ANDREA PIRLO : I THINK THEREFORE I PLAY- Ema Ralte

Kamkeuna..
(by Cesare Prandelli, former Italy manager)

Andrea Pirlo hi tute tan pawha football player a ni a, ani ang hi chu mi danglam bik, humhalh ngai an ni. A awmna lai hmun apiang hi a thuhnuaiah a dah a, fans ten amah an han en a – a hmelah champion hmel an hmu a. A club khelhna ringawt ni lovin amahah Italy an hmu thin.

Ka ngaihdan dik tak sawi ta ila, Andrea hian a mutnaah pyjama pawl ha ta se thil mak vak a ni lo ang. A pawl hi Azzurri (Italy) rawng a ni a, he jersey a hmangaihna hi a thuk a, a hmangaihna hian tawp chin a nei lo a ni.

Vawiin, tun dinhmuna Andrea chungchang hi kan sawi hma in Atalanta youth team coach ka nih lai han sawi hmasa ta ila. Allievi team enkawl chu ka hna a ni a, kar tin mai hian kan team hmachhawn tur zinga khelh harsaber turte hi kan sawiho thin a, season tluanin player naupang talent nei tha tak takte an rawn lang leh ang tiin kan sawi thin a. Hetia kan sawi hian Milan leh Inter te hi kan rilru-ah chuan an rawn lang thin a, mahse kan sawi tam ber erawh Brescia an ni a, anni hi kan club nena inel tak an ni.

Nikhat chu training tura kan in buatsaih laiin ka assistant pakhat chu thaw hlawp hlawp chung hian changing room-ah a rawn tlan lut a. Chutah chuan, “Cesare, naupang pakhat thiam deuh mai ka hmu a, a thiam dan chu turu tak a ni. Mahse kan buaina tur chu Brescia-ah a khel,” tiin a sawi a.

Ka assistant kha a thil sawi khan chuti em em chuan min dêng na hran lo a, mahse a hmêl atang khan a thil hmuh kha engang mi nge a ni tih a hriat theih a. A chhan chu ani hi game za chuang zet en a, player naupang tha zawng reng renga awm a nih vang a ni.

Vanneihthlak tak maiin a kar lehah chuan Brescia youth teamte nen kan in hmachhawn ta a. Brescia team zingah chuan a teammate te aia kum hnih thum vela naupang tur, tereuhte hi a awm a, mipui awmna lam chu a rawn vai lauh lauh a. Chu naupang hming chu Pirlo a ni.

Inkhel an han tan a, ani ang kha ka la hmu ngai lo a, sawi tur reng ka hre lo. Mi zawng zawng mai khan amah chauh kha an en mai khan ka hria a, chutah tak chuan, “Ani ngei hi a nih hi. Hei ngei hi a nih hi talent danglam nei chu,” tiin ka rilruah chuan ka ngaihtuah a, midangte pawh chuan naupang te takte ang chuan an en lovin ka hria.

Pirlo hi amah tawp hi football a ni a, hemi avang hian amah hian mite hi a huikhawm in ka hria. Football player zingah chuan a thiam ber chi a ni a, tihsual a nei ngai lo a, amah hi football laimu a ni. Hengte avang hian khawvel huapa player tha a ni a, a ball khawih apiang mai hi a tha zawng hian a chhuak vek mai hian a lang. A bulah chuan player naran ve mai pawh hi player tha tak angin an lang thei thin.

A danglam bikna em em chu Andrea hi ri hluai lem lo hian hruaitu a nihna hi a ni a, hetiang ang player hi khawvelah hmuh tur an tam lo hle. Football ka khelh ve thin laiin hetiang ang hi ka khelhpui tawh a, chu chu Gaetana Scirea a ni. Andrea hi Scirea ang mai hi a ni a, an chetdan a inang hle. Heng ang player te hian thil an sawi ve tawh chuan dressing room hi a reh duak a, tute mai pawh hian an thilsawi hi ngun takin an ngaithla thin a ni.

Andrea leh Gigi Buffon te hi a bik takin Italy ti Italy tute an ni a. Anni ang hian player dangte hian Italy jersey hi ngaihlu se chuan he kan chenna hi a danglam dawrh ang. Indona hmun tam takah an vakchhuak tawh a, mahse an khelh tirh ni atanga vawiin thleng hian Italy tana an inpekna leh an rilru hi a la danglam lo.

Brescia jersey amah aia lian ha a a tlân hnuang hnuang laite ka ngaihtuah a, a hunlai khan Atalanta khan kan lalut thei khan ka hria. Amah lakluh tum hian inhmuhkhawmna pawh kan nei hman hial a, mahse kan club president Percassi chuan Brescia nena kan inkarah boruak a awm a hlauh avangin kan lalut ta lo a ni.

Chuta kan inhmuhkhawm tuma kan president thilsawi chu tun thleng hian ka la hrechhuak thin – “Pirlo hi a khelhna ngaiah awm rawh se. Ani ang player hi chu zalen taka awm tir hi a tha. Hlim takin leh nuam ti takin khel se la, boruak rit leh boruak dang karah chuan khel lo hram rawh se. Miten an hmuh duh em em player hi ni chhunzawm rawhse.”

Percassi khan thil a lo hrechiang em em a, Percassi khan Pirlo hi a lo hrechiang hle a ni.

(Andrea Pirlo autobiography hi a remchan hun apiangah tawi te te in kan rawn dah thin dawn nia)

Posted in Analysis.

Leave a Reply

Or