AIZAWL FC IN HMAHRUAITU EAST BENGAL HNEH – Rooney Opa

Rajiv Gandhi Stadium-ah Aizawl FC inan form tha an chhawm nung zel a, vawiin khan hmahruaitu East Bengal FC chu sikhat faiin an hneh a, goal awmchhun thuntu R. Laldanmawia chu man of the match atan thlan a ni.
.
Tute nge khel?
.
Aizawl FC: Albino Geovanni Gomes, Lalramchullova, Kingsley Obumneme Eze, Zohmingliana Ralte, Lalruatthara, R. Laldanamwia, Mahmoud Al Amna, Alfred Kemah Jaryan, Brandon VL Remdika, Jayesh Rane, Bayi Kamo Stephane
.
Subs: Zothanmawia, Lalrinzuala Khiangte, Jonathan Lalrawngbawla, Laltanpuia, H. Lalbiakthanga, H. Lalmuankima, William Lalnunfela
.
East Bengal : Rehenesh Tp; Rahul Bheke, Ivan Bukenya, Arnab Kumar Mondal, Narayan Das; Romeo Fernandes, Mehtab Hossain, Rowlin Borges, Abinash Ruidas; Wedson Anselme, Willis Plaza.
Subs : Subhasish Roy Chowdhury, Robin Gurung, Gurwinder Singh, Lalrindika Ralte, Thongkhosiem Haokip, Robin Singh, Nikhil Poojary
.
Aizawl FC-ah inhliam an awm lo a, coach Khalid Jamil chuan a duh ang player a remkhawm thei a, lakthar Lalruatfela Zote erawh hmuh tur a awm rih lo. East Bengal lamah Mizo player in inkhel bul an tan lo a, damlohna vangin Robert Lalthlamuana a khelh theih loh bakah Lalrindika Ralte chu substitute bench lamah awmtir a ni.
.
Inkhel hi atir atangin a tang hle a, Aizawl FC hian midfielder Jayesh Rane thawhrah sengin goal awmchhun hi an thun. Jayesh hian mual veilam sirah ball la in a cross chu Ivan Bukenya chuan lo tauh chhuak mah se lo dawng lehin a cross leh a, hei hi Danmawia chuan lo tawkin keeper a khum chiah chiah a, umzuiin nimin lawka a birthday lawmtu Danmawia hian a tauh lut ta a ni.
.
Rajiv Gandhi Stadium a inkhel hi mipuiin a an tawiawm tha a, inkhel entu thahnem ber tum niin mi 11,345 laiin a hmunah an en a ni.
.
Zuam rual loh Aizawl FC:
.
Aizawl FC hian nikum lamah beiseina sang tak nen a vawi khat nan I League an khel a, a hnuai ber dawttu-ah an awm. Tun season-ah erawh tha taka bul tanin an khelmualah phei chuan hneh loh an la tawng lo.
.
East Bengal hi hmahruaitu niin chak zawk tura rinkai an ni a, chutih laiin mahni khelmual hmang thiam Aizawl FC an hmachhawn miau avangin chak zawk tur a sawi lawk ngawt theih loh. Inkhelh tan atangin team pahnihte an innawr tawk hle a, goal-ah erawh an hlauhawm tawk loh avangin hma an hruai mai thei lo. An hmatawngte an insiamrem tawk lo thin a, tan atanga minute 15 chhungin East Bengal in offside an neih loh laiin Aizawl FC lam hian vawi li lai an nei hman.
.
Striker Kamo a khel chhe lo a, centre line atanga ball khalhin East Bengal defender pathumin an chilh hnuah goal-ah a pet thei lo a, a hnu lawkah goal kham chungah petin chawlhlawk zawhah amah chauha a awm hnuah a pet goal lo bawk. Tin, a pass tha tak chu Danmawian la in a cross chu goalkeeper Rehenesh TP chuan a lo dang hlauh bawk.
.
Chawlhlawk hma in Kamo, Jayesh, Amna leh Danmawia ten chance tha an hmu vek a, pet goal thei an awm lo. Minute 35 lekah inhliam vangin Lalruatthara lakchhuah a ni a, a aiah Lalrinzuala Khiangte luhtir niin RB ah a awm nghal a, Lalramchullova chu LB ah a lut thla bawk.
.
Inkhel pumpui thlirin Aizawl FC hian chak an phu a, hmahruaitu an hneh tak avangin an inthlauhna chu point khat chiah a ni ta bawk.
.
Sawitur nei lo East Bengal:
.
East Bengal hi sawitur nei lo tia kan sawi chuan anmahni tantute rilru a na maithei a, chutih lai chuan an chance tha sawitur an ngah loh avang khan sawitur nei lo kan ti thei ang. Tan atanga minute li lekah Alfred tihsual avangin striker Wedson Anselme chuan chance tha a hmu a, goal kham a pet per hlauh.
.
Hemi hnu lawk hian Abinash Ruidas chuan freekick tha thlawhin lo tauhtu an awm lo a, Aizawl FC an him leh. Chawlhlawk zawhah Didika leh Robin Singh an luhtir a, anni pawh hian goal an thun thei bik lo a, Rahul Bheke cross, Robin Singh-a tauh, Aizawl FC goalkeeper in nuamsa taka a man bak han sawi tur vak an nei lo.
.
Huntawp lamah Aizawl FC an bet hle a, amaherawhchu, a pawimawh ber goal an thun bik tlat avangin East Bengal hi point hmu lo in an hawtir ta a ni.
.
ZoFooty Statistics:
.
Aizawl FC 1-0 East Bengal FC
(R. Laldanmawia 58’)
.
48% Ball Possession 52%
14 (3) Shots (On Target) 4 (1)
218 (156) Passes (Completed) 315 (257)
6 Fouls 15
4 Offside 2
5 Corner Kick 3
1 Yellow Cards 3
0 Red Cards 0
.
MOM: R. Laldanmawia (AFC)
.
Powered by Darchiauva Hardware, Mission Veng.

(Pic : ileague.org)