AIZAWL FC IN MOHUN BAGAN LUHCHILH DAWN – Rooney Opa

Hero I-League khelh lai mekah naktuk hian Champion lai Aizawl FC chuan season liamtaa pahnihna Mohun Bagan an luhkhung dawn a, Kolkata khawpuiah Aizawl FC in Mohun Bagan an la hneh ngai lohna hmunah hian tunge hnehna chang zawk ang tih chu Indian football ngainatute ngaihven ber a ni ta.
.
Aizawl FC tan khelmual ngainatawm loh:
Kolkata-ah hian team pahnihte hi vawi hnih an inhmachhawn tawh a, Mohun Bagan in vawi hnih hnehna an chang. January 9, 2016 khan 3-1 in Mohun Bagan in hnehna an chang tawh a, February 4, 2017 khan 3-2 in Mohun Bagan in hnehna an chang leh bawk. Mizo club in tum hnih an luhchilh tawhah an la hlawhchham ve ve a, tunah hian point thum nen khelmual an chhuah san thei ang em?
.
Tun tumah hian Aizawl hi Gokulam hneh zo hlim niin an phur vanglai takin Mohun Bagan an hmachhawn dawn a, Mohun Bagan lah coach ban hlim, team an talbuai lai tak niin tun baka Mohun Bagan hmachhawn hun tha hi a awm bik kher lo maithei. Champion laiin champion an nih zia lantirna hun a ni a, Bagan in harsatna karah pawh team lian an nih zia an lantirna hun a ni bawk.
.
Team talbuai Bagan:
`Indian club hlun ber pawl Mohun Bagan hi tunah hian team talbuai mek an ni a, game sarih khelh tawhah vawi hnih chiah hnehna changin vawi li an khingpuite an draw a, vawi khat chak lo tawhin point 10 an hmu mek. Tin, an game hnuhnung berah Chennai City FC lakah an tlawm avangin an coach Sanjoy Sen chuan a hna a ban san zui a, an game hnuhnung pali ah chak an nei tawh lo. Hnehna an chan hnuhnun ber chu December 10 daih tawh kha a ni. Tun season-ah goal 10 thun tawhin goal 5 an chhuah tawh a, heng an goal khung zinga 5 hi Churchill Brothers laka an thun kha niin khami hnu khan match khata goal khat aia tam thunna an nei leh tawh lo. Chuvangin, tunah hian an talbuai mek a tih loh theih loh a, Aizawl FC tan hei hi hun tha a ni.
.
Hetih lai hian player tha tak tak nei Bagan hi zuam sual awl tak tur an ni a, tunhnaiah an form chhe deuh tawh nise player tha tak tak Sony Norde, Ansumana Kromah, Asier Dicka, teho an la nei a, an khelh that ni a nih chuan goal thun an harsat lo. Hei mai bakah hian Aizawl FC player hlui Soram Poirei, Ricky Lallawmawma, Yuta Kinowaki leh Kingsley Ezeh te an nei a, an club hlui laka that chhuah an tum hauh lo ang.
.
Sawi tawh ang khan Bagan hian game sarih lai an khel tawh a, an match hmasa berah Minerva Punjab nen 1-1 in an inhnehtawk a, hei hi tun season a away game an khelh chhun niin a bak zawng chu an home-ah vek an la khel. Hemi hnu hian Kolkata derby-ah East Bengal chu sikhat faiin an hneh a, Churchill Brothers lakah singa faia chak zui lehin game thumah point sarih nen, goal sarih thun tawh nen dinhmun tha takah an ding hman a, mahse, an game dang pali-ah point thum chiah an hmuh belh. Shillong Lajong leh Indian Arrows chu 1-1 a inhnehtawk puiin Neroca nen goal an inpe lo a, Chennai City FC lakah 2-1 in an tlawm zui bawk.
.
Hetiang hi an dinhmun nimah se sawi tawh angin an player te hi an tha a, an khelmualah champion lai hneh hi an chak dawn. Inkhel hmuhnawm beisei a fuh ang.
.
Dicka – 4 goals, 1 assist.
Kromah – 2 goals, 2 assists.
Norde – 2 goals, 1 assist.
.
Mka tel loin Aizawl FC:
Aizawl FC in an lallukhum humhim tuma an beihna kawnga player pawimawh chu H. Lalmuankima a ni. Ani hian tun season-ah tha taka khelin game pawimawhah team innghahna a ni. Amaherawhchu, Gokulam lakah tha taka a khelh zawh hnu lawkah ISL club FC Goa in an la ta daih mai. Tun hi Mka tello a an game hmasa ber tur a ni a, engtin nge an khelh chhuah ang a, an chhiat phah ang nge an that pui zawk ang tihte chu en chakawm a ni a, a thlaktu tur an nei tha reng em tih pawh en chakawm tak a ni.
.
Aizawl hian tun season-ah game 5 khel tawhin vawi 3 an chak tawh a, vawi 1 chak lo in vawi 1 an khingpuite an draw. Tunah hian point 10 neiin Mohun Bagan nen hian an point hmuh zat a inang chiah a, goal 7 thun tawhin goal 4 an chhuah tawh thung.
.
Anni hian East Bengal nen 2-2 a an inhnehtawk hnuah Churchill Brothers chu sikhat faiin an hneh a, Lajong lakah sikhat faia tlawmin Minerva Punjab leh Gokulam Kerela chu 2-1 leh 2-0 in an hneh bawk. Tunah hian point thum an hmu thei a nih chuan an chunga awmte an umna kawngah kawngro a su hle dawn a, team dang tan thuchah pawimawh tak an thawn chhuak thei ang.
.
Engtikah nge?
He inkhel hi naktuk tlai dar 2 hian Starsports 2/2HD in live in an pechhuak dawn a, chawhnu inkhawm banah thingpui in pahin a en theih tawk vel chiah ang.