Vawiinah Mizoram Premier League (MPL) playoff khelh zawh a ni a. A.R Lammual leh Rajiv Gandhi Stadium, Mualpui-ah khelh a ni a. Rajiv Gandhi Stadium-a inkhel hmasa zawkah Aizawl FC (AFC) chuan 2-0 in Chanmari West FC an hneh a. AFC tana goal thuntute hi Zoremtluanga leh Lalrammawia te an ni. Chanmari FC leh Reitlang FC te nen point 14 theuh hmuin Goal Difference nei tha ber leh Goal forward nei hnem ber AFC hi an champion ta a ni.

Inkhelh hma chanchin
Chanmari FC chiah lut tawh sa an awm a. AFC, Reitlang, Kanan FC leh RS Annexe te’n hmunawl pathum la awm an inchuh a ni a. AFC, Reitlang leh Kanan FC hian point 11 theuh an hmu a. Annexe erawhin point 9 an hmu thung a. Lut thei vek leh tla thei vek annih avangin ngaihven a hlawh hle a ni. AFC, Reitlang leh Kanan FC te hi chu an chak chuan an tlang a. RS Annexe erawh chak mah se club dang pathum te chak loh leh draw-ah an innghat a ni.

AFC lamah hian double yellow card vangin Captain leh an striker tha Sawmtea leh defender pawimawh Rikcy-a a khel thei lova. Tin, players pawimawh dang pahnih Michael-a leh Johny-a te pawh hrem an nih avangin an khel thei lova. Mahse players an nei tha hrim hrim a, heng players awm lo te thlaktu tur hi an la nei nual tho a ni. Vice Captain Zirtea hmel erawh kan hmu leh thung a.

Chanmari West FC lam erawh tla tawh leh beisei nei tawh lo ni mah se chak loh an tum lo hle a. An players tha ber ber te’n an rawn khel thova, AFC laka tlawm an duh bik lo a ni. Hmatawngah Top scorer nilai Valtea bawk rawn dah lehin Mahuma’n midfield a rawn ho leh a.

First half : AFC in goal khat an thun a, penalty an missed bawk !
Mi tam tak chuan Chanmari West FC te hian beisei an nei tawh lova, chuvang chuan a hmuhnawm lovang, AFC an chak chiang taw hang an ti a. Mahse inkhel an tan a, rin ang leh beisei ang a ni hauh lo mai. Chanmari West FC lam an tang a, point hlauh an duh bik lova, an fight tak zet a ni. AFC lam hian match tin an squad an siksawi nasa a, vawiin squad an la siksawi a ni.

An innawr tawn a, game pawh a tang a. AFC lam hian penalty an hmu a. Striker Papuia’n ball khalh lutin keeper a bum a, a pet goal dawn emaw tih laiin Chanmari West FC defender-in a rawn titlu a, penalty an hmu ta a ni. Match hmasaa penalty pet goal-tu Francis-a bawk rawn pen chhuak lehin Chanmari West Keeper Nunthara’n a lo saved a ni. AFC lamin penalty an thelh hnu hian an game a chhe deuhvn a hriat a, players te an tang ulh a ang.

Midfield-ah an intum tawk a, chance mumal hmuh tur a awm lo. Minute 37-ah AFC lamin goal hmahruai an thun a. Vawiina AFC Captain Zirtea’n ball a khalh a, Zorema tan ball a pe lut a, Zorema hian a lo pet goal a ni. Chanmari West FC lamin an nawr let a. Pet goal theihna chance tha tak an nei ve nghal a. Striker Valtea chuan ball la lutin a pet goal dawn emaw tih laiin post a pet per a, Chanmari West FC lam hian an ui khawp ang le. Goal dang a luh belh tawh lova, 1-0 in first half a tawp a ni.

Second half : MPL-ah AFC an in pet tling !
Chanmari West FC lam hian bul an tan tha zawk a, an nawr nghal a, half chance pawh an hmu a ni. Mahse hun rei a ni lova, AFC lamin game an thunun chho leh tan a. Half chance pawh an hmu zeuh zeuh a ni.

Midfield lamah an inhnehtawk a, Chanmari West midfielder te an thawkrim a, an siphurh sut an tum a, an fakawm hle a ni. AFC lam hian an la chesual thei tih an hria a, mumal takin game an khel a. Rin aiin Chanmari West FC lam hian an khel tha a ni. Chanmari West FC midfielder Mahuma’n freekick tha tak a pet a, AFC keeper-in a lo dang out hlauh a, corner an hmu a.

Corner atang Chanmari West FC lam hian an ti goal tep a. Far post lamah ball a lut thelh a ni. AFC lamin an nawr chhunzawm a. Zirtea’n ball tha tak tlan luh puiin Zuala a pass a, Zuala shot hi defender te’n an lo dang per a, chumi hnuah shot lehin keeper-in a lo dang per leh bawk a ni.

Goal dang a lut tawh dawn lo emaw tih laiin AFC lamin goal an thun leh a. Zorema’n through ball tha tak a hmu a, Chanmari West FC keeper a rawn ‘up’ a, mahse ball a dan thelh a, Zorema’n ball la lehin bench atanga rawn lut Rammawia’n a lo pet goal a ni. Hun a tawp a, 2-0 in AFC an chak ta a ni.

AFC Champion theih dan
Aizawl FC, Reitlang FC leh Chanmari FC te hian point 14 theuh an hmu a. Hei vang hian Goal difference en a ni a. Chanmari FC aiin Aizawl FC leh Reitlang FC te hian Goal Difference an nei tha zawk a. Mahse AFC leh Reitlang FC te hi an Goal Difference a inang a, Goal Forward en leh a ni a. Goal Forward nei tha zawk AFC te hi an champion ta a ni.

Tlangkawmna
AFC lam hian players an nei tha a, bul pawh an tan tha a. Mahse match 2 an chak hnuah an match thumna atanga an che chhia a, match 3 ah point 2 chiah an hmu a ni. Mahse players neitha nge nge, a tawp lamah an rawn par vul leh a ni. AFC hruaitute leh players te inpekna a fakawm a. An players tha te an suspend a, Club an hrem bawk a, hei zawng zawng karah hian an rawn comeback leh thei a, an fakawm tak zet zet a ni. Atirah champion an tum a, a hnuah an talbuai a, champion tum atang qualify tum-ah an tla thla a, mahse a tawpah an rawn champion leh thei a, players leh staff te inpekna a fakawm hle.

Chanmari West FC hian players tha an nei a, mahse hun tepter taka playoff rawn khel annih avangin an tuar a tih theih. Inpuahchah tha deuh se chuan an qualify ngei ang le. An chak loh dan enin an vanduai thei a. An tumpui te khel tawk viau siin an chak loh ziah zel a ni. Nakum lamah ropui taka MPL khel thei tura rawn ‘comeback’ an tum hle a ni.

Match Statistics
Aizawl FC 2-0 Chanmari West
(Zoremtluanga 37′, R. Lalrammawia 90′)

Table