“India mite hi top flight football – ah hmuh tur kan tam lo hle. Doctor emaw engineer emaw hnadang thawk chu India mi hi kan tam ve hle a, mahse ka hna ang thawk hi chu an vang pharh mai. Chelsea chhungkua a tel hi Indian ka nihna zawnah pawh vannei ka inti khawp mai,” tiin Vinay Menon chuan kumin Champions League – a Chelsea an champion hnu lawk khan a sawi.
Tunge Menon ?
Chelsea – a kum 2009 atanga Wellness Consultant hna thawk tawh Vinay Menon hi Kerala mi a ni a, Calicut University atangin physical education – ah degree a neih bakah Pondicherry University atangin M.Phil a zo leh. Police officer nih chak hle mahse hun remchang a hmu thei mai lo a,”Taksa hriselna leh exercise chungchangah khawlaia naupang tei mai mai thin te a thlawnin training ka pe ta zawk a ni,” tiin a bultan dan a sawi.
Pune khawpuia Kaivalydhan Yoga Institute – ah Yoga Science a zir leh a, Mumbai, Pondicherry University leh Himachal – a resort hrang hrangah a thawk kual leh te te a, hemi hnu hian hotel company lian Jumeirah Group hnuaia thawk turin Dubai – ah a tum ta chhap mai.
Cherai to Chelsea
“Hnathawhna hmunah harsatna awm thei zawng zawng hi chu ka tawk vek tawh” ti tu Menon hi Kerala a thingtlang khaw te tak te Cherai atanga chawr chhuak a ni a, London khawpuia footballer lar ber berte kiang a chettlat hnu pawhin “Thingtlang pa ve mai ka ni a, vawiin thlengin ka la ni zel bawk,” a ti tlat !
Dubai – a a thawh lai hian a client pakhat chuan London – a zin turin a sawm a, a pasal leh a fanu te yoga bakah ‘relaxation technique’ te zirtir turin a duh a ni. Menon hian an sawmna chu a pawm a, a ke a vaivut te khawng thlain London a pan. Chu mite nupa chuan inkhel enpui turin an sawm phawt a, Stamford Bridge – a mi pawimawhte thutna bika an hruai luh hnuah a client thar te chu Chelsea neitupa Roman Abramovich te nupa an ni tih a hre chiah ! An club zawm turin an sawm zui a, hei kum 12 zet a thawk ta.
“Footballer – ah chuan Diego Maradona chiah kha ka hre thin,” ti tu Menon a zinkawng hi a ngaihnawm a, khawvela manager hmingthang Jose Mourinho, Carlo Ancelotti, Maurizio Sarri leh Antonio Conte te meuh pawh an cham rei theihlohnaah kum 12 a inham tang thei tlat.
A hnathawh dan
Vinay Menon a hnathawh pui ber chu player leh coaching staff te ‘rilru leh taksa hah chhawk zangkhai’ hi a ni. “Taksa fit tha hi a pawimawh em em a, chu mi rual chiah chuan rilru hrisel hi neih a pawimawh a ni. Penalty shootout – ah mipui 40,000 chuangin nangmah chauh an thlir thup che a, khatiang dinhmunah khan i rilru leh ngaihtuahna kha i thunun theih a ngai,” a ti.
“Player te hi an thatna ber a khel chhuak tur chuan an hlim a ngai a, chuvangin ARFA (Awareness. Recovery. Focus. Achievement) hi ka duang chhuak a, hemi hmang hian player – te training ka pe thin,” a ti bawk.
