AFC U-19 QUALIFIER KHEL TUR INDIA TEAM – AH MIZO PAHNIH

Kum 2018 AFC U-19 Qualifier khel tur India team chuan vawiin khan India ram an chhuahsan a, Mizo pahnih an tel.

FIFA U-17 World Cup-a India coach Luis Norton de Matos chu India Under 19 coach ni turin AIFF chuan a ruai zui a, mi 24 awmna India U-19 team ah hian Matos hian World Cup-a a player chhawr 14 zet a thlang leh a ni. India team hian Doha an pan phawt a, Doha U-19 nen friendly match an khelh hnuah Qualifier an khelhna tur Saudi Arabia an pan leh dawn a ni.

Tun tum India team-ah hian U-17 World Cup a captain Amarjit Singh leh goal thuntu Jaekson Singh te pawh an tel a, Mizo striker pahnih Lalawmpuia leh Edmund Lalrindika te hi India innghahna tur zinga mi an ni.

Ramhlun South tlangval Awpa hi DSK Shivajians atanga India U-19 team in an lakchhuah a ni a, U-18 I-League ah goal thun khawl te pawh lo ni tawhin tunhnaiah India tan a khel tha thei hle. Awpa hian tualchhungah Dinthar FC tan khel tawhin kumin CYMA Football final-a Ramhlun South chakna goal thuntu kha a ni. Lunglei Bazar Veng a cheng Edmund-a hi India U-19 captain thin kha ani a, player ball thiam leh hmabak nei eng tak niin qualifier an khelh zawh hian Bengaluru FC a zawm ang.

India team hi Group D-ah Saudi Arabia, Yemen leh Turkmenistan nen an awm ho a, inpettling turin team tha tak tak te hi an paltlang a ngai dawn a ni.

India team :
Goalkeepers: Dheeraj Singh, Prabhsukhan Gill, Mohammad Nawaz.
Defenders: Boris Singh, Jitendra Singh, Anwar Ali, Sanjeev Stalin, Sahil Panwar, Deepak Tangri, Namgyal Bhutia, Asish Rai.

Midfielders: Suresh Singh, Ninthoinganba Meetei, Amarjit Singh, Jeakson Singh, Nongdamba Naorem, Rahul Kannoly, Praveen, Roshan Singh, Abhishek Halder, Princeton Rebello.

Strikers: Rahim Ali, Lalawmpuia, Edmund Lalrindika.

Fixtures :
India vs Saudi Arabia (Nov 4, 2017)
India vs Yemen (Nov 6, 2017)
India vs Turkmenistan (Nov 8, 2017)