(He post hi nizana post chauh ni mah se rin aiin chhiartu an tam hman a. Tin, readers te’n min hlut saka, zawhna te min zawh avangin ka lawm hle a ni. He Cup hi nakum lama khelh tur anih avangin ‘detail’ takin ka la ziak duh chiah lova mahse ZoFooties thenkhat te’n tute nge khel thei, eng chin nge a huam tih kan hriat duh hlawm avangin “Tute nge khel thei” tih leh “Engtinnge Qualifying an khelh” tih ka rawn ziah belh leh a ni.)

AFC Challenge Cup 2012 draw chu nimin khan Kathmandu, Nepal-ah neih a ni a, India chu DPR Korea, Tajikistan leh Philippines te nen group khatah an awm a ni. Group leh lamah Maldives, Turkmenistan, Palestine leh Nepal an awm thung. He Cup hi Nepal chuan a thleng dawn a ni.

India awmna hi ‘Group of Death’ ti a sawi ngam a ni a. A chhan chu India, DPR Korea leh Tajikistan te hi champion vek tawh an nih vang leh la champion awmchhun te an nih vang a ni. Tajikistan hi record nei tha ber an ni a, final vawihnih khel thei awmchhun an ni a, vawikhat an champion tawh bawk.

Qualifying hi kumin March thla khan khelh a ni a. India hi Group B-ah awmin Turmenistan, Pakistan leh Chinese Taipei nen an awm hova. India leh Turmenistan hian point 7 ve ve hmuin Goal Difference pawh a inang chiah a, an qualify ve ve a ni. India match zawng zawngah hian Mizo tlangval Jeje-a chuan a pet goal vek a, goal 4 a thun a, India top scorer a ni. Tin, Murad Alyan (Palestine) nen goal 4 thunin Qualifying-ah hian top scorer an ni bawk.

AFC Challenge Cup 2012 ah hian India chuan March ni 9-ah an match hmasa ber an khel ang a, Tajikistan an tum dawn a ni. March ni 11 ah Philippines an tum ang a, ni 13-ah DPR Korea an tum leh ang. Semifinal hi March 16-ah khelh a ni ang a, Final erawh ni 19-ah khelh a ni ang.

AFC Challenge Cup hi 2006 atang khan khelh tan a ni a. Bangladesh ah khelh niin Tajikistan an champion a. 2008 ah India in a thleng a, India hi a champion nghe nghe. 2010-ah erawh Sri Lanka in a thleng a, North Korea an champion thung a ni.

Hetiang hian group hnih-ah then an ni. Cup khelh dawnah hei aia chiang hian kan la rawn post dawn nia.

Tutenge tel thei chin?
AFC chuan chuan ram 46 te chu group 3 – Developed, Developing leh Emerging Associations-ah te a then a. Developed-ah hian ram 15 an awm a, Developing-ah ram 14, Emerging-ah erawh ram 17 zet an awm thung.

Developed Associations:  Australia, Bahrain, China PR, Iran, Iraq, Japan,South Korea,
North Korea(DPR Korea), Oman, Kuwait, Qatar, Saudi Arabia, Syria, Thailand, Uzbekistan

DevelopingAssociations: HongKong, India, Indonesia, Jordan, Lebanon, Malaysia, Maldives,
Myanmar, Singapore, Tajikistan, Turkmenistan, United Arab Emirates, Vietnam, Yemen

Emerging Associations:  Afghanistan, Bangladesh, Bhutan, Brunei, Cambodia, Chinese Taipei, Guam, Kyrgyzstan, Laos, Macau, Mongolia, Nepal, Pakistan, Palestine, Philippines, Sri Lanka, Timor-Leste

He Challenge Cup hi Emerging Associations ho tana a siam a ni a. Mahse Developed leh Developing atang pawh hian ram thenkhat chu an tel tho a ni. Chungte chu North Korea (DPR Korea),India, Maldives, Myanmar, Tajikistan leh Turmenistan  te an ni.

Engtinnge Qualifying an khelh?
AFC Challenge Cup-ah hian tumah direct-in tling an awm lova. Champion leh runners-up paw’n qualifying an khelh tho a ngai a ni. Ranking sang 12  te chuan Group stage an thleng nghal a. Mahse ranking hniam ho erawhin home & away basis-in qualifying play-off an khel thung a. He play-off a a sang 4 te chu Group stage-ah hian an inhlangkai a ni.

Tihian Group stage ah hian ram 16 an awm ta a. Group 4-ah then an ni leh a.  Ram hrang hrangte hian single round-robin system an hmang a. Single round robin awmzia chu team tinte hi vawikhat chiah an inkhel dawn tihna a ni, home and away basis a ni lo a ni. Double round-robin system-ah erawh vawihnih an inkhel thin a, home & away basis a ni ber.

AFC chuan group tinte khelhna tur a siam a. 2012 atan bik hi chuan group A -in Myanmar-ah, group B-in Malaysia ah, group B-in Maldives ah, group C erawhin Nepal ah. Tichuan group tin atanga a sang pahnih te’n he AFC Challenge Cup hi an khel dawn a ni.