AJAX RAWLTHAR RUAL NGE UNITED PLAYER MAN TO RUAL? – Lawmkima Hmar

(Thursday, 25 May 2017)
12:15am -Ajax vs Manchester United (Sony Six SD &HD, TEN 2)
Venue: Friends Arena, Stockholm, Sweden
Capacity : 50,653

Mizopa hriatthiam dana zanin zanlai dar 12:15 hian Ajax rawlthar rual leh Manchester United star player rual ten UEFA Europa League final an khel dawn a, champion team hian final a an chak zawk vang ringawtin €6,500,000 an hlawh ang a, season tharah Champions League an khelh dawn bawk avangin a nep thei lova, hmaih chi a ni lo vang.

Jose Mourinho pawlte hi Premier League-ah 6-na niin an tan Champions League khelh theihna awm chhun chu zanina champion a ni mai, kawng dang a awm lo. Chelsea, Tottenham leh Manchester City te zawm thei tak maw?.

A hmasain sunna hun : Thawhtan zan khan Manchester Arena-ah Arena-ah US singer Ariana Grande chuan concert neiin vanduaithlak takin thihchilh bomb a puak a, naupang kum 8 mi telin mi 22 an thi a nih kha. Vanduaina tawkte sunna hun hi inkhelh hmain neih a ni dawn a, Manchester United player ten armband dum an hreng bawk ang.

Ajax hi tunhma deuh 1985-1995 chhung vel kha chuan Europe a club lian leh tha an ni thin a, amaherawhchu an player thate an hum theih loh avangin kum 1996 hnu lamah European final an la khel lo. United hi an tlawm a nih chuan £50m chuang sum an hloh ang.

The Ajax Way : Ajax coach Peter Bosz chuan an khelh dan phung “the Ajax way” an tih mai, Dutch football hmuhnawm chhan attacking football fir hlakin, rawlthar tha za rual hmanga rang zek zawk, tang et awtin Stockholm-ah United hi an hmachhawn dawn tih a sawi a, Manchester club tan hmunawl leh chawlh pek tlem an tum viau.

Bosz chuan: ” Manchester United kan hneh theih dan awm chhun chu kan game dik tak kan khelh chhuah chauhin a ni ang, hetiang hian season tluanin kan khel a, kan khel zel ang.

Ajax in a zawng zawnga an nawr thin chungchang sawi chhunzawmin Bosz chuan: “Kan nawr hlawhtlin leh hlawhtlin loh chu an khawng leh khawng lohvah a innghat ve bawk ang. Khelh dan phung inang lo tak (attacking & defensive) a khelh thin kan ni a, zaninah tunge chungnung zawk tih kan hre mai ang,” a ti.

Ajax hian sum lama harsatna an neih avangin khawvel hmun hrang hranga rawlthar la khawmin team an din a, tun season-ah an naupang zual. Eredivisie-ah record thar siamin league game hnuhnung bera Willem II an hneh tuma an first XI te kum chawhrual kha kum 20 leh ni 139 lek a ni! Ducth league-ah an champion zo lo va, Feyenoord in an match hnuhnung bera hnehna an chan avangin champion lallukhum an khum khalh a nih kha.

Bosz chuan zam rual lek an nih chungchangah dawt sawi duh lovin : “A zam ang em? Zam miah lo an awm chuan an pangngai lo zawk tihna a ni ang a, doctor hnena thawn hial ka duh zawk ang!

“Han zam lohna chi ziazang a ni hlei nem. Kum naupang te te an ni a, tha taka an khelh theih na’n kan pui ang. Semi-final a Lyon kan hneh atang khan final chiah hi kan hawi tawh,” a ti.

Bailly a inlan thei dawn lo: United hian an defender khawng rum rut Eric Bailly chu Celta Vigo laka red card a chawi avang khan an chhawr thei dawn lova, a ni bakah hian Sweden forward Zlatan Ibrahimovic an chhawr thei lo bawk ang.

Zlatan hi zanina an inkhelhna tur Friends Arena hawn hnua inkhel hmasa ber kum 2012 a England lama goal 4 thuntu kha a ni. Mual chhungah hmu dawn lo mahila mual pawnah a lim tal hmuh tur a awm alawm.

Defender Luke Shaw leh Marcos Rojo bakah winger Ashley Young te pawh chhawr theih an ni dawn lo.

Dutch Eredivisie a 2-na Ajax lamah left-back Nick Viergever chu hrem lai niina khel thei dawn lova, an first XI zinga kum 25 tling awm chhun tur nia rin Lasse erawh a chhawr theih tawh ang.

Fans lam : Ticket hi final khel tur team 2 fans tan 9,500 ve ve siam niin a bak chu vantlang, local organisers, national associations, commercial partners, broadcasters leh corporate hospitality te tan dah a ni.

United an hah lu deuh em? : Zanina an match hi United tan tun season an game 64-na a ni dawn a, vawi 56 kheltu Ajax aiin match 8 in an khel tam zawk ang.
Mourinho chuan match an ngah lutuk hi March thla daih khan a lo sawisel tawh nghe nghe a, Premier League-ah phei chuan player naupang zawk a chhawr nasat phah hle.

World-record fee a United in an lakluh Paul Pogba hi kum 2017 chhung bikah chuan team 2 player zinga inkhel tam ber a ni a, minute 2,087 khel tawhin a dawttu Ajax captain Davy Klaasen hian 2,079 minute a khel tawh. Kumin bika an khelh tam lam (rei zawng) lakkhawmah team 2 atangin a sang 10 zingah player 5 ve ve an awm.

2016-17 season pumpuiah erawh Ajax captain Davy Klaasen hian a khel tam ber (rei ber) a, minute 4,319 khel tawhin a dawttu Pogba chuan minute 4,262 a khel tawh thung.

United hian match khel tam zawk mah se an player te erawhin a pumpuia khelh tam lamah Ajax player an phak lova, a khel rei top 10-ah hian Ajax player 6 an tel. Mourinho phun mah se a player rinrawlte an hah lo zawk a tih ngam.

Sulhnu ropui : Man. United hi England club zinga European Cup la hmasa ber niin kum 1968 khan Celtic hnehin an champion, tichuan kum 1999 leh 2008 khan an lakbelh leh.

Hei bakah hian kum 1991 khan tuna awm tawh lo European Cup Winners’ Cup lain Europe a an lak loh awm chhun Uefa Cup thlaktu Europa League lakna remchang an nei.

Ajax hi dahhniam chi an ni lo, Europe a inelna hrang hrang 3 la thei club zingah an tel pha. An tih ang tih thei dang chu Chelsea, Juventus leh Bayern Munich te chiah an ni. An vanglai erawh a liamna a rei tawh thung a, kum 1995 khan Champions League final-ah Patrick Kluivert-a goal hmangin AC Milan an hneh. Zaninah a fapa Justin a inlan hmel

Intawn tawhna: Tun tum hi Europe inelna lian thama Dutch leh English club vawi 3 an inhmachhawnna tur chiah niin kum 1974 khan Tottenham chuan 4-2 in Feyenoord an hneh lova,kum 1981 khan Sir Bobby Robson-a enkawl Ipswich chuan aggregate 5-4 in AZ Alkmaar an lo hneh tawh bawk.

Chhinchhiah atan :
*UEFA Cup/Europa League final hnuhnung 16 zinga 2 chiah penalty shootout hmanga chinfel a ni a, heng zinga 10-ah hian minute 90 hnuah chakna goal a lut. Match 4 erawh extra time-ah chinfel a ni thung.

* Europa League final hnuhnung 2-ah te khan goal 9 lawih a lut a, match khata goal 4.5 lut ang ve ve ani.

* Jose Mourinho hian manager a nih hnuah Ajax vawi 6 a hmachhawnah hnehna a chang vek, heng hi Champions League-ah niin Real Madrid a enkawl laia thleng vek a ni!

*Ajax forward Amin Younes hi tun season Europa League a success dribble ngah ber niin vawi 73 hlawhtling tamkin ball a khalh tawh a, vawi 37 neitu Paul Pogba leh vawi 31 neitu Ajax in Chelsea atanga an hawh mek striker Bertrand Traore ten an dawt.