Bajaj Allianz huaihawt Allianz Junior Football Camp 2011 atangin Mizo naupang palite chu German club lian Bayern Munich hnuaia football khelh zir thei turin thlan chhuah an ni. Munich an thlen theihna tura an kalkawng erawh kawng awlsam a ni dawn hauh lova, state dang atanga anni ang thova thlan chhuah ve te nen Kolkata ah selection trial an la hmachhawn leh dawn a ni. Mizoram atanga thlan chhuahte chu 1) Lalmawizuala, Chhinga Veng, Govt. Chaltlang HS; 2) Davis Lalchhuanawma, Salem Veng, KV Multipurpose School; 3) Zarzokima, Dawrpui Vengthar, Modern HSS; 4) Vanlalruata, Aizawl Venglai, Govt. Republic HSS te an ni.

Allianz Junior Football Camp 2011 ah hian Aizawl khawpui chhunga High School hrang hrang atangin zirlai 300 chuang an tel a, chuta tang chuan heng zirlai 4 te hi thlan chhuah an ni.

Heng naupang talent nei thate thlan chhuah hna hi Bajaj Allianz chuan Mizo Football Management Group (MFMG) te kutah a dah a; anni hian an inkhelh tir bakah, an thiamna leh theihna hrang hrang hriat tumin kawng hrang hrangin an test a, chumi hnuah heng zirlai 4 te hi an thlang chhuak ta a ni.

German football club lian Bayern Munich hi Allianz nen an thawk dun a, an khelmual changkang tak Munich khawpuia mi pawh Allianz Arena an ti a, Allianz hovin India rama an thawhpui Insurance company Bajaj Allianz hian football a talent nei tha te thurchhuah hna an lo thawk ve a ni. An zarah Mizo naupang palite hi India ram atanga Munich pan tur mi 6 zingah tel ve thei tak ang maw?