ALLEGRI: THE MASTER TACTICIAN – Zosangliana Khawlhring

Estimated read time 6 min read

Italian club Juventus enkawltu Massmilliano Allegri hi tunhnaia a phu tawk ang fakna dawng lo berte zing ami a ni ang em aw a tih theih a, tactician tha a nih zia hi sawi tur tam tak a awm awm e. A hlawhtlinna kan hria a, a phena inthup ngaihnawm tak si rawn ziah kan tum dawn a ni.
.
Allegri hian 4-2-3-1 a hmang uar viau mai a, 4-2-3-1 ah hian kalphung tam tak a awm a, Allegri hman thin hman dan pawh hi danglam viau chu a tam chuang lo. Mahse, player position thlak kual hrep in striker hlir a khel thin Mandzukic chu Inverted Winger ah a khelh tir bik hi a ni. Cuadrado chu traditional winger angin a khelh tir thin. Juventus hian No 10 role dik tak an nei lova, mahse, Dybala hian deep attacker angin a khel mai thin. Double pivot ah Pjanic leh Khedira te kan hmu ngun. Tlem danglam leh na chu defensive midfielder pahnih te hian tun a an khelhna ah hian tawnhriat an ngah vak bik lova, Pjanic bik hi an ramah chuan No 10 role ah a khel tlangpui a ni. Roma a khelh pawhin attacking midfielder ang deuh hlirin a khel tlat. Khedira hian double pivot ang hian a khel ngai bik lova, midfielder pa thum ah box to box anga khel thin a ni. Mahse, hetah chuan khawvela midfielder tha ber ang mai in an khel chhuak tlat a ni. An pahnih hian Dybala an dawm a, an defender te an veng hneh leh em em si hi mahni khelh than-na a khel lo si hian an zei em em tlat a ni.
.
Seria A ah chuan 4-2-3-1 hmang lartu leh midang ten an entawn ber kha chu Mourinho a ni ve tlat. 2009-10 season khan triple champion a nih theih nan 4-2-3-1 in game a plan thin. Eto’o winger a hmang thin ang hian Allegri hian Mandzukic hi a hmang ve leh a ni. 4-2-3-1 ve ve a ni na a, Mourinho tihdan a zir tia kan sawi chuan a fair hlawl bik lo ang. Team dangin an tih ve ngai loh striker a khel thin kha attacking na zawk khelh theih nan winger a hman a nih dan erawh a in ang chiah. Danglamna zawng ta ila, Mourinho chuan ball a chan loh veleh 4-5-1 ah a let nghal vat a, Allegri chuan 4-4-2 in defensive a khelh tir thin. Lehlam pawl ten an nawr beh hian counter attack an neih theih nan striker pa khat chauhin ball chang loin left and right wing ah ball a chang kawp thin. Defender tan pawh striker pakhat chauh ven ai chuan winger pa hnih ven chu a hautak zawk a, lehlam pawl tan defence lawn ve vak a rem loh phah fo thin.
.
Allegri game plan-ah hian danglam tak tak hmuh tur a awm fo thin a, center midfielder pali hman a, 4-3-1-2 te rawn chhawpchhuak in khawvelah a mah chauh in ami hmang awm le tih mai tur te hian game plan a siam thin. A chang leh striker pa li hmangin 4-2-3-1, three signature center back, 3-5-2 formation te pawh kan hmu fo awm e. Eng formation pawh rawn hmang se defensive a khelh hunah 4-4-2 in a let leh ngei ngei thin. 4-4-2 formation hi chu thil thar a ni lem lova, a khelhdan awlsam leh khelh nuam tak a ni. Attacking khelh nan tha tawk tawh lo angin lang mah se defensive khelh nan chuan hman tlak tak a ni.

Defensive khelh dan hi zir chiang dawn ta i la, thil pawimawh lian tak pahnih tih thin an nei a, pakhatna-ah chuan lehlam pawl area-ah ball a hloh chuan striker ten counter press an nei vat thin. Counter press an neih vat thin avangin lehlam pawl tan attacking rang tak an khel tur a tih muan phah a ni. Chutah an hlawhchham a nih chuan Cuadrado leh Mandzukic te chuan ball awmna lam pan nghal loin, full back Sandro leh Alves te pui turin an chhuk vat nghal a, striker ten counter press an neih chungin Khedira lawn chhoin ball dan a tum a, Khedira pel a rawn tlang reng reng chu Pjanic in a lo veng nghal chawt zel a ni.

.
Winger pahnihin defender bul an thlen tawh chuan a lai lamah an rawn lut chho leh a, an tlan kual nuaih nuaih a ni ber ta mai ang chu, mahse, 4-4-2 angin an inrem leh nghal chu a ni mai. Allegri defensive khelh pui dan en hi chuan Atletico Madrid a Diego Simeone tihdan a zir emaw tih theih a ni leh a, danglamna tlem awm chu Simeone chuan 4-4-2 anga defense a rem tawh chuan rilru pau khauh takin ball chan tum hian a um tir ta chiam thin a, mahse Allegri chuan um nghek ai chuan awmze nei tak a inrem khawm hnuah dan chah a tum thin a ni.
.
Allegri formation kan en thin chuan Mandzukic hi inverted winger anga hman a nih hian a mak ve duh deuh thin a, mahse Mourinho pawhin Eto’o pawh a lo hman ve thin tawh avangin a ngaihthiam theih. Eto’o pawh kha a khelh ngai miah lohna winger anga hman ani a, mahse a tlan chak, ball a thiam, a thahruiin a tlin bawk a, cross ball lamah harsatna a nei deuh tih loh chu sawisel vak na tur a awm lova, rilru a pek leh pek loh ni hian game-ah a hriat deuh e tih mai chauh a ni. Mandzukic chu Eto’o te angin speed a tha lova, ball a thiam hek lo, player bum kual zung zung lamah pawh chhuanawm tak a ni hran lova, mahse winger anga hmana nih chhan hi winger position a khel chung siin striker anga hman a duh vang a ni thei ngei ang, a pawimawh hunah goal a thun chat chat thin tlat.
.
A tawpna atan double pivot hi. Attacking play dawn hunah ball progression atan hmun pawimawh, defensive khelh dawn in hmun pawimawh tak a ni chho zel a, mahse la khel thang lo hlir a dah leh tlat mai hi a mak a ni. In thiamsa theihnghilh vek u la, ka zirtir ang chiahin in khel dawn nia, tih ni awm takin an khel tha dun thin hle a, Marchisio meuh pawh an nek chhuak chu a nih ber hi. Khedira hi open play-ah a tangkai em em a, Pjanic hi set play-ah a tangkai leh bawk a ni. A dangah hi chuan game tempo a zir leh striker te skill san ang hi a ni mai a, Higuain hi striker atan a tha tawk a, Dybala hi mipui mit fukna zawk chu a ni leh lawi si. Anni pahnih inkawp hian attacking play dawnah Dybala hi a tangkai em em a, ball lo changin goal a lo thun zat zat thin. Higuain lah a lo tangkai leh em em bawk nen. An pahnih inkarah inerna a awm lova, a hnung, a lai leh a hma chu balance nalh takin Allegri hian team a din chhuak thei a ni.

C Tlanthianghlima

Football tui ve tak

You May Also Like

More From Author

3Comments

Add yours

+ Leave a Comment