AN BU ZAWLAH ARSENAL CHIN PHARIN AN AWM – Lawmkima Hmar

Estimated read time 3 min read
Manchester City chuan Carabao Cup final-a 3-0 a an nghaisak hnu Arsenal chu an himna kulhpui Emirates Stadium-ah luhchilhin an nghaisa nawn leh a, team chhe zawk tan mahni mualah pawh himna a awm tak tak lo tih an lantir.

Carabao Cup final-a sawisel hlawh Arsenal in hma sawn hlekin City keeper Ederson an tihțhaih fo va, City erawhin tihțhaih lovin an sa duh tak an hap chat chat a, goal thum thun turin hun remchang vawi thum bak an mamawh lo.

Arsenal hmatawngten hmalam panin City tlarhnung timangang țhin mahse, City tlarhmate lakah Gunner defence in chau rau ek an thai avangin hmalam chauha hmasawnin awmzia a nei lo.

Emirates Stadium ruak huaiah hian minute 15-naah German winger Leroy Sane chuan Arsenal player 4 a chin phar hnuah Bernardo Silva a pe a, ani hian Gunner defender pakhat a bum hnuah Petr Cech-a man phak lohvin a kangin goal kilah changkang takin a thun.

Sane a khelțhat chhunzawm zel a, Arsenal defender pahnih bum kuala fing taka ball la chhuakin Aguero pein Argentine hian Silva ropui zawk David Silva tan pein Spanish midfielder hian Gunner defender pahnih kara la chhuakin lawng pil mek Arsenal lamah an goal hnihna a thun.

Hun tam a liam lo, Aaron Ramsey leh Granit Xhaka ten City keeper an tihțhaih leh hnuah City rawn dawkchhuak leh thutin khel țha tak Sane chuan an goal thumna a thun.

Hei hi Arsenal in Premier League match an muala an khel țuma chawlhlawk hmaa goal thum an chhuah hmasak ber țum a ni.

Arsenal hian nawr let chiam mahse Mkhitaryan leh Ramsey te pet chu uiawm takin sarah a zâm ral a, City erawhin hemi chinah hian Arsenal goal zawna vawi 6 an pet hnuhnung ațangin goal 6 an thun ta.

Premier League-a ticket to ber Arsenal khelh danah an fan te an lungawi lo va, first half tawp rualin tihel na’n an ‘boo’ hum hum.

Chawlhlawk hnuah Mkhitaryan chuan Otamendi lakah penalty hlawhchhuakin, a penalty pet hnuhnung 3 zinga 2 a dinglama pettu Aubameyang chuan a ding lamah bawk petin Ederson chuan chiang takin a lo dansak a, City hian penalty an chawi hnuhnung 19 zinga 11 zet an dansak ta chiah a ni.

Ball semtu țha nei lo Arsenal defence leh midfield inkara awl zau tak awm țhin chu a zau ngaiin a la zau reng a, City forward ten pressure an pek reng theih avanga Gunner tlarhnung talbuai țhin pawh an la buai chhunawm zel.

Heti hian league leader Manchester City leh Arsenal te hi point 30 zetin an inthlau ta a, 6-naa țhuthmun rem mek Gunner hian North London club ve tho Tottenham chu point 10 laiin an phak tawh lo bawk a, an tan Europa League-a champion a, Champions League khelh chu kawng awlsam zawk a ni tawh dawnin a lang.

Arsenal 0-3 Manchester City (FT) 
Bernardo Silva 15′, David Silva 28′, Leroy Sane 33′

C Tlanthianghlima

Football tui ve tak

You May Also Like

More From Author

3Comments

Add yours

+ Leave a Comment