Kum 2008 khan American Samoa a pa pakhat, a hming Salapu chuan Play Station ah American Samoa hmangin Australia chu goal 50 chuangin a sawp nitin mai a, a chang leh amah zawkin Australia Football team hi hmangin a fapa kum 7 mi Dylan a insawp tir hrep zel.
South Pacific Ocean a thliar kar te tak mai, US in an awp thin American Samoa hi mihring 55,000 vel bawr lek chenna ram a ni a. Kum 20 dawn chu he team hian chak ni hmel an hmu miah lo. Match 30 tlawmin heng match ah te hian goal 2 chu an khung ve a, goal 229 lawih an chhuah thung. Chung zing a langsar ta ber mai chu kum 2001 a Australia in 31-0 tehmeuh a an sawp kha a ni awm e. He result hi international match a insawpna nasa ber a ni a, hetih hunlai hian FIFA ranking ah American Samoa hi a mawngphah ah an awm a ni.
American Samoa FA chief Tony Langkilde chuan an team dinhmun sawiin: “Football hi thil pathum tih theihna game a ni a. Chak, inhnehtawk leh chak lo. Kan tan erawh zawng chak loh bak tih theih kan nei si lo. A dang pahnih hi chu kan nei ve thei rih lo.” tiin a sawi.
He thil thlen aṭanga kum 10 hnuah Oceania’s World Cup qualifying 2011 khelin 1st round ah Tonga chu 2-1 in an hneh hlawl mai. He result hi kum 17 chhung a official international match a vawikhat an chak ve na a ni. Inkhelh zawhin an lawm lutuk chu ding chungin ban an phar a, ṭhenkhat an ṭhingṭhi a, a ṭhen an bawk khup nghal, lawm avangin mittui tla pur chungin Pathian hnenah lawmthu sawiin an ṭawngtai. Football khawvelin fiamthu thawhnan a an hman ṭhin team kha chawimawiin an awm.
He inelna ah hian Cook Islands nen 1-1 in an inhnehtawk zui a, an match hnuhnung ber ah 1-0 in he inelna thlengtqu Samoa lakah an vanduai.
Kum 2015 October thla khan American Samoa hian FIFA World Rankings a an tawn sang ber tawngin 164na dinhmun an luah a ni. An vawi khat chak ve na chungchang hi Coach Thomas Rongen sawiin, “He hlawhtlinna hi Football history zinga pakhat a ni tawh ang. Thil danglam ti thei dinhmun ah kan ding a, he hlawhtlinna hi hlim takin I lawm teh ang” a ti.
He team danglam em em na chu Oceania’s World Cup qualifying a an player che tha em em, centre-back Johnny Saelua(Jaiyah tia an koh) hi khawvel a transgender international footballer hmasaber a ni hem mai. Jaiyah hian Tonga nen an inkhelh tumin hun tawp hma hret a Tonga siphur sutna goal ni mai tur chu goal line atangin a lo pet chhuak hman hlauh a, a vawi khatnan an chak phah. Coach Rongen-a’n khel tha a tih em avangin Women of the Match tiin a fak zui nghe nghe.
An defender Rawlston hi USA a piang leh seilian a ni thung a, a pi leh pu te hi he thliarkar a cheng an ni a. Oceania’s World Cup qualifying ah amah thlahtu te ram American Samoa tanpui turin a vawi khatnan he thliarkar ah hian a zin vang vang.
Ramin Ott ve thung hian kum 2008 khan US Military zawmin he thliarkar hi a chhuahsan a, Coach Rongen nen an inbiak hnuin a Leave neih ang chhun chhun te hmangin he inelna hi a khel a ni.
An goalkeeper Salapu hi Samoa ram a sei lian a ni a, American Samoa atanga mel 100 vel a hla a ni. Naupanlai atanga Football khel thin niin kelawngin a thiante nen rugby field ah an khel ve nasa thin hle. Tum khat chu an khaw team hian goal keeper tur an zawng a, rugby pheikhawk nen Salapu hi a inlan a ni.
Kum 2001 khan World Cup qualifying khel turin American Samoa team select an ni a, tha pawh an inti thawkhat ve hle. Mahse passport rule strict tak a kalpui a nih avangin khua leh tui ni lo khel thei lo an awm ta fur mai. Chawpchilh takin rawl thar rual, junior high leh high school players ten hmunruak hi an hnawhkhat a, an lamah goal sur buan buanin match 4 ah goal 57 lawih an chhuah.
He thil thleng chungchang hi Salapu hian sawiin, “A mak khawp mai. Keimah chauh experienced player ka awm a, goal lut a muan chan theihnan theihtawp chu ka chhuah ve. He thil hi a thleng dawn tih chu ka hre sa a, mahse ka ram hi hnual taka awm tir hi ka duh ngai lo.” A ti a. “Inkhelh zawhin locker room ah kan lut a, hnuai lam bih ngar ngarin ka mittui te a tla hial. Hrilhhai takin ka awm a, inkhelh bansan hmak kha ka duh rum rum.” tiin a lungchhiat thu a sawi.
Salapu hian an chak lohna avanga miten nuihza siamnan an hmang thin chu a la na hle a, kum thum chhung chu nitin mai PlayStation ah rematch khelin American Samoa hi goal 50 chuang ten a chak pui ṭhin.(FIFA Games ah American Samoa hi an awm lo a, a siam chawp pawh ni mahna 
)
Australia an hneh lo tuma American Samoa coach Tunoa Lui pawhin a hunlai a thil thlen dan sawiin, “Inzir turin he hmunah hian kan awm a. Harsatna tam tak kan tawk a, mahse kan beidawng ngai lo. Pathian hnenah goal a luh tlem theihnan kan dil nasa hle”tiin an dinhmun khirhkhan zia a sawi.
American Samoa hian hmasawnna beiseiin US Soccer Federation hnenah tanpuina an dil a. An team danglamna thlentu Dutch Coach Rongen chuan kum 2011 khan he team enkawl turin he thliarkar hi pan a ni. Rongen hi he team coach hna diltu awm chhun a ni nghe nghe.
He thliarkar a cheng te hi sakhaw mi tak mai an ni hlawm a, nikhatah vawi thum tal tawngtainan hun an hmang thin. Coach Thomas Rongen erawh a team thar te ang lo tak hian Atheist a ni a. A huntir lamah chuan American Samoa culture chu danglam tak a nih avangin Training pawh a beisei angin an kalpui hlei thei lo.
Hetih hunlai hian an keeper Salapu hi a retire tawh a, Coach Rogen hian be pawpin inkhel turin an ko kirleh.Tonga lakah an chak avangin Salapu hi a hlim hle a, “Tunah zawng hlim leh thlamuang takin ka chawl thei tawh ang” tiin a sawi hial. Australia lak a goal 31 chhuahtu Nicky Salapu chuan hming tha takin inkhelh a chawlhsan thei ta a. Team danglamna thlentu pawimawh tak Atheist coach Thomas Rongen pawh a fanu a chan hnuah a piang thar niin sawi a ni.
U.S. under-20 team coach pawh lo ni tawh Thomas Rongen chuan FIFA world ranking a mawngphah team a chakpui dan chunchang hi sawiin, “Tonga nena kan inkhelh tan hma khan an mitah ka en a, inrintawkna an nei tih ka hmu. Inkhelh apianga digit 2 a chak lo reng mai team an ni a. Tonga lakah khan result danglam a thleng dawn tlat a hriatna kan nei a ni” a ti.
“Ka hna hi American Samoa nen hian thawh zawh ka duh. Ram tenau deu ah head coach atan ka inhnamhnawih theihna tur a awm em tih ka thli thlai thin a. A chhan chu zinkawng danglam tak a ni a, tha zawk nih duhna min pe a, a manhla thin hle.” Tiin a sawi.
Kum 1998 World Cup a US assistant coach Rongen hian a team American Samoe chu Football mawina temtir a hriatchhuah tir thin tu an nih thu a sawi a. Netherland ah an naupanlai a chak tum ngawr ngawr lo a, an nuam tihna avanga an inkhelh hunlai ang mai a nih thu a sawi. “Heng mite hian an hmangaihna avangin he game hi an khel a ni. Engmah hlawh pawh an nei hek lo. An mak danglam hle.” tiin a sawi.
