ANDREA PIRLO : I THINK THEREFORE I PLAY – Ema Ralte

Pen mawi leh changkang tak a ni a, mahse pen tho a la ni. A tle nalhin AC Milan club logo a inchhu kalh a, mahse chuti chung pawh chuan pen a nihna a la bo lo.

A rawng chu a pâwl a ni a. Chu pen chu ka en a, naupang inkhualtelem ang mai hian ka kutah ka han tivir vel a. Thil ka ngaihtuah a, kil hrang hrang atangin ka ngaihtuah a, thil inthup thuk tak a awm niin ka hria a. Ka ngaihtuahna lamah chuan ka lu te hi a na niin ka hria a, ka thlan pawh ka hmaiah a luang hial.

Chutah le, ka rilruah ka thil ngaihtuah chu a chhânna a rawn lang a, ka thil ken chu pen satliah mai a ni tih ka hrechhuak a, engmah thil dang a awm lo.

Tawng ri ka hre ta a, “Juventus tana contract ziah nan hmang suh aw,” tiin ka pen ken ka ngaihtuah nasat tak mai chungchang chu Adriano Galliani (AC Milan CEO) chuan a rawn sawi a.

Ka chhuak min thlahna tur atan chuan hetiang lo deuh hi chu ka beisei ve a. Kum 10 chhung Milan ah ka awm a, hetiang hian a tawp deuh tawp mai a nih hi. Mahse, ka nui tho a a chhan chu ring leh rei taka nuih dan chu ka thiam ve tho a ni.

“Andrea, he club tana i thil lo tih tawh zawng zawng avang hian lawmthu kan sawi e,” ti a kan club vice president leh CEO in a a thutna atanga hahdam taka a sawi lai chuan ka han hawikual a, a office chhung chu ka kut ka hriatchian an tluk hian ka hrechiang a. He roomah hian hun hlimawm tak tak ka lo tawng tawh a, contract chungchang leh pen dang tuna mi ang ni lo ka lo hum tawhna a ni. Chutihrual chuan room banga thlalak intarah chuan bel loh deuh deuh ka nei a, a then chu club chanchina thlalak pawimawh tak tak te an ni.

Thlalak chi hrang hrang mai a intar teuh a, ropui tak tak leh hriatreng tlak tak takte an ni hlawm. Mahse ka thlalak erawh chu bang atang chuan lakthlak a ni a, mahse tihluihna a lakthlak erawh a ni lo thung. Kan inhmuh hnuhnunber hi Milan chhuahsan tura thutlukna siamfel hun a ni tih ka hria a, chutiang chiah chuan Galliani leh ka agent Tullio Tinti te pawh chuan an lo ngaihtuah ve tho a.

Milan hotute nen hian harsa takin kan inthlah lem lo a. Hun rei lo te hnuah chu hmun chu ka chhuahsan a. Hmangaih kan neih chuan eng emaw thleng dawn se in ngaihtuahna hun te kan nei thin a, mahse chutiang hmangaihna a bo si chuan chhuanlam eng eng emaw hmangin a insawifel theih thin.

“Andrea, kan coach Massimiliano Allegri chuan Milana i châm a nih chuan defense hmaah i khelh theih tawh loh tur thu a sawi a, i tan position dang a rilruah a awm a. Midfield ah tho a ni a, mahse a sir vei lamah a nih hmel,” tih thu ka dawng a.

Kei chuan defense hmaah tha takin ka la khelh theih ka in ring a, sangha pawh hi tui thuk takah pawh awm se a thaw thei tho.

“Bench ah i thu emaw, mipui thutna ah i thu emaw a nih pawhin league ah nomawi kan chawi tho a. Kumin chu kum dang aiin kan kal dan tur a dang deuh dawn a ni. Kum 30 i tling tawh a, chuvang chuan kum khat chauh contract thar kan zawrh thei che a ni.”

Upa ah pawh ka la in ngai lo a, a bik takin hemi hunlai hian. Heta ka hriatthiam dan chu mite hian ka hun a zo tawh niin inhria ila tih hi a niin ka hria. Tun thleng pawh hian hetiang an sawi nachhan âwm hi ka la ngaihtuah fo thin.

“Ka lawm viau a, mahse chu contract chu ka pawm thei lo ang. Juventus in kum 3 daih contract min zawrh,” tiin ka chhang.

Chutia paihbo mai mai tur ni lovin club tana player pawimawh leh innghahna ni min ngaih ka duh a. Kha hun kha Milan a ka hun tawp a ni tih ka hrethiam ta a, ka hmaah hmachhawp thar ka neih ka ngai a ni tih ka ngaituah ta a.

Milana ka season tawp ber ka hmang ta a ni tih ka hria a, chutah inhliam avangin ka chawlh a ngai zeuh zeuh bawk a. Milanello ah training nei turin ka kal a, dressing room ka pan duh lo a, ka inthlak duh lo a. Ka thiante bakah Allegri nen pawh kan inkar a chhe hran lo a, mahse boruak eng eng emaw chu a awm.

Kum eng emaw zat chu bang lian tak hian min hung tlat thin a, mahse tunah erawh chuan chu bang chu a keh niin ka hmu a, ka rilru a nuam lo chho a. Ka rilru chuan hmun dang pan a boruak dang hip turin min tur a, chu chuan min tibuai leh zual a.

Kum tam tak chhung chu fans te pawhin San Siro ah Pathianni leh nidangah te nasa takin min au thin a, mahse tunah chuan an Panini albumah hmel thar an bel duh tawh ni ten ka hria a. An mit a mi bik ni thin kha mi pangai mai ka chang zo ta.

“Pirlo tak tak kha i ni thei tawh lo,” tih hi thil pawm har tak chu a ni.

Ka teammate, ka unaupa leh room khat ka tawmpui Alessandro Nesta nen kan thu dun a. Ani hi ka engkim ka hrilh leh kan thlenna a ni. PlayStation-a football kan khelh a half time laiin a hnenah chuan, “Sandro, ka chhuak dawn,” tih chu ka sawi ta phawng mai a. Mahse ani chuan mak ti hmel pawh hi a pu vak lo a, “A va pawi ve, mahse thutlukna dik tak i siam e,” tiin min chhang a.

Ka chhungte tih lovah chuan ani chu ka hmalam hun hre hmasa leh bertu a ni. Ka chhuah hun tur chu keimahah chuan a hnai tulh tulh tih ka hria a, mahse engkim mai ka lo hriatchian em em mai leh a thuruk engkim mai ka hriatpui club chhuahsan tura han inngaihtuah erawh thil harsa tak a ni. Mahse zirlai tha tak min zirtir a, tah hi thil pawi a ni lo tih hi.

Ka tap a, ka insum duh lo a, ka tah avang chuan ka zak hek lo. Ka nihna tak a langchhuak zawk a ni.

Airport a kan chhuah hma a chhungte leh thiante kan mangtha a lehlam kan hawi ang mai hi niin ka inrhia a. A te emaw a lian emaw, thil hnutchhiah erawh kan nei tur a ni.

Ka agent nen nitin kan inbia a, a bik takin ka hliam ka dam dawn hnaiah kan inbe zing leh zual a, mahse khelh leh tumna rilru erawh keimahah a awm lem lo.

Massimo Ambrosini leh Mark van Bommel te chu defense hmaah an khel thin a. Ka in chu ka thianten an sual vang pawh ni lovin min rawksak ni berin ka hria.

“Tullio, chanchin thar lam te a awm em?”

Club hrang hrang hian min ngaihven a, chung zingah chuan Inter pawh an tel. Tinti chu phone in an rawn bia a, “Andrea hi Inter ah a rawn lêt leh duh ang em?” tiin. Ani chuan thutlukna ka siam turin a dah a, tumah hnar rih loh tur tiin kan sawi tawh a. Kei chuan, “Eng nge an sawi duhte i han ngaithla ve phawt ila,” ka ti a.

Min duh tih chu ka hria a, mahse hma erawh an la muang hle. Inbiakna mumal taka kan kalpui hma in season chu engtiangin nge an hman zawh ang tih an chiang duh bawk si a. A chhan chu season tharah tunge an coach thar ni a, engtin nge hma an lak dawn tih an result in a hril dawn vang a ni. Mahse anni hian mumal takin vawikhat chiah min be ta a, chu chu ka hrechiang hle a – Thawhtan zing niin season tawp ni chiah a ni.

“Chibai Andrea, Leo ka nia.”

Phone a min rawn be tu chu Leonardo a ni a, chutih lai taka Inter coach kha a ni.

“Chibai Leo,” tiin ka chhang a. Ani chuan, “Engkim kan tifel tawh a, kan club president Moratti hnen atang pawhin nangmah biak phalna kan hmu tawh a, inbiakna kan tan thei tawh ang,” a rawn ti ta a.

Inter chanchin ngaihnawm tak takte min hrilh a, ka lo khelh tawhna hmuna let leh pawh chu chona tha tak niin ka hria a. Milanah kum 10 chhung ka awm a, chuta kum 9 chu nuam takin ka khel a, chumi hnua team lehlam Inter a luh chu chona thar a nih ngei pawh ka ring.

Leonardo khan ka hmalam hunah min puih theih ka ring a, “Andrea, Inter team thar kan din turah chuan hmun pawimawh tak i chang ngei ang,” tih thu pawh min hrilh.

Ka ngaihtuah nasa hle a, mahse Inter zawm tur chuan rilru ka siamfel thei lo a. A chhan chu Milan fans te rilru tur ka ngaihtuah a ni.

“Leo ka lawm khawp mai. Mahse nizan khan Juventus ka zawm fel tawh e,” tiin ka chhang ta zawk a.

Juventus a contract ziah nan hian eng pen nge ka hman erawh chu ka sawi lo ang.