Prime Minister Dr.Manmohan Singh chu South Africa ah kar leh hian 5^th India-Brazil-South Africa (IBSA) meeting hmang turin a kal dawn a. Khawvel a democracy ram lian pathum – India, Brazil leh South Africa ten thil pawimawh tak tak an sawi ho dawn a ni.

Hemi denchhan hian tunthla tir khan Sports Ministry chuan All India Football Federation (AIFF) hnenah ngenna siamin football team thawn ve turin a ngen a. AIFF hian lam thawn an duh a mahse kum bithliah zat an sawi si lova, hei hian min tibuai vek a, chhan dan tur kan thiam lawk lo a ni an ti a. U-16 team hi Uzbekistan ah AFC U-16 Qualifying khelin an kal daih a, U-19 team lah tunthla tawp hian AFC U-19 2012 Qualifying khel turin Qatar ah an zin leh daih dawn bawk si a an ti a ni.

Thawhtan khan Sports Ministry lam chuan AIFF be lehin team an thawn theih dawn leh dawn loh a zawt a. U-16 leh U-19 team te an hmanloh avang hian Sports Ministry sawmna leh ngenna zahawm tak chu AIFF hian a hnar ta a ni. Hei hi AIFF lam chuan insawifiah in kum bithliah zat an sawi si lova, senior team tha tak kan duh tih ringawt min hrilh a ni an ti a. Hetih lai hian Sports Ministry lam ve thung chuan an players duh duh 18 tir mai se, SAI (Kolkata leh Goa) atang coach 2 thawn bawk se a tawk mai a, AIFF lam hi an thiamlo a ni a ti ve tlat thung.

Eng a pawh chu lo nise AIFF leh Sports Ministry meuh inbia an ni a, India rama Sports lama hruaitu lawk inbia hi tunlai tawng takin an ‘nawi’ deuh chu a ni. An thu a inhmu lova, thiam chan an tum ve ve a, information mumal takin an in pe lova, hei hian ngaihtuahna a ti kal thui khawp mai le. India ram a Sports in hma a sawn theih lohna chhan pawh hi hetiang mai mai vang hi a lo nih dawn hi.

Mah se hei erawh thu lawmawm tak a ni thung. Sports Authority of India (SAI) chuan players 18 a tir theih tur thu a sawi a, AIFF lamin theilo mah se an ni lam hian India ai awh tur players an thawn thei hlauh dawn a ni. Prime Minister rualin heng naupang te hi South Africa ah an zin ve ang.

Source :  www.goal.com