chhetri hian ram tan goal 79 a khungna chiah a ni a, khawvela ram tana goal khung tam parukna niin goal 80 khung tawhtu Lionel Messi hnuai chiahah a awm.

Apuia che vel a hmuhnawm a, ball a dang chat hnemin a țangkai hle. Hetiang zela a khelh chhoh chuan a start ziah a beiseiawm. Injury time-ah Subhashish Bose chuan double yellow card hmuin hnawh chhuah a ni a, final a khel thei lovang.

India tan final duhthusam a ni em?

India hian final ah 1-0 a an hneh tawh Nepal an tum dawn a, champion tura ngai an tam hle. Nimahsela game ah chuan engmah a sawi lawk theih loh an tih fo angin SAFF Championship hnuhnung berah khan India in group stage-a 2-0 a an hneh tawh Maldives chu final ah 1-2 in an hneh lo. Chuvangin India hi vanduai leh thei an ni.