Aizawl FC kulhpui Masih

Aizawl FC-in I League hmahruaitu Minerva Punjab an hneh theih nana player pawimawh Masih Saighani hi a khelh that ni chuan defender tha ni ringawt loh supporter-te tan rawn tur chi a ni.

Afghan defender hian Lungleia MPL khelh a nih atang khan Mizoram chhunga competitive football a khel tan a, MPL6-ah best defender nominee hiala thlan a nih avangin tualchhung football ngainatute tan chuan hriat loh theih loh a ni.

Lungleia a zin haw khan Masih hian, “Mizote hian ball khalh nuam an ti a, ball khalh pawh an thiam. Amaherawhchu football hi ball khalh leh chawh kual ringawt a ni lo a, positioning leh a huna ball pass chhuah theih hi a pawimawh. Hemi pahnihah hian Mizote hi an la tha tawk lo ve ve a ni,” tiin ZoFooty palaiin tualchhung football a hmuhdan chungchanga a zawhna chu chhang.

Kum 31 mi Masih hi Afghan ni mah se Germany-a sei lian a ni a, a football khelh duh dan pawh German nen a danglam lo. Ball pet a thiam ang thoin ball pawh dan a hria a, a lu a hmang thiam a, defender ni mah se goal hmaah a tim lo a, amaherawhchu feet ruk leh inches hniha sang defender hian chak lohna erawh a nei ve tho a, a che rang tawk lo hi a that lohna a ni.

Minerva nen rawh Masih chet muanna hmuh tur a awm lo a, tlarhnung atang dik takin ball a vawrh theih a, defender ni chungin ball a sem nasa hle. Vanneih tum chu ni se Masih hian minute 21-naah David Lalrinmuana freekick hi a ti goal a, referee-in a pawm lo. Inkhelh banah AFC boss Paulo Meneses chuan Masih goal khung dan chu sawisel bo a nih thu a sawi ve bawk.

AFC tantuten an ngaihnat theih nan Masih hian team tan theihtawp a chhuah tih a pholang a, a teammate ten mual leh lama harsatna an tawh pawhin chhan hman hram tumin a inrawlh hman zel a. Mipui tih lawm a thiam a, inkhelh ban thlengin mipui a ngaihsak bawk.

Minerva nen bikah chuan Masih khelh danah sawisel tur a vang a, sawiselna zawn hrim hrim chuan mual tan tlang zawngin (diagonal pass) ball pek a ching a, hei hi tihsual palh chuan mahni lama goal theihna a nih avangin football coach tam tak duh loh dan a ni.