AIFF chuan tun hnai khan a scheme thar ‘National Team Players & Staff Benefits Policy’ chu a tlangzarh a, hei hi ram tana inlan hnua inkhelh chawlhsan tawh player leh staff te bakah an chhungte damdawi in awmna leh thihna hial an tawk a nih pawha an chhawr theih tur a ni. He policy hian tuna football – a ‘active’ lai te a huam lo.
Technical staff tih hian Head Coach, Assistant Coach, Goalkeeping Coach leh FIFA Referees/FIFA Assistant Referees te a huam a, player hi kum 1950 hnua India tan a inlan tawh hrim hrim a huam a, hemi bik hi category 3 – ah then a ni thung.
Category hrang hranga awm te hi Level A, B leh C – ah te thliar a ni leh a, Level A hi India tana vawi 20 leh a aia tam inlan, Level B hi vawi 6-20 inkar inlan leh Level C hi vawi 5 chin inlan te an ni. Level hrang hrang pawisa dawn theih hi a hrang leh thliah thliah bawk.
Category 1
Senior team emaw U-23 team anga FIFA World Cup, AFC Asian Cup, Asian Games, Olympic Games leh SAFF inelnaa inlan tawh player leh staff te chu Category 1 – ah hian dah an ni.
Category 2
Senior team emaw U-23 team anga FIFA WC Qualifiers, Olympic Games Qualifiers, AFC Asian Cup Qualifiers, Invitation Tournament hrang hrang Merdeka Cup, King’s Cup, Intercontinental Cup, bakah International Tier 2 match – a inlan tawh te.
Category 3
Category 1 leh 2 a tel lo, ram tana Age-Group FIFA World Cup,
Age-group AFC Asian Championship/Cup leh SAFF inelnaa inlan tawh te.
Hospital leh medical treatment atan Category leh level (ram tana khelh tam zat) a zirin pawisa bill theih hi a hrang leh a –
Category 1 Level A – Rs.8 lakhs
Category 1 Level B – Rs.5 lakhs
Category 1 Level C – Rs.3 lakhs
Category 2 Level A – Rs.5 lakhs
Category 2 Level B – Rs.3 lakhs
Category 2 Level C – Rs.2 lakhs
Category 3 Level A – Rs.3 lakhs
Category 3 Level B – Rs.2 lakhs
Category 3 Level C – Rs.1 lakh
Hospital leh medical treatment bill tur hian damdawi thiamin a enkawl atanga ni 30 chhungin AIFF (helpdesk@the-aiff.com)- ah hriattir a tul thung a, pawisa bill theih zat tarlan an bill theih zat tam ber a ni.
Hei bakah hian player/technical staff te an boral a nih chuan AIFF – in Rs.2 lakhs thlengin an chhungte a tanpui thei a, hei hi eng category leh level – ah pawh a pawisa zat hi a inang vek a ni. ‘Chhungte’ tih hian nu leh pa, nupui/pasal leh fate (kum 25 an tlin thleng) a huam.
