AIZAWL FC KULHPUI RG STADIUM; AN KHELMUALAH HNEH LOH LA TAWNG LO

Hero I-League khelh mekah Aizawl FC chuan an khelmual Rajiv Gandhi Stadium-ah za-ah za an chak record an vawnghim zel a, vawiin khan an mikhual Churchill Brothers SC chu 3-1 in an hneh.

He inkhelah hian Churchill Brothers hian Liberian forward Ghanefo Ansumana Kromah chuan penalty atangin a thun hmasa a, hei hi penalty atang tho in Aizawl FC in Lalramchullova hmangin an chhanglet a, Ivorian Bayi Kamo Stephane goal leh Churchill Brothers defender Banpynkhrawnam Nongkhlaw own goal hmangin an chhu zui a ni.

He inkhela Hero of the match chu Aizawl FC Nigerian defender Kingsley Obumneme Eze chu thlan a ni.

Tute nge khel?

Aizawl FC: Albino Geovanni Gomes, KIngsley Obuneme Eze, Zohmingliana Ralte, Jayesh Rane, H. Lalmuankima (Albert Zohmingmawia 69’), Alfred Kemah Jaryan, V. Laltanpuia (Mahmoud Al Amna 46’), Lalramchullova, Brandon Vanlalremdika, Bayi Kamo Stephane (William Lalnunfela 86’), Ashutosh Mehta.

Subs: Lalawmpuia, Lalrinzuala Khiangte, Mahmoud Al Amna, Albert Zohmingmawia, Jonathan Lalrawngbawla, Lalthakima, William Lalnunfela.

Churchill Brothers SC: Naveen Kumar, Meldon D’Silva, Ghanefo Ansumana Kromah, Keenan Almeida, Adil Ahmed Khan, Anthony Anton Wolfe, Bektur Talgat Uulu, Gabriel Fernandes (Agnelo Colaco 59’), Chesterpoul Lyngdoh (Anthony De Souza 74’), Richard Costa, Banpynkhrawnam Nongkhlaw.

Subs: Priyant Kumar Singh, Surchandra Singh, Brandon Fernandes, Fulganco Cardozo, Anthony De Souza, Surabuddin Mollick, Agnelo Colaco.

Inkhel tlangpui:

Inkhel tan atangin Aizawl FC in game an thunun a, chak pawh an phu. Chtih laiin a bet zawka tang Churchill Brothers lamin goal an khung hmasa a, minute 33-ah Aizawl FC defender Zohmingliana Ralte (Zotea) chuan Anthony Anton Wolfe chu box chhungah a titlu a, referee in penalty a pe. He penalty hi sawisel hlawh thei tak tur a ni a, referee berin a pek avangin striker Kromah chuan goalkeeper dinglam kil sirah a pet lut mawi hle.

Siphur zawk Aizawl FC in game thunun chhunzawm zel mah se chawlhlawk hma in goal an khung thei lo a, chawlhlawk zawhah erawh goal thum an khung. Aizawl FC in an attack laiin box chhungah Kamo tihtluk a ni a, referee in penalty a pe lo. A hnu lawkah Ashutosh Mehta tihtluk leh niin referee in penalty pe lo mah se linesman in a lo phar avangin penalty an hlawh a, minute 62-ah Armed Veng tlangval Chullovan chiang zetin a pet lut.

Goal an thun hnuah Aizawl FC an phur thar a, minute 68-ah Aizawl FC in counter attack atanga nawrin Amna chuan Jayesh Rane a pe a, ani hian chak taka lo overlap tu Brandon Vanlalremdika pe in a cross chu lo dang mah se Jayesh bawk hian la in Kamo a pe a, chiang takin tun season a a goal khat nan a lo thun.

Sikhata hmahruai ringawt a tawk lo a, goal thun belh ngei tuma beiin minute 76-ah an hlawhtling ta nge nge a, Aizawl FC tana Mual veilam atanga Chullova cross chu Churchill Brothers defender Nongkhlaw chuan an lamah a tauh lut..

Inkhelh zawh thlengin a chungnung zawk chu Aizawl FC an ni a, goal dang lut tawh lo in 3-1 in hnehna an chang ta a ni.

Churchill Brothers talbuai zel:

I-League champion pawh lo ni tawh Churchill Brothers hi tun season-ah an talbuai tak meuh a, game riat khelhah point nga chiah an la hmu thei. An hnuaia awmte result avangin a mawngphahah an tlahniam thei bawk. Vawiin hian an defender tha Rowilson Rodrigues an chhawr theih loh an tuar a tih loh theih loh a, Fulgano Cardozo pawh squad-ah awm mah se substitute bench bak a chang pha lo.

Inkhelah pawh a bet zawk an ni deuh reng a, chutih laiin U-22 player Chesterpoul Lyngdoh a hmuhnawm in a tlanchak an hmang tangkai teuh thin hle. An foreigner tlarhma pahnihte an hlauhawmin counter attack-ah an nawr ve reng thin a,
Wolfe leh Kromah ten Aizawl FC tlarhnung thiatin goal an thun teuh hle a, Aizawl FC tlarhnung an him hram.

An goal thun hi penalty atangin a ni a, hei bak chu chance hlauhawm sawi tur an nei meuh lo.

Ruatthara awm lo mah se Chullova a awm:

Aizawl FC hian defender pawimawh Lalruatthara chu hrem vangin an chhawr thei lo a, a aiah MPL 3 best player Chullova luhtir a ni a, an tisual lo. Chullova hian goal a thun mai bakah an goal thumna kha ama ball vawrh atanga lut a ni a, goal venhim lamah a thawh hlawkin Churchill Brothers attacing tam tak a dang chat a, man of the match nih phu khawpin a khel tha a ni.

Inkhel tan atangin Aizawl FC hian game an thunun hle a, tan atanga reiloteah H. Lalmuankima (MKA) cross chu striker Kamo chuan a tlawh phak loh avangin a thun lo hlauh a, Aizawl FC hian corner kick an hmu nual a, Kamo hian penalty a hlawh ngei tura ngaih a nih laiin referee Om Prakash Thakur chuan a pe lo hlauh.

Aizawl FC tan Brandon, Jayesh leh Kamo te inkawpin goal an hlawhchhuak teuh hle a, Jayesh pet chu goal kham chungah a kal hlauh, hei bakah hian Albert chuan chance tha a hloh bawk a, a hlauhawm zawk an ni tluan a, chak zawk nih pawh an phu.

Tum dang zawng aiin Aizawl FC midfield an khel tha lo a, khel tha em em thin Alfred pawhin pass sual leh ball dawn dik loh a ngah, Jayesh pawh a tir lamah a chetha lo a, amaherawhchu, a tawp lamah erawh a thiam zia a langchhuak hle tho a nih kha.

Aizawl FC hian game riatah point 16 an hmu ta a, anmahni aia khel tlem Mohun Bagan an nihrual ta chiah a, Point 19 hmu East Bengal chiah an phak tawh lo a ni.

Enge hmabak?

Aizawl FC hian ni 15-ah Bengaluru FC an hmachhawn dawn a, Churchill Brothers in ni 14-ah Chennai City FC an hmachhawn ve thung ang.

Zofooty Statistics:
Aizawl FC 3-1 Churchill Brothers
59% Ball Possession 41%
18 (5) Shots 5 (1)
280 (232) Pass (Completed) 161 (120)
12 Fouls 9
1 Offside 1
5 Corner Kick 1
0 Yellow Cards 3
0 Red Cards 0
.
Powered by Darchiauva Hardware, Mission Veng

Posted in Aizawl Football Club, Ramchhung, Tualchhung.

Leave a Reply

Or