Addio Andrea Pirlo – Lawmkima Hmar

Italian deep-lying midfielder kum 38 mi Andrea Pirlo chuan December thlaah football a chawlhsan dawn thu a puang ta. An tumpuiten hmachhawn hrehawm an tih em em thin Pirlo hi May 19, 1979 khan Flero, Italy ah a piang a, 5 ft 9 inch leka sang a ni.

Ball a sem thiam chu thuhran nise awmna hmun tur a hre em em a, a vision a that piahah ball thunun kawnga harsatna nei lo mi, thluak fim tak niin free-kick specialist a ni bawk a, eng anga boruak sangah pawh a chi-ai ve ngai lo!

A bul tanna erawh a chuti lua lo! Pirlo hian an khaw club Brescia-ah attacking midfielder angin bul a tan a, kum 1997 khan Serie B title lakpuiin Serie A ah an kaisang a. Serie B lama a chetthat avangin Inter Milan chuan a kum leh 1998 ah an la lut a, player tha tak tak an lo awm sa bakah a tlan chak loh avanga hnawl niin khelhna hmun a chang meuh lo va, kum 1999 khan loan in chhuatir a ni.

Reggina leh Brescia a hlawhtling taka a khelh hnuah pawh Inter Milan-ah player pawimawh a ni pha ta chuang lova, kum 2001 khan Inter hian an hmelma AC Milan lamah an hralh ta nge nge a, an tisual chhiava.

Hetih hunlaia AC Milan manager Carlo Ancelotti chuan Pirlo thatna lai tak hmu fuhin attacking midfielder atana hmang lovin defence hmaah ‘deep-lying playmaker’ atan a hmang a, a hma zawng aiin a team te game siamrem turin a tangkai ta zawk. Reiloteah world-class midfielder a chhuakin a team te chu UEFA Champions Leagues ah kum 2003 leh 2007) khan champui puiin tum hnih ngawt UEFA Super Cups (2003 & 2007) a lakpui bakah Serie A title vawi hnih lakpui bawkin (2004 & 2011), khawmualpui tina champion club te inelna FIFA Club World Cup ah kum 2007 khan an champion zui ta bawk a ni. Hei mai hi a la ni lo, kum 2004 a Supercoppa Italiana an lak tum leh kum 2003 Coppa Italia an lak tumte khan ‘Tunge Milan player pawimawh ber?’ tiin inzawt ta ila, “Pirlo’ tih chu a chhanna a ni ngei ang.

Italy club talbuai tak, kum 2003 hnu lama eng title mah la tawh lo Juventus chu kum 2011 khan free transfer in a zawm a, a rah chin a piang chu a ram ni zelin, a zawnin Serie A title 4 (2012, 2013, 2014, & 2015) a lakpui bakah Supercoppa Italiana title 2 (2012 & 2013) bakah kum 2015 khan Coppa Italia title a lakpui bawk a ni. Season 20 chhung zet Serie A club a a khelh hnuin kum 2015 khan New York City FC a zawm a, a season hnihnaah play-off a thlenpui nghe nghe.

Ram tana khelh tam lamah pawh Pirlo hi a duai lo hle a, Italy tan vawi 116 inlanin an ram tana khelh tam lamah 4-na a ni pha a, Italian youth team (U15, U18 & U21) level ah pawh a lo inlan tawh thin a, a captain-na hnuaiah kum 2000 khan UEFA European Under-21 Championship title an la a, Golden Player leh Top Scorer of the tournament lawmman a dawng nghe nghe.

September 2002 khan Italian senior team zawmin kum 2004 Olympic a bronze medal an lak tum khan captain a ni tawh. Kum 2006 FIFA World Cup-a an champion tum khan Pirlo hi tel lo ta se, Italy kha eng ruai an nih loh hmel. Khami tum khan vawi 3 lai ‘Man of the Match’ atan thlan niin final-ah pawh khan ani aia thlan tur an hre lo a nih kha. World Cup chanchina, tournament khata ‘Man of the Match’ atana thlan zin ber niin Bronze Ball (third best player of the tournament) atana thlan niin Team of the Tournament-ah a tel pha bawk a ni.

Euro 2012 ah khan Italy chu final thlenpuiin Andrés Iniesta nen vawi 3 lai ‘Man of the Match’ atan vawi 3 ve ve thlan an ni a, Team of the Tournament-ah a lang pha bawk. Khing kan tarlante bakah hian Italy tan tournament lian thamah a inlan nual a, kum 2004 leh 2008 European Championship (Euro)-ah inlanin kum 2010 leh 2014 FIFA World Cup, kum 2009 leh 2013 FIFA Confederations Cup-ah te a inlan bawk a ni.

Heti khawpa player tha ni si chuan mimal ang erawh chuan a ber nihna a hauh khat viau thung a, World Playmaker of the Year thlannaah khan 2006 (3-na), 2007(2-na), 2012 (4-na), 2013 (3-na) leh 2015 (3-na) te a lo ni tawh a ni. Kum 2012 UEFA Best Player in Europe Award ah khan 4-naah awmin a kum lehah 7-na a hauh bawk. Kum 2007 FIFA World Player-ah khan 7-na tho niin 2007 Ballon d’Or (5-na) leh 2012 FIFA Ballon d’Or award-ah khan 7-na bawk a lo ni tawh a ni.

UK chanchinbu lar Guardian chuan kum 2012 leh kum 2013 khan khawvela footballer tha a thlanchhuah 8-naah an dah a, kum 2015 khan France Football chuan kum 36 tling tawh player tha 10 an thlanchhuah zingah an telh bawk a ni.

Andrea Pirlo:

755 club games
116 senior caps
86 goals
17 trophies

Posted in Rampawn.

Leave a Reply

Or