PWD, PHE, TBL, AFC vanglai kha en ve hmanlo mahila, a hmuhnawm zia te leh entu an tam thin zia an sawi erawh ka hre pha ve a. Mizoram football vanglaia petna bera an sawi thin B. Laldingliana (U Dingtea), ball thiam vang leh a patet vang a lar em em U Khuala (Khualte-a), defender tha Khawte-a te kha chu kan veng ami annih avangin ka hre ve em em a, kan ngaisang thei khawp mai. An bula khelh ve kha kan chak thei em em a, an upat lama kan khelhpui ve te kha tun thleng hian ka la ngai hlu reng a ni.

Aizawl Football Club Vs Republic Veng GSA 1996 Independence kha a ni ta in ka hria, ka hresual thei tho bawk. Kan veng khan rinloh tak maiin khatih hunlaia club lian TBL te kha hnehin Final an lut hlawl mai a. An sawi ka hriat dan chuan TBL kha an Champion chuan players tin te kha Yamaha RX100 an pe vek dawn anti lehnghal.

Khatiang team hneh tu kan nih avang khan Republic Veng mi nih kha a nuam em em a, kalna apiangah kan inchhuang phah em em mai a ni. Chuvang chuan AFC pawh kha hneh turah khan kan inngai a. Kum 2003 a U Khuala te ho nen YMA team a kan tel ho a, min hrilh ka hriat reng chu, “Khatia Final kan lut ta kha, kan hawi sang em em, kan kal deuh larh larh a ni ber mai. Chutah veng chhung mi te pawh an lo inphal ta deuh a, camp ah pawh eitur kha a that phah khawp mai, Bawngsa hi kan ei reng mai a ni” tiin min hrilh a.

Mahse khatih hunlai a, kan venga kan ngaihsan thin em em leh kan veng Captain ni thin J. Lalmuanpuia (Muanpuia) kha AFC ah khan a khel tlat avangin ngaih erawh a ngam zan lo a ni.

AFC chu kan hneh ngang lo a ni!!!

Ruah a sur a, entu an tam a. Ruah a sur avang leh entu an tam avangin kotlang bul lei pawh a min a, damdawi in a hruai pawh an nei hial in ka hria, ka hrechiang ta lo. Amaherawchu ka hriatchian em em chu Muanpuia’n kan veng lama ball a rawn khalh apiangin an lo aw el thin a. Patling pakhatin “Nupui fanau chawm tur a nei a, i hrethiam ang u” a tih kha chu ka theihngilh thei lo. Muanpuia hi Luiz Enrique (Barcelona Captain thin leh tuna A.S Roma Coach) kan ti thin. Kan veng kha an chak tlat loh avangin khatiang hun kha ngaihtuah let pawh hian hreawm ka la ti khawp mai, 4-1 lai a kan chaklo vangte pawh a ni mahna.Mahse Local Football ah chuan khami aia level sang inkhel ka en leh pawh ka hre chuang lo.

AFC an rawn awm let leh tur hi ava lawmawm em!!!

AFC kha khatih hunlai a mi tan hlawh tak kha annia, Police erawh mi zawng zawng huat a ni thin. Civil mi tawh phawt kha chuan Police kha an an tan lova, players tha thenkhat pawn fans vangin police a khelh an duh loh phah hial. Khatiang boruak aia u ten min hrilh thin kha a ngaihnawm a, khatian boruak siamtu zing ami Aizawl Football Club an rawn let leh tur hi a lawmawm hle in ka hria. Club tha tak an rawn nih leh theihnan duhsakna ka hlan e.