AIZAWL FC IN GOKULAM LUHCHILH DAWN – Rooney Opa

Hero I-League khelh chhunzawm zel a ni a, naktuk tla dar hnih hian champion lai Aizawl FC chuan Gokulam Kerela an luhchilh ang. Mualneitu Gokulam tan season bultan fuh loh khuh mawina atan game tangkai a ni a, Aizawl tan champion nomawi humhim an tum a ni tih lantirna atan he inkhel hi a pawimawh hle bawk.
.
Gokulam tan I-League a khirh lua em ni ?
.
Kumin atanga I-League khel tan Gokulam hian season duhawm lo tak an hmang chho mek a, vawi nga an inkhelh tawhah vawi khat chakin vawi khat an khingpui an draw a, vawi thum an chak lo tawh. Tunah hian point li hmu mekin table-ah pariatna an ni mek.
.
Anni hian game hmasa berah Shillong Lajong hmachhawnin sikhat faiin an tlawm nghal a, Chennai City FC nen South Indian Derby an khelh tumin Aizawl FC striker hlui Bayi Kamo goal thun hmangin sikhat ve ve inpe in an inhnehtawk bawk. Hemi hnu hian kai thar ve tho Neroca lakah sithum faiin an tlawm leh a, naupang rual Indian Arrows chu sihnih faia hneh ve in East Bengal lakah sikhat faiin an tlawm zui leh bawk.
.
Champion khelha la khel lo Aizawl FC
.
Champion lai Aizawl FC pawhin season duhthusamin bul an tan lo a, game li khel tawhin vawi hnih an chak a, vawi khat chak lo in vawi khat an khingpuite an inhnehtawk pui. Game li an khelh tawh atang hian point 7 hmu tawhin pasarihna an ni mek.
.
Aizawl hian East Bengal nen sihnih ve ve inpe a an inhnehtawk hnuah Churchill Brothers chu sikhat faiin an hneh a, hemi hnu hian North East Derby-ah Shillong Lajong chu sikhat faiin an hneh lo a, Minerva Punjab lakah erawh 2-1 in hnehna an chang zui. Tun thlengin goal nga an thun tawh a, goal li an chhuah tawh bawk.
Game li ah point sarih hmu tawh mah se an khelh danah mipui mit a la tlung tawk lo a, goal thun an harsat bakah an goal an venghim tawk lo a, Gokulam lakah hian an inrintawkna tizual tura an khelh a pawimawh ang.
.
Chak loh a thiang lo
.
He inkhel hi a tu ve ve tan pawh inkhel pawimawh a ni a, chak loh a thiang lo a ni tawp mai. Gokulam hian an home record chhia thai chhiat an tum a ngai a, tun season-ah an khelmualah vawi hnih khel tawhin vawi khat chak lo leh draw result an nei. Tin, vawi nga an khelh tawhah hian vawi khat chiah chak la neiin an hneh hi naupang rual awmkhawm Indian Arrows an ni a, team dang lakah an khel a la dik thei lo.
.
Anni hian Aizawl FC player hlui Emmanuel Chigozie leh Bayi Kamo te an kawl a, Kamo hi East Bengal nen an inkhelh tumin hliam vanga lakchhuah niin Aizawl hmachhawn turin a dam hman tur leh tur loh a la hriat loh. Tin, anni bakah hian Mizoram Premier League player tha berte zinga mi Laldampuia an nei bawk a, Aizawl FC hmachhawn a chak khawp ang.
.
Lehlamah Aizawl hian an lallukhum humhim an tumna kawngah inrintawkna an neih theih nan hneh theih nia lang Gokulam lakah point thum an hmuh ngei a tul a, point thum satliah mai nilo in goal thahnem tak an thun bawk chuan inrintawkna an neih belh sawt ang. Anni hian an star player Andrei Ionescu chu season tir atangin an chhawr thei lo a, David Lalrinmuana leh Albert Zohmingmawia te nen an inhliam nasat hlawm avangin an game in a tuar kan ti lo thei lo ang. Tunah chuan Albert tih loh an dam kim tawh a, Minerva Punjab lakah game danglam kan hmu a nih kha.
.
Tunah hian William chu goal khung hnem ber niin goal hnih a khung tawh a, defender Kareem Omolaja chuan goal khat thunin goal khat dang assist a nei tawh bawk a, attacker Leonce Dodoz chuan assist vawi thum a nei tawh bawk.

TV hmaah kumhlui thlah nan Aizawl FC inkhel en rawh le
.
He inkhel hi Starsports 2 leh 2HD chuan live in an pe chhuak dawn a,.kumhlui thlahna eitur buatsaih hma in, in warm up nan chawhnu dar 2-ah i TV hmaah lo thu la, Aizawl in hnehna an chang dawn nge dawn lo lo thlir ta che.