Aizawl FC Academy-in thilmak thlentir

Posted on December 2, 2016December 2, 2016 by ZoFooty

3 min read

Aizawl DFA I Division League final-ah kum zawnin Aizawl FC Academy-in final an lut a, December 6 zan dar 6:30 hian Mizoram Police nen final an khel ang.

Aizawl FC Academy hian final lut turin 1st Bn MAP Academy chu nimin tlai khan RG Stadium-ah 6-1 in an sawp. AFC Academy tan hian Durtlang tlangval Ramsangliana’n hattrick a siam bakah Hmangaihkima’n goal hnih khungin H. Lalnunzira’n goal khat a khung bawk.

Relegate chiang tawh Police Academy tan Lalrinzuala’n goal khat khung ve mah se AFC rawlthar rual final kalkawng an dal zo lo.

Thilmak chu
Round 13-ah Venghlui FC-in Chaltlang FC 3-2 in an hneh. Point thum an hmuh avangin Venghlui FC-in point 25 an hmu a, Aizawl FC Academy-in point 20 chiah an la hmu thung. Club pahnih hi head to head-ah an intluk chiah avangin Venghlui hian an match hnuhnung berah an khingpui Ramhlun FC draw pawh ni se Aizawl FC Academy hian final lut turin match hnihah goal kua an la mamawh tho ang.

Aizawl FC Academy khelh hun a thleng a, Nicky Malsawmtluanga hote hian Chawnpui FC chu 4-0 in an hneh. AFC Academy hi chak mah se match hnuhnung berah Venghlui FC-in Ramhlun FC an hneh chuan beisei tur an nei chuang lo.

Venghlui FC vanduaina belhchhah turin Chaltlang FC an hneh tumin midfielder pawimawh James Lalhmingsanga leh defender tangkai Robert te chuan yellow card an hmu a, Ramhlun FC an hmachhawn ve thei lo. Nimin chawhmaa RG Stadium-a Venghlui FC leh Ramhlun FC inkhelah goal a lut lo a, Aizawl FC Academy-in beisei an neih phah bawk.

Aizawl FC Academy-in an hun tha neih an hlah lo a, final lut turin goal nga tala chak an mamawh. AFC Academy khingpui 1st Bn MAP Academy hi kumin MPL Under 18 finalist angah a ngaih theih a, Chanmari West Under 18 player te kha Police Academy an ni. West Warrior Under 18 hian MPL U18 final lut turin AFC Under 18 an hneh avangin AFC Academy tan First Division final luh hi kawng awlsam a ni lo

MPL Under 18 a ni tawh lo a, kum bithliah inelna a nih tawh loh avangin vawiin tlai inkhelah erawh AFC Academy chu an assistant coach H. Lalnunzira’n khelmual chhungah a ho thei a, MPL Under 18-a an hneh loh team-te hi First Division-ah 6-1 in an sawp. Aizawl FC Academy tan Sangtea’n minute 81-naah hattrick siam bak an club goal rukna a khung bawk avangin final lut thei dinhmunah a ding a, goal dang an chhuah tawh loh bawk avangin kum zawnin final an lut zui bawk.

Season liam ta khan Aizawl FC Academy hian hneh loh tawng loin final an lut a, amaherawhchu Chhinga Veng laka an vanduai avangin nomawi an chawi lo.

Vawiin Inkhel Results
Chawnpui FC 1 – 3 Chaltlang FC
CHAW : Zodinpuia 10′
CHAL : Lalsawmzela 29′, 89′; C. Vanlalhmangaiha 85′
Aizawl FC Academy 6 – 1 1st Bn MAP Academy
AFC : Hmangaihkima 29′, 70′; H.Lalnunzira 26′; Ramsangliana 41′, 75′, 81′
1st MAP : Lalrinzuala 55′