Aizawl East Zone Football Association buatsaih Season Opening Tournament 2011, Ramhlun Sports Complex Ground-a August 29, 2011 -a neih ṭan chu khelh chhunzawm zel a ni a, Armed Veng Sporting Club, Chanmari FC, Puitea Memorial FC leh Armed Veng S FC te chuan Semi Final an lut ta.

Zing dar 10 : 00 A.M-ah inkhel Armed Veng Sporting Club leh Chhinga Veng Sporting Club Academy te chu hun pangngaiah 1-1 -in an inhneh tawk a, Armed Veng Sporting Club 3- 1 in penalty shoot out-ah an chak.

Chhun dar 11 : 30 A.M-ah Puitea Memorial FC,Ramthar Veng leh Chhinga Veng Sporting Club te an inkhel a, inkhel a hmuhnawmin boruak pawh a tang tha hle a, hun tawp dawn ruaiah Chhinga Veng Sporting Club lamin penalty an chawi a, chu chu PMFC lamin goal-ah an chantir chu he match-a goal lut awmchhun a ni.

Match thumna dar 01 : 00 P.M-a Chite Veng GSA FC leh Chanmari FC inkhelah Club dingthar leh phur, veng mipuite tawiawmtu pawh ngah tak Chanmari FC chuan Si 4 faiin Chite Veng GSA FC hi an hneh a, tihian match hnih lekah goal 9 an khung tawh a, chutih rual chuan 4-0-a hma an hruai mek laia red card hmuh ngai khawpa an player a inthunun thei lo kha chu a hnuleha an game-in a tuar phah thei mai thei.

Dar 02 : 30 P.M -a inkhel 1st MAP Football Academy leh Armed Veng S FC te chu hun pangngaiah an inhneh tawk hle a, penalty shoot out hmanga chak zawk zawn a niin Armed Veng S FC chu 4-2-in an chak ta a ni.

Semifinal hi 1.9.2011 hian khelh chhunzawm leh tur a ni a, inkhel hmasa zawk hi dar 11-a tanin, inkhel hnuhnung zawk hi dar 1-a inkhelh tura ruahman chhin a ni a, hetiang hi inkhelh dan tur a ni:
11 : 00 A.M Armed Veng Sporting Club Vrs Chanmari FC
01 : 00 P.M Puitea Memorial FC,Ramthar Veng Vrs Armed Veng S FC