Aizawl club-in Serchhip club ngam lo – Rooney Opa

Mizoram Premier League khel tur zawnna qualifier chu vawiin khan khelh zawh a ni ta a, Serchhip DFA aiawh New Serchhip FC chuan 2-1 a Aizawl DFA aiawh Venghlui FC hnehin playoff khel turin an tling.

MPL5 Qualifier-ah Mizoram Police an champion a, Aizawl DFA champion ni bawk Police hi MPL khel turin an tling. New Serchhip FC hian point thum hmuin pahnihna an ni a, MPL5 pasarihna Ramhlun North FC nen relegation/promotion playoff an khel ang.

Vawiiina Lammuala inkhelah New Serchhip tan Lalhruaizela leh Remlalruata ten an thun a, Venghlui tan Lalrinhlua Ralte chuan injury time-ah goal khat a khung ve bawk.

Kawng awmchhun Playoff
MPL6 Qualifier-ah hian team thum telin New Serchhip FC leh Venghlui FC te hian Mizoram Police FC an hmachhawn ve ve tawh a, an tlawm ve ve. Hei vang hian Mizoram chhunga football inelna sang ber an khelh theih dan kawng chu playoff hmang chauhin a inhawng tawh.

Playoff-a Ramhlun North hmachhawn turin New Serchhip hi dinhmun tha zawkah an ding. L&L Football champion hian Police lakah goal nga an chhuah a, goal hnih an khung. Venghlui erawhin Police lakah goal ruk an chhuah a, goal khat chiah an khung.

New Serchhip tan playoff khel turin draw a tawk a, Venghlui tan erawh chak ngei ngei a ngai thung.

Chak phu New Serchhip
New Serchhip hi Police laka goal hnih khung thei an ni a, team chhe zawk zawk an ni hran lo. Venghlui lakah Serchhip club game a tha a, a bet zawk an ni deuh reng chung pawhin an tlarhnung a phui tha hle.

L&L Football champion tana defence laia dingte pahnih an khawng tha a, an full back-te an khelh that loh deuh avangin tlarhnung pawp angin lang mah se a laia dingten an lo dang thei zel. New Serchhip an bet mawl tawp lo a, counter attack hmangin chhut let dan tur ruahmanna tha tak a nei thlap.

Minute 14-ah counter attack atanga freekick an hlawh chhuah chu Chanmari player hlui C. Lalnuntluanga (C. Tluanga) chuan petin goal kham a pet per a, a let leh lam chu changtu nei lo Lalhruaizela chuan chiang zetin a thun a, hma an hruai der. Hemi hma pawh hian C. Tluanga freekick tha zet chu Chhinga Veng a\anga Venghlui zawmtu keeper Vannunmawia’n a tha takin a dang tawh bawk.

Goal an thun tih loh hi chance tha sawi tur an nei mang lo a, amaherawhchu, mual lai leh tlarhnungah an inrem that em avangin an goalkeeper in hna a nei tam lo hle. Chawlhlawk zawhah New Serchhip game tlemin a rawn kang deuh a, Venghlui tlarhnung an nawr nasa a, minute 73-ah Lalhlimawma ball vawrh tha tak mai chu Remlalruata chuan umlutin chiang zetin a pet lut a, an chakna a nemnghet.

V = Venghlui/Vanduai
Inkhel thununtu zawk Venghlui an vanduai a tih theih a, a tir atangin New Serchhip an nawr betin C. Lalmuanpuia (Puia) chuan chance tha zet mai a hlah a, Reitlang winger hlui Ralkapzauva’n penalty area-ah Puia a titlu mah se Venghlui hi penalty pek an ni lo.

Winger tlan chak Puia hi a khel thain amah changtu Lalchhanliana a tlanpel fo a, mah se, a hmawrbawk danah zir tur a la nei a, goal a keng tel tlat lo.

Minute 33-naah Venghluiin an siphurh sutna hun tha an nei a, K. Roluahpuia’n goalkeeper Malsawmtluanga rawn tlanchhuak man phak loh chiahin tauh mah se New Serchhip defender Chhanlianan a pet chhuak leh hman hlauh.

Second half-ah Venghlui midfielder James Lalhmingsanga corner pet chu Lalrohlua’n a thun teuh hle a, goalline atangin New Serchhip lamin an petchhuak leh hman bawk. Chaltlang FC a\anga Venghlui zawmtu Lalsawmzela pawhin chance tha tak chu engmah loah a chhuah a, hun tawp hma hreta Vanlalhriata corner pet chu substitute Rinhlua’n a tauh lut a, result erawh a thlak danglam pha lo.

Enge hmabak?
New Serchhip FC hian December 14 leh 16 hian Ramhlun North FC nen Relgation/Promotion playoff an khel ang. Heta chak zawk hian MPL6 an khel ang.

Mizoram Premier League Season 6 khel turin Bethlehem Vengthlang, Chanmari FC, Chanmari West FC, Aizawl FC, Chhinga Veng FC, Dinthar FC leh Mizoram Police te an chiang tawh a, Ramhlun North leh New Serchhip ten hmunruak pakhat hi an hnawh khat ang.

ZoFooty Statistics:
Venghlui FC 1-2 New Serchhip FC
VEN : Lalrinhlua Ralte 90’+2
NSFC : Lalhruaizela 14’; Remlalruata 73’
53% Ball Possession 47%
16 Shots 13
9 On Target 6
2 Yellow Cards 1
0 Red Cards 0
Powered by Darchiauva Hardware, Mission Veng

Tute nge khel?
Venghlui FC: Vannunmawia, Remlalfaka, Lalrohlupuia, Lalremruata (Lalrinhlua Ralte 75’), Lalrohlua, K. Roluahpuia, Vanlalhriata, Lalfakzuala (James Lalhmingsanga 46’), Lalsawmzela, C. Lalmuanpuia, Samuel Lalhmunruata (PC Lianhmingthanga 46’).
Sub tluan: Lalthlamuana.
New Serchhip FC: Malsawmtluanga, C. Lalnuntluanga, Lalremruata (David K Hmingthanga 84’), Remlalruata, Lalhriatzuala, Ramduhawma, Joel Lalmuanpuia (H. Lalremruata 80’), Ralkapzauva, Lalhruaizela (Lalhlimawma 63’), Lalchhanliana, Lalthakima.
Sub tluan: Joseph Lalmuanawma.