AIZAWL FC – IN MUMBAI FC TLAWH DAWN

Hero I-League 2016-17 khelh mekah naktuk zan hian Mumbai khawpuia Cooperage Ground – ah Aizawl FC an leng dawn a, zan dar 7:05 ah Mumbai FC an hmachhawn ang. He inkhel hi TEN2 ah ‘live’ a pek chhuah a ni ang.

Hmasawn AFC

Aizawl FC in I-League khelh thumah point 7 an hmu a, team sawm awmnaah palina an ni mek. Mizoram club hian Khalid Jamil an lak hnuah an duh ber ‘result’ an nei chho mek niin a lang a, tun inkhel hi an tan inkhel pawimawh a ni. Kum 7 zet Mumbai FC lo enkawl tawh Jamil hian a team hlui bakah an khelmual a hrechiang a, Mumbai FC player hlui pahnih Ashutosh Mehta leh Jayesh Rane a nei bawk. [adToAppearHere]

Season liam ta khan club pahnihte hi Cooperage Ground ah 2-2 in an inhnehtawk a, Aizawl FC hi an chak a nih chuan inkhel dang result a zirin pathumnaah an invawrhchho thei. Mahmoud Al Amna awm hnuah Aizawl FC goal nawr a na sawt a, amaherawhchu beisei phak lo striker Kamo Stephane Bayi thlak turin Jamil-a’n Mizo striker te a ring tawk lo tih a lang.

Inhliam vanga season bul tan thei lo Lalramchullova chu squad-ah a tel a, fak hlawh lo Albino Gomes hi tun season a Aizawl FC ti danglamtu pakhat a ni bawk.

 

Mumbai innghahna Kashyap

I-League a pangana ni mek Mumbai FC in khelh thumah point 6 an hmu tawh a, match hmasa pahnihah chak mahse an match hnuhnung berah Bengaluru FC in 3-0 in an sawp. Mumbai club enkawltu hi kum 50 a upa Santosh Kashyap a ni a, ani hi Indian football a tawnhriat ngah a ni.

Kashyap hian I-League team paruk zet a enkawl tawh a, an zingah hian club lian lo tak Royal Wahingdoh chu I-League ah pathumna a nihpui theih avangin fak a hlawh hle. Kashyap hian a defender pawimawh, Aizawl FC player hlui ni bawk Lalchhawnkima chu inhliam vangin a chhawr thei dawn lo a, a zawna tlawm an duh dawn loh avangin defensive game khel thin ve ve ni mahse inkhel hmuhnawm min hlui a rinawm. [adToAppearHere]

Aizawl FC squad vs Mumbai FC :

Albino Geovani Gomes, Zothanmawia, Lalruatthara
Lalrinzuala Khiangte, Lalramchullova, Kingsley Obumneme Eze, Zohmingliana Ralte, Lalthakima, H Lalbiakthanga, Lalnuntluanga, Mahmoud Al Amna, Ashutosh Mehta, Jayesh Rane, Laldanmawia Ralte, Alfred Kemah Jarya, Albert Zohmingmawia, Lalmuankima, William Lalnunfela
Kamo Stephane Bayi, Lalnunpuia Tlau

Inkhel dangah tlai dar 4:30 ah champion tum Kingfisher East Bengal in Bengaluru FC an mikhual dawn a, table a pakhatna leh pathumna inthlauhna hi point thum chauh a nih avangin he inkhel hi champion leh champion loh hriltu pawimawh tak a ni thei. East Bengal hian an match hmasa bera point thum an hlawhchhuah zawh loh hnuin an insiamtha a, khelh thumah point 7 an nei mek.

Kolkata khawpuiah Bengaluru hian Sena Ralte, Malsawmzuala leh Daniel Lalhlimpuia te an hruai a, khualmuala an inlan hmasak ber tur a nih avangin an tan fiahna pawimawh a ni ang.

(Pic : Aizawl FC)

2 thoughts on “AIZAWL FC – IN MUMBAI FC TLAWH DAWN

  1. Pingback: how much is cialis

  2. Pingback: Generic viagra sale

Leave a Reply