Mi tam takin khawvela footballer tha bera an la sawi Diego Maradona chu a club enkawl mek Al Wasl chuan Manager nihna atang an ban. Al Wasl hian nikum May thla khan beisei sang tak nen Maradona hi Manager atan an la a mahse an tum ram a thlenpui thei ta lova, League-ah pariatna a nih pui a. Tin, point 29 ngawtin champion team Al Ain an pha lo bawk. Kum khat dang contract a la nei nachungin a hna a chhunzawm tawh dawn lo a ni.

Al Wasl hi United Arab Emirates(UAE) club niin 1960-a din tawh kha a ni a. Al-Ain tih lovah chuan UAE Pro-League (top division)-a record nei tha ber an ni. 2007 kha an champion hnuhnun berna niin tunhnaiah champion leh tumin tan an la thar a, nikum khan Maradona hi beiseina sang tak nen an la thar a ni.

Maradona hi player ang chuan mi ropui leh khawvela tha ber anga sawi a ni a mahse manager ang chuan a ropui em em lo thung. Maradona hian Al Wasl a enkawl hma hian 2008 atang khan Argentina Football team a enkawl a, World Cup 2010 khan Quarter-final a thlenpui a mahse Germany lakah an mualpho a, 4-0 ngawtin an chak lo anih kha.

Kum 51-a upa Maradona hian hian kum khatah 3.5 million Euro a hlawh a. Tin, Private Jet a kawl bawk a ni. Season khat chhung a enkawl a, trophy a lakpui lo mai nilovin top 3 tak ngial pawh a thlenpui thei lova, club thuneitute an lungawi lo hle a ni. Club chuan thuchhuah siamin “Board director te’n ngun taka technical staff te hna leh an kalzel dan tur an ngaihtuah hnuah Manager Diego Maradona chu ban a tha zawkin an hria a, tun atang chuan a hna a chelh chhunzawm thei tawh lovang” tiin thuchhuah an siam a ni.

Mardona hian Al Wasl a enkawl chhung hian hming lang thama han larpui na em em a nei lova. A neichhun chu kumin March thlaa Al Shabab nen an inkhelh tuma Al Shabab fans te’n a nupui an lo auh nawmnah (chhaih) avanga a thinrimin fans te a han pan kha a ni mai awm e. A en leh duh tan HETAH hian  a en leh theih ang.