All India Football Federation (AIFF) president Praful Patel chuan India ramah football-in hma a sawnna turin naupang atanga tih takzeta inzirtir uar a nih tur thu a sawi a, ‘youth development project’ lian tham taka kalpui a tum thu a sawi. He thu hi tun hnaia New Delhi-a AIFF General Body Meeting-ah a sawi chhuak a, he hunah hian India-in kum 2007-a FIFA Under 17 World Cup thlen a tum thu leh, thleng tura a inpuahchah dante AIFF president hian a puang bawk a ni.
AIFF youth development programme-a pawimawh ber pakhat chu FIFA kal tlanga Regional Academy pali a hawn tur hi a ni a, inbuatsaihna chu beisei angin tluang takin a kal mek niin AIFF president chuan a sawi. FIFA bul tuma AIFF-in academy pali a hawn thar turah hian Director-ah Australian football expert Scott O Doniell an hmang dawn a; India ram pumpuia football hmasawnna tur duangtu turin Technical Director-ah Netherlands lam mi Rob Baan rawih a ni bawk a, ani hi tun hnaia Mizorama naupang talent nei tha deuhte zawnga lo kal tawh kha a ni.
AIFF hian FIFA kaltlangin grassroot football programme kalpuina hmasa ber turin Mizoram Football Association a thlang a, AIFF leh MFA lamin he project kalpui dan tur hi an duang mek a, kumin fur a zawh ruala tan theih tura ruahman a ni. AIFF constitution chu Asian Football Confederation (AFC) dan zula siam danglam turin he meeting-ah hian an rel bawk a, FIFA leh AFC duh anga AIFF a kal theihna turin ruahmanna siam thar a ni bawk ang.
He AIFF General Body Meeting-ah hian Mizoram atangin MFA Honorary Secretary Lalnghinglova Hmar pawh a tel a, Mizoramah khelmual tha a awm tawh avangin AIFF hnuaia intihsiakna lian tham pawh a thlen theih tawh thu a sawi chu AIFF General Secretary Kushal Das leh AIFF Competition Committee hotupa Anil Kamat-te chuan bawhzui an tiam bawk.
I League hotupa ber, I League CEO Sunando Dhar chuan Mizoramah club liante thlenna tur hotel tha a awm chuan Federation Cup qualifier, I League second division premilinary round-te pawh nghah theih a nih thu a sawi a, “Khelmual ber in neih tawh chuan hotel awm dante zir chiangin Mizoramah AIFF hnuaia club intihsiakna inkhel pawimawhte pawh nghah theih a ni thuai ang; in state-in football in lawm tih kan hria a, I League second division club pahnih in nei theite hi kan lawmpui che u a, Mizoram FA hmasawn danah AIFF chu a lawm hle a ni,” a ti.
a va lawmawm dawn ve
lawmawm khop mai
thu lawmawm tak ava ni em ! Ground chu kan nei tha tan, hotel mawlh hi a ni. Accomodation hi a pawimawh ber a.. Kan sawrkar hian hma la zel se tha ang.
Tha khawp a lawm. Kawng khata hmasawnna hian kawng danga hmasawn tel a tul zia a tarlang khawp mai. Sawi dawn chuan a sei lutuk dawn e..