February thlaa I-League Qualifying Round khel tura inpuahchah mek Aizawl Football Club official website www.aizawlfc.com chu vawiin khan Transport Minister Pu PC Zoram Sangliana, Aizawl FC president hlui ni bawk chuan Aizawl press club ah a tlangzarh. He website hi Aizawl FC in tangkai taka an hman theihnan leh football tihhmasawnna atan kawngka pawimawh tak ni turin Minister chuan duhsakna a hlan nghal a ni. www.aizawlfc.com ah hian Aizawl FC chanchin kimchang leh Club thuthar ber berte hmuh theihin a awm a, he website kaltlang hian hmun hla zawk atang pawhin Club member ni duhte tan pawh membership fee a pek theih a, donation pekna kawng pawh hawn a ni.

Website hawnna inkhawm kaihruaitu Pu Robert Romawia Royte, president chuan Aizawl FC hmalak mekna leh hmachhawp hrang hrangte a tarlang a. Senior Team, Under 14, Under 17 leh Under 19 team an enkawl mek thu te, an vai hian Aizawl a football khelmual hrang hrangah, AFC ‘C’ License nei coach te leh NIS Diploma neite hnuaiah training pek an nih thu sawiin Lungleng leh Reiek ah Academy mumal tak din tuma hma an lak dan a sawi bawk.

Aizawl FC hian February thla tir atang khian I-League Qualifying round a khel dawn a, Group I ah team dang 6 te nen awmin, Silchar ah an khel dawn a ni. He qualifying round hi a paltlang thei a nih chuan I-League 2012-2013 Season a khel ve thei ang.

Aizawl FC thuchhuahin a tarlan danin, India team leh i-league club engemawzatah Mizote chu player pawimawh tak tak an ni mek a, hetihlai hian Mizo mipui tam berin ‘kan club’ tih fak tur kan la nei ve lo. Mizoten i-league a ‘kan club’ kan tih theih tur din tumin hma kan la mek a ni, an ti a. Hemi kawnga Aizawl FC puitu hrang hrangte hnenah lawmthu an sawi nghal a. Home Minister Pu R. Lalzirliana, Sports Minister Pu Zodintluanga, Mizoram State Sports Council leh Directorate of Sports & Youth Services, 26th Assam Rifles, Mizoram Football Association, Aizawl North Zone Football Association, SSA Aizawl District, Mizoram Police leh Sports & Youth Services Football Team hnenah an puihna tam tak avangin lawmthu an sawi bawk.

Website tlangzarh inkhawmah hian Aizawl FC president hlui leh Club patron ni mek Pu KS Thanga, Parliamentary Secretary pawhin thu sawiin khawvela infiamna lar ber football hi hnam anga kan tuichilh a pawimawh thu leh tan tlan a ngaihzia sawi a, Mizo mipui zawng zawngin Aizawl FC chu mahni club anga en tur leh thlawp turin ngenna a siam a ni.

Source:Joszef Ralte Kawlni