WEST BROM HNEHTU CHELSEA A CHUNG BERAH

Chelsea 1-0 West Brom FT
Chel: Costa 76′

Chelsea chuan an mikhual West Brom lakah game ropui khel lo mahse a hun takah Diego Costa inlarin goal awm chhun a thun.

Game tang et awt a ni lo va, point khat hlawhchhuah tum ruahmanna fum fe tak nei West Brom in team lian zawk lakah an goal an ven uluk avanin Chelsea in an beisei angin an nawr thei bik lo va, goal an thun thlengin goal zawnah vawi 2 chiah an pet thei.
.
Inkhel pumpuia goal zawna vawikhat chiah goal zawna pet thei West Brom defender McAuley inthlahdah lai nangchingin Costa chuan a ke veilamin Ben Foster-a man hman lohin a thun a, hei hi goal awm chhun a ni ta.

The Blues tan hian David Luiz chuan free-kick atangin a thun teuh hle a, the Baggies tana Chris Brunt leh Salomon Randon te thunloh chu a uiawm bawk.

Chelsea hian goal zawna an vawi 2 petnaah goal an thun a, goal thuntu Costa hian Premier League-ah goal 12 thunin goal thun tam ber a ni mek. Chelsea tan Premier League game 69 atangin goal 44 a thun ta.

Chelsea hian point 37 hmuin table chung ber an luah a, an hnuai chiaha awm Arsenal aiin point 3 in an sang zawk.