Euro 2012 kan hnaihin a boruakin min chiah hneh bawk a, Euro 2012 kan thlir thup niin a lang. Tun laiin Euro 2012 inbuatsaih nan Europe ram hrang hrang ten Friendly Match, Euro 2012 inbuatsaihna atan ni nghal thei turin an khel reng a, thawm pawh an nei lian thei khawp mai, chutih rualin Transfer thuthang tam tak hriat tur engemaw a rawn tel ve leh zeuh bawk nen, tunlai chu a bik takin European football-in min chiah hneh hle niin alang tlat mai. European football lam thlir a kan mit leh beng kan len reng laiin tunkar tawp lam chu South American lamin World Cup 2014 atana khel thei tur zawnna, Qualifying round an khel ve bawk a, nizan khan South American lamah 2014 World Cup Qualifying Round  khelh a ni a, Diego Forlan Corazo leh Diego Godin Leal(OG) te goal thun hmangin Uruguay leh Venezuela te sikhat ve ve inpe in antin a, Chile-in an khingpui Bolivia chu sihnih faiin an hneh bawk a, Argentina pawhin Ecuador chu si li fai a anlo hneh a, hma hruaitu an ni nghal bawk. Club tana tangkai, goal thun thei em em, ram tana goal thun harsat tlat, ram tana a goal thun theih loh avanga mi tam takin an sawisel Lionel Messi pawh ram tan a ke chheh a dik chho telh telh a, mi tam tak sawiselna chhanglet turin Argentina tan goal a thun chho ve zel a, Ecuador nen an inkhelh tum pawhin goal khat a thun ve nghe nghe a ni. Chuvangin tun tum chu Lionel Messi leh a pawlte lam inhawi ve lawk teh ang.

First half-ah Goal 3
South American palian(?)te inkhelah hian atir atangin Argentina hian  game an thunun nghal a, hun tan atanga reilo teah World Players of The Year chawimawina dawngtu, Lionel Messi chuan goal thun theihna rem chang a nei a, Manchester City striker Kun Aquero ball pek tha zet chu goal-ah mawi zetin a volley phei a,  mah se Ecuador goal keeper Alexander Doninguez chuan a lo dang hlauh. Argentina lamin Messi hoa goal thun tuma Ecuador an awr reng laiin defender Pablo Zabaleta tihsual zarah Ecuador lam hian hma anhruai hman tep a, Zabaleta pass chhe zet mai chu Ecuador Christian Suarez chuan lain goal lamah a tlan luhpui nghal a, goal-ah a thun ngei dawn emaw tih laiin mual neitu lam tan vanneih thlak takin Sergio Romero chuan alo dan sak ve hlauh a, goal awmloin an la inkhel. Amaherawhchu Ecuador lam hian goal chance anneih hnu lawk leh an phur dawn chauh emaw an intih laiin Argentina lamin nawr pheiin goal an thun, Real Madrid Star Angel Di Maria ball fing tak chuan offside postition a awm emaw tih mai tur, Sergio  Aguero chu tawng fuhin a ni hian Argentina tan an hmahruaina goal ni tur leh a Birthday tum 24-na lawm nan minute 30 naah goal-ah athun ta nghe nghe a ni. Argentina goal khatna luh dan hi Ecuador fans tam takin an pawmin a rinawm loh a, a chhanchu Aquero kha offside postion-ah a awm ngei niin an ngai a, mahse assistant referee-in a hmulo leh flag adah thla tlat kha Ecuador fans te tan chuan a lungawi thlak loh viauin a rinawm loh.

Real Madrid hmatawng Gonzalo Higuanin pawhin goal thun theihna hun tha a bawhpelh siam that nan minutes 29 naah Lionel Messi hnen atanga a ball hmuh goal-ah a chan tir ve bawk a, minutes 30 chhunga Argentina lamin goal hnih an thun hman avangin Ecuador lam pawh insiam that an tum viau, amaherawhchu rei an insiam tha hman lo, minutes 31 naah Argentina tan bawk ram tan a goal thun theilo ti a ansawisel reng Lionel Messi chuan Barcelona lama atih thin dan ang takin cool zetin an goal thum na a rawn thun ve leh, first half tawp hmain Argentina-in sithum faiin hma anhruai a, Ecuador lam erawh an hawihil khawp mai. Messia’n goal a thun hnu hian goal dang inpe loin first half a tawp zui..

Second half-ah Goal 1 dang
Second half an tan, first half ang thoin Argentina lamin game an thunun leh, Ecuador lam hian chawlhlawk chhungin game tha tak an ngaihtuah chhuak hman lote pawh a niang, chawlhlawk tan atanga minutes 5 na lekah Argentina lam hian Penalty an hlawhchhuak ngei dawn emaw an inti hman, Higuain leh Messi ten nalh zet a ball inpe kualin chuta tanga ball rawn chhuak chu Aqueroa’n lain a tlan luhpui a, Ecuador keeper Dominqueza’n alo ti thlu, hei hi Argentina lamin Penalty turah an ngai, amaherawhchu Aquero tluk dan hian referee Victor Rivera erawh Penalty pe tur em chuan a hmin zo bik lo, a kum 24 na lawm mektu Aquero chu tlu derah ngaiin Yellow card ape zawk hlauh.

Hemi hnu hian Ecuador lam an rawn harh thar emaw tih mai turin an game a tha chho tan, mualneitu lam an nawr chhunzawm ve zel, Ecuador wingers pahnih Jefferson Montero leh Antonio Valencia te an hlauhawmin anni pahnih hian a sir lam atang Argentina tlar hnung an ti mangang zeuh zeuh a, hetih lai hian Lionel Messia’n mikhual lam a ti mangang lehpek hle, rang taka a ball tlanluhpui chu gaol-ah a chantir teuh hle a, vanduai thlak takin Domingueza’n alo dan sak leh hlauh mai, hemi hnu hian corner atanga ball lo chhuak, Federic Fernandez-a head tha zet pawh he Ecuador singhak hian tha zetin alo dan sang leh bawk a ni. Amaherawhchu Argentina goal shot zawng zawng adang thei bik lo a, minutes 75 naah khel tha tak Angel Di Maria chuan an goal li na a rawn thun ve leh a, Ecuador tan chak tur a beisei ngam chi a ni tawh lo a, Argentina tan erawh hmahruaina hun tha anneih phahna  a ni thung a, tihian Argentina hian game 5 khelh tawhah point 10 hmuin hma anla hruai a, an hnuai chiahah point 9 neiin Chile-in an dawt a ni.

Hun ala tam..
Kum 2014-ah Brazil ramah World Cup khelh a ni dawn tih kan hre theuh awm e, hemi atan hian ram tam tak an inbuatsaih mek a, South American lam bik atang hian a thlengtu Brazil chu World Cup khel thei tur chiang sa an ni a, heng football thiam ram an tih thah, Argentina, Bolivia, Uruguay, Paraguay, Chile etc. te hian 2014 World Cup hi khelh ngei tumin an inum mek zel a, tunah hian game 5 chiah khelh a la ni a, Lionel Messi leh a pawlten hma anla hruai, mahse hun ala tam(qualifying round khelh tur a la tam) bawk a, tunge heng Football thiam ram kan tih te hian 2014 World Cup hi khel ang a, khel lo ang tih ala sawi theih reng reng loh. Qualifying round hi nikum 2011 October ni 7 atang khan khelh tan a ni tawh a, kum 2013 October ni 15 thleng khelh a la ni dawn. He mi hma chuan chumi te chuan ankhel ang tih sawi dik a har khawp awm e. Tun a an players tha tam tak hi International duty thenkhat emaw Club tana an khelh avangin inhliam leh chhan hrang hrang avangin Qualifying round khelh leh hunah an khel lo thut thei, chuvangin tuna an dinhmun hi a letling thlawk thei a ni tih kan hriat reng a tha awm e.

Tuna an dinhmun(Table) hi dah ve reng reng teh ang :

Team      Pld    W    D    L    GD    Pts

Argentina 5    3    1    1    +7    10
Chile       5    3    0    2    -1    9
Uruguay   4    2    2    0    +6     8
Venezuela 5    2    2    1    0    8
Ecuador   4    2    0    2    -1    6
Colombia  3    1    1    1    0    4
Paraguay  4    1    1    2    -3    4
Peru      3    1    0    2    2    3
Bolivia   5    0    1    4    -6    1