A SEN PAHNIH INKHEL TUR A HMUHNAWM DAWN

Naktuk chawhnu dar hnih hian Rajiv Gandhi Stadium – ah Aizawl FC in I-League inkhel pawimawhah Kingfisher East Bengal an mikhual dawn a, TEN2 ah ‘live‘ a ni ang. Mualpuia inkhel en duhte tan ticket hi cheng 100 leh cheng 200 man siam a ni. Season tir a team pahnihte inhmachhawn tum khan si khat ve ve inpe in an inhnehtawk a, tun season a chak loh la nei lo leh mahni mual a hneh loh la nei lo inhmachhawn tur an nih avangin en loh phal chi a ni lo ang.

Mikhual chanchin

Kolkata club hlun Kingfisher East Bengal hi I-League ah hmahruaitu ni mekin point 21 an hmu tawh a, tun season ah hneh loh an la nei lo. Trevor Morgan a naute hian vawi kaw khelhah vawi ruk chakin tum thum an inhnehtawk a, an khingpuite lamah goal 18 thunin goal 4 chauh an la chhuah.

An hmatawng pahnih Willis Plaza leh Wedson Anselme te hi I-League a foreigner ‘hot’ ber pahnih an ni mek a, anni pahnih hian belhkhawmin goal 11 an thun tawh a, tlarhnunga an banpui rinawm Ivan Buyenka hi sawi hmaih chi a ni lo bawk. An captain Mizo tlangval Lalrindika Ralte hian yellow card tum thum a hmuh tawh avangin a fimkhur a tul dawn a, card a hmu leh a nih chuan Bengaluru FC an hmachhawn hunah a inlan thei lo ang. Mizote fachuam Didika hian tun season – ah a team te a kaihruai tha hle a, a vawikhat nan a I-League nomawi chawi thei dinhmunah a dinpui mek.

The Red & Gold Brigade te hian an game hnuhnung pahnihah point thum an hmuh zawh loh ve ve avangin an fimkhur a ngai dawn a, mahni muala la tlawm lo Aizawl FC an hmachhawn dawn avang leh anmahni ang chiah a point 21 hmu ve bawk an thenawm bengchheng Mohun Bagan in an mawng thak an rawn hiah sek avangin point thum an hmu lo a nih chuan an tan result tha a ni lo ang.

A thlengtute

Mualneitu Aizawl FC hian point 17 hmu in I-League table – ah pathumna an ni mek a, game kua khel tawhin vawi nga an chak a, vawi hnih ve ve chak loh leh draw an nei. An khingpuite lamah goal 12 thunin goal 9 an chhuah a, heng zinga goal 3 hi an muala an chhuah a ni.

Khalid Jamil a naute hi an game hnuhnung pangaah tum hnih an tlawm a, an game hnuhnung berah Bengaluru FC an draw bawk. Aizawl team hian chak an duh a nih chuan goal thun hreh loh Kolkata club hmatawngte an ven zawh a tul dawn a, feet 6 leh inchi 3 leh a chanve zeta sang Ugandan defender Ivan Buyenka an sut tlang a ngai bawk ang.

Aizawl FC hian an hmatawng ti chak turin MPL5 Best Midfielder Lalruatfela Zote an lalut a, a khelh leh khelh loh erawh Jamil-a thu thu a ni. Tarlan tawh angin Aizawl FC hian tun season ah tum li zet penalty an chawi tawh a, an coach pawh a lawm lo hle a nih kha. Heti chung hian beiseiphak bakin an che tha a, I-League match kua khelh hnua pathumna nih theih hi India mipui tamzia atanga chhutin sawi nep theih a ni lo.

Enge an sawi ?

East Bengal coach Trevor Morgan chuan an khingpui turte chu fakin,” Aizawl FC hian season tha tak an hmang mek a, naktuk hian game hautak tak kan hmachhawn ka ring,” tiin a sawi a, Barasat Stadium – a an inhnehtawk ai khan an team an that tawh zawk thu a sawi. Mikhual lam team captain Didika pawhin Aizawla inkhelh chu a phur tawh thu a sawi a, chutih rual chuan tunhnaiah an zin nasat avangin an taksa a chauh thu a sawi tel zauh bawk.

Aizawl FC boss Khalid Jamil pawhin a hmachhawn tur Morgan a ngaihdan chu tawmpuiin inkhel hautak a nih tur thu a sawi a, “Chak kan duh a nih chuan ka player te zawng zawngin an theihtawp an chhuah a tul ang,” tiin an inkhelh tur chu match pawimawh a nihzia a sawi.