Vawiin ni 28 Nov 2011 a Royal Gold Cup vawi-20-na Semi Final hmasa zawkah Aizawl FC, Mizoram chuan Life Sports FC, Nagaland chu 5-0 a hnehin Final an in pet thleng ta. Naktuk ni 29 Nov hian Mizoram Youth Team leh Peren District FA ten Semi Final thawhhnihna an khel leh ang.

Aizawl FC hian 4-4-1-1 in an khel a, Danny Lalrohlua (keeper), Defenders: H.Lalnunzira (CW), Abraham Lalrinngheta (Durtlang), Lalnunfela (Zemabawk N) leh Lallawmzuala (Chaltlang), Midfielders: David R.Lalrinmuana (Capt., Zemabawk N), Zothansanga (Kulikawn), Albert Zohmingmawia (Kawnpui), Lalnuntluanga (Bawngkawn), Strikers: Lalthanpuia (Bethlem Vengthlang), B.Malsawmzuala (Luangmual).

Vawiin inkhel-ah hian a tirtea vawihnih khat an rawn nawr deuh tih loh chu Life Sports FC te hian goal hlauhawm an nei meuh lo a tih theih a. Minute 90 chhung kha Aizawl FC te ta a ni deuh ber mai. Second Half-a clear chance te kha thun vek phei sela Goal 10 dawn an thun awm e.

Tan phat atangin Aizawl FC te hian an nawr nghal char char a, an thawhrimna rah chu Minute 15-ah a lang ta a ni. Striker Papuia’n ball a chang a veilamah a tlan tlang pui a Goal post chhak lam angle zim lutuk atangin thlang lam goal post bulah a pet kual lut a, a kil setah a lut. A pet goal dan kha a class a sang kher mai. Aizawl FC lamin tha an thlah lo an nawr zui char char a, thlang lam atangin Albert an cross hlauhawm tak tak a siam reng bawk. Minute 21 a ni a. D line dinglam sir-ah ball an inpe kual a, Ball hlauhawm ni pawh a lang lo, Albert-a ball rawn pek chu B.Malsawmzuala (sawmtea) chuan rang taka inher kualin goal lamah a pet zui nghal a, goal veilam kilah kawh zetin a lut chho a, a goal leh ta. Keeper pawh a che hman lo a ni ber e. Aizawl FC lamin an la duh tawk lo cheu, Sawmtean a pet goal atanga minute 2 lek minute-23-na-ah Lalthanpuia (Papuia) bawkin a pet goal leh a. Aizawl FC lamin an la duh tawk lo cheu, an nawr zui reng a, a khat tawkin lehlam defenders an thiat reng a ni ringawt mai. Minute 43 a ni a, First half a zo tep, Center bul lawk atanga ball an in pek phei chu Zothansanga (Zova) chuan goal lamah kawh tawkin a pet phei a, keeper vei lam sir-ah keeper man phak loh tawk chiahin a kual lut leh ta. Aizawl FC ten 4-0 in hma an hruai a, First Half a tawp zui a ni nghal e.

Second Half tan a ni a. Aizawl FC lam chuan first half ai mahin ball an chang tam leh zual a. Tan phat atangin an nawr char char a ni ber mai. Davida leh Zovan Midfield-ah ro an rel bawk a. Lehlam tan hmunawl an zuah meuh lo, Second Half tan atanga Minute 5 lekah 50 Minutes-ah Goal mouth zawn D line bul lawkah David-a chu chiang lutuka thai thluk a ni a, Aizawl FC lamin free kick an hmu e. An thai thluk ngei Capt. David-a chu rawn pen chhuakin Lehlam wall zawn-ah cool taka pet-in goal post chung lam perin a goal chhung-ah a lut thla a, keeper pawh a che hman aih lo a ni ber e. Aizawl FC lamin 5-0 in hma an hruai ta der mai. Aizawl FC lamin Substitute an siam zui a, Papuia la chhuakin Michael Lalremruata a lut a, a hnu lawkah, TLuanga aiah Zuala a lut a, subsitute tawp berah David-a chhuakin a aiah Zion Lalramluaha a lut leh bawk. Aizawl FC lam hian vawi tam tak clear chance an nei leh a, Albert an vawi-2 missed in Michael-an vawi 3 ngawt clear chance a hloh bawk a. Tin, Zirtea pet goal pawh an pawm sak lo bawk. Engpawhnise a pumpui khai khawmin vawiin khan Aizawl FC te khan an khel tha thlawt a. Defence lamah a laia ding Abrahama leh Fela te khan an dang chat hneh hle a, ding leh veia awm Lawma leh Zirtea te pawhin an chan an hneh dun hle bawk.

A tawp berah chuan Manager Hmingthana leh Coach Chawnga te inpekna leh an naute kilkawina rah a ni a tih theih bawk awm e. Player-te discipline a tha hle bawk tih hi ka’n zep tel leh hram a nge.

Thlalak dang en duh tan HETAH hian a en theih a ni.