Aizawl FC an inla tha!

#ZoFooty

Aizawl FC an inla tha!

Mizorama I-League club awmchhun Aizawl Football Club chuan I-League lo awm tur atan inpuahchahna kalpui chho mekin player lam pawh an insiksawi nasa hle. Head Coach atan season hmasa lama season laklawha an lak Yan Law bawk la lehin, ani ho hian RG Stadium ah October thla atang khan camp an nei a, inpuahchahna an kalpui tawh a ni.

Aizawl FC hian season tantirh lama foreigner pahnih an lakluh thu an puan tawh – Alfred Kemah Jaryan leh Matias Veron te chu Visa lam fel thei lo avangin inhriatthiam tawnna nen an chhuahtir leh a, foreigner dang melh nghalin Indian Football a mikhual lo tak Willis Plaza leh Dipanda Dicka te an lalut. Hemi te pahnih bakah hian tlarhnung ti phui turin Uzbekistan Centre Back – Karimov Olimjon an sign bawk a, nikum lama Churchill Brothers captain Bazie Armand chu midfield tichak turin an be fel tawh tih thawm a awm bawk. Foreigners bakah hian Indian players pawh inla thain, kumin Durand Cup-a Delhi FC tana kheltha tak – Rinreithan Shaiza leh hmanni lawka rampum huap futsal inelna a top scorer leh best player ni bawk – Nikhil Mali te chu loan in an la lut bawk. Heng bakah hian tualchhung players tha – Samuel Lalmuanpuia, Jakob Vanlalhlimpuia, R Malsawmtluanga, Lalhmunmawia (Ahmuntea) leh Jones Lalthakima te chu squad tichak turin an sign bawk a ni.

Club President leh Sports Minister ni bawk Pu Robert Romawia Royte chuan tun season-a theitawp chhuahin BOG tur thiantha leh mi fel tak tak, tlawmngaia Mizoram tihmangtha thei tura min inpe an awm thu sawiin, club scouting team ten player tha tak tak an sign thei chu lawmawm a tih thu a sawia, champion tuma an beih ngei tur thu a sawi bawk.

Tarlan tak angin The People’s Club hian tun season hian management lam pawh insiksawi deuhin, Board of Governors ah pawh mi thar engemawzat an awm a, an ni kaihhruaina ah hian tun season I-League ah a sangber thlen tuma hmalak mek zel a nih thu club thupuangtu chuan a sawi.

LR:
Nikhil Mali(RW)🇮🇳
Jones Lalthakima(RB/LB)🇮🇳
Olimjon Karimov(CB)🇺🇿
Willis Plaza(ST)🇹🇹
Dipanda Dicka (ST)🇨🇲
Bazie Armand(CDM)🇨🇮
Samuel Lalmuanpuia (RW/LW)🇮🇳
Jakob Lalhlimpuia (LW/RW/ST)🇮🇳
Rinreithan Shaiza(CM)🇮🇳

REPOST @aizawlfc