AFC U-22 Championship Qualifiers pawh tluang takin khel mek zel a ni a. India paw’n an match thumna nizan dar 9:15 khan an khel a, United Arab Emirates (UAE) nen intumin 1-1 in an draw a. India goal awmchhun hi Romeo Fernandes thun a ni. Naktuk hian Turmenistan nen an inkhel leh ang.

Inkhelh hma chanchin
India hi an match hmasa berah an chak a. Match hnih naah erawh an chak loh avangin an tan chuan UAE hneh ngei ngei hi a ngai tawh a. UAE leh Iraq hi an group-ah an sang ber a. India leh Oman te’n an dawt a. Group khat atang pahnih chiah an qualify dawn avangin an chak a ngai a ni.

India Captain Jeje-a chu a khup hliam ala dam chian loh avangin a start lova. Tin, playmaker leh India top scorer nilai Alwyn George chu double yellow vangin a khel thei lova. Star player pahnih te’n an start theih loh avangin fans te chuan India chak hi an ring meuh lo a ni.

Tute nge khel?
Keeper: Gurpreet Singh Sandhu (Captain)
Defenders:  Abhishek Das, Souvik Ghosh, Prathamesh Maulinkar, Narayan Das
Midfielders : Pranay Halder (Vishal Kumar – 76’), Milan Singh, Saiju Mon (Romeo – 48’), Tirthankar Sarkar (Jeje Lalpekhlua – 69’), Lalrindika Ralte
Striker : Manandeep Singh

First half-ah si khat an phur
Royal Oman Police Stadium ,Muscat-a inkhel hmuhnawm takah UAE lam hian bul an tan tha zawk a. An thawhrah an seng nghal a. Ho angreng takin minute 9 lekah Jamal Ibrahim chuanUAE tan goal a rawn thun a.  Hei hi India-in a tawp thlengin an tuar ta a ni.

India hi an chiai mai lova. Pet goal tumin an nawr let ve nghal a. An tan phah zawk a. UAE lam hi an bet tan a. Corner pawh first half chhung hian vawi 7 zet an hmu hman a ni. Mahse a pawimawh ber goal an thun thei lo thung a.

India midfielder te an thawkrim a. Didika, Pranay Halder leh Manipuri- Milan Singh te’n ro an rel tan a. Alwyn George awm lo an tuar a tih theih bawk. Didika hian midfield-a a kawppui Alwyn hi khelhpui thei ta se first half-ah hian antih goal ngei rin a ni. Minute 40 naah UAE player chu penalty box-ah a hand ball a, mahse referee-in India team hi penalty a pe lo a ni. Goal dang a luh belh lova. Half time a ni zui a.

Second half-ah super sub’ pahnih “Romeo Fernandes leh Vishal Kumar”
India hian chak an duh avangin Dempo SC winger Romeo Fernandes an luhtir a. He winger tlan chak tak hi Goa lam mi niin kum 19 chauh a la ni a. A rawn luh hnu hian game a thlak nasa hle a ni. Minute 51-ah Pailan Arrows midfielder Tirtankar Sarkar tan ball tha zet a pe lut a, mahse Tirtankar Sarkar hian ho takin, uihawm tak siin a lo thelh a ni. A teammate te leh fans te paw’n a goal ngei anih hi tiin an lo au hman nghe nghe.

Minute 69-ah Coach-in Captain Jeje-a a risk leh a. Tirtankar Sarkar hi a rawn thlak a ni. Minute 71 naah Jeje hian chance a rawn nei nghal a. Milan Singh-a corner tha tak chu uihawm takin chan (mark) lova awm Jeje-a chuan a head goal lo leh bawk a. India vanduaina a kal tluang zel a. Mi tam tak chuan an chak loh an ring tawh a ni. Minute 76-ah Coach-in substitution a siam leh a, a siam fuh khawp mai. Pranay Halder lachhuakin Vishal Kumar a luhtir a.

UAE lam hi an bet zel a, India-in game an thunun a, mahse a pawimawh ber goal an thun thei lo thung a. Minute 88-ah India in an duh an hmu ta ! Pailan Arrows defender, India “Rory Delap” an tih mai, bench atanga rawn lut Vishal Kumar-a throw tha zet chu Substitute tho Romeo chuan a lo head goal a. Thawm a tha kher mai. A hmuna en mai bakah khawvel hmun hrang hranga Indian football fans te an lawm hle a ni.

Hemi hnu lawk hian Romeo tho hian chance tha tak a nei leh a, mahse UAE keeper-in a lo dang hman hlauh a ni. Goal dang a lut tawh lova. 1-1 in an in draw a ni.

Sawi zui ang

• UAE hi FIFA ranking-ah119-na an ni a,India erawh 164-na an ni thung.
• UAE hi kumin London Olympics khel pha (qualified) ngat an ni.
• India team hi tun tournament-a UAE lama goal thun hmasa ber an ni.
• Indian midfielder Pronay Halder chu double yellow card vangin Turmenistan an tum hunah a khel ve thei lovang.
• India players yellow card hmu tawh te : Tirthankar Sarkar, Abhishek Das, Narayan Das, Ganeshan, Lalrindika Ralte leh Prathamesh Maulingkar.
• India hian an playmaker Alwyn George awm lo hi an tuar a tih theih a. Tin, Captain Jeje-a inhliam dam thei lo hi an tuar a tih theih bawk. Mahse heti chung hian UAE an draw thei a ni.
• India team hian Coach thar Arthur Papas (Australian) hnuaiah hmuh theih khawpin hma an sawn a. Team tha zawka ngaih Iraq leh UAE an khelhdan atang a hriat a. Chak lo mah se AIFF hruaitute chuan result chhia-ah an ngai lem lo.
• He inkhel hi National Coach Wim Koevermans leh Technical Director Rob Baan te’n a hmunah an en ve bawk a ni.
• India hian UAE hi draw mah se luhna chance an la nei tho a ni.

Enge an sawi ?

• Coach Papas chuan “India ka rawn kal dawn khan beiseina sang tak ka nei lem lova mahse tunah chuan ka players te hian kha ngaihtuahna kha min paihsak chiang kher mai. Ka players te hi ka chhuang a, an fighting spirit hi a tha em em a ni” a ti. Tin, Coach hian Senior team Coach Wim Koevermans hnenah “He batch-ah hian thiam tak tak i hmu ang ka tih kha maw..” a ti bawk a ni.
• AIFF General Secretary Kushal Das chuan “Kan naute khan an khel tha a. An fight tak zet zet a. Khatiang taka team tha zawk, huaisen taka an khel hmuh kha a nuam hle a ni” a ti.
• ZoFooty chuan Didika leh Jeje-a kanbe leh thei hlauh a. Anni pahnih pawh hian an ui thu an sawi nasa khawp mai. “Rin loh deuhvin goal kan chhuah a, a goal dan lah kha a ho bawk si a, kha kha kan tuar ta a ni. Kan hneh lutuk, mahse a pawimawh ber goal kan thun thei si lova kan in draw ta a ni. Mahs ekan hotute chu an lawm ve hle a. An beisei baka thain kan khel a, an rin phak bakin kan tumpuite kan khel thin a. Result chhia-ah an ngai lem lo a ni. Tin, Mizo mipui te’n min lo tawngtaipui chhunzawm zel turin kan ngen duh bawk a ni” tiin ZoFooty an hrilh.