UCL Group match ah Liverpool in an khelmual Anfieldah AC Milan an mikhual a, inkhel hmuhnawm leh tang takah mual nei tu Liverpool ding chang zawkin 3-2 in an chak
Liverpool FC 3-2 AC Milan(Tomori (OG) 13′, Salah 48′, Henderson 69′ – Rebic 42′, Diaz 44′)
TUN HMA: Liverpool leh AC Milan te hi European Football a record nei tha ve ve an ni a, Liverpool hian UCL vawi 6 an chawi tawh a, AC Milan hian vawi 7 an chawi tawh thung. Hetiang taka record nei tha si hi Final vawi 2 an intum bak he tournament ah hian an la intum lo a, kum 2005 khan Istanbul a Final an khelh tum in ropui takin Liverpool in beisei bo hnuah an hnehna chu hahip in sawi a hlawh a, kum 2007 ah Final ah bawk in tum leh in hemi tum hi chuan AC Milan in Athens ah 2-1 in an chak zawk ve thung a ni.
TUN DINHMUN: Italy club hlun AC Milan hian 2010 chhoah club in sum lamah harsatna te nei chho in player tha tak tak ten an chhuahsan a, UCL pawh khel phalo in hun rei tak an tal chho a, tun hnaiah rawn i tuai thar leh in kum 7 chhung zet an khelh loh hnuah UCL an khel ve leh thei ta a ni. Chutih laiin Liverpool erawh 2019 khan UCL an champion a, 2018 ah Runners Up an ni bawk, khata player tangkai te kha tuna Liverpool player tangkai te an la ni reng a, team pahnih player te khaikhin chuan kum 2005 leh 2007 hunlai a Liverpool leh AC Milan squad inthlauhna letling thawk ang in a ngaih theihna lai a awm!Chutih rualin tun season bul tan tha ve ve an ni a, Liverpool hian league match 4 khelh tawh ah Chelsea an draw tih loh chu an chak vek bakah goal vawi 1 chiah chhuah in goal 9 an khung tawh a, chutiang bawkin AC Milan hian league match vawi thum an khelh tawh an la chak vek bakah goal 1 chiah chhuah in goal 7 an khung ve tawh bawk.
KHELMUAL A SAWIFEL HUN A NI TA: Club pahnih intum tur hi sawi tak angin club hlun an ni a, a chhehvel sawi dawn chuan sawi tur tam tak a awm, khalam erawh duh tawk ta ila. Liverpool manager Jurgen Klopp an beisei angin 4-3-3 formation a rawn hmang leh a, amaherawh chu Leeds United an khelh tum a starting 11 ti danglamin van Dijk aiah Gomez start tirin, Thiago leh Mane aiah Keita leh Origi ten an start a, inhliam Harvey Elliot aia lut captain Jordan Henderson a rawn start bawk. Liverpool tan Firmino inhliam vangin a khel theilo zel a, Curtis Jones erawh bench ah a rawn kir.AC Milan tan an striker rinrawl Zlatan Ibrahimovic inhliam vangin a khel thei lo a, Chelsea atanga an lakluh Bakayoko pawh a khel thei lo. Amaherawhchu, player tha Denmark Captain Simon Kjear, Ante Rebic, Tomori te bakah Man City atanga an lak rawlthar Brahim Diaz ten start a, team tha an ni, kan hriat sa Oliver Giroud erawh bench ah a awm thung.
HEI HI ANFIELD A NI (This is Anfield): Inkhel an tan a, ni 500 chuang fans tello a european game khelh tawhna Anfield stadium khatin fans an an awm leh thei ta a, You’ll never walk alone tih hla pui an sa fawn leh hluah hluah thei ta. Inkhel bul tan atangin Liverpool game a nung nghal hle a, AC Milan tlar hnung in hna an ngah viau. Minute 8-na chauh an khelh tihah mual dinglam atangin Arnold leh Salah te in one two hnuah Arnold chuan box chhungah a khalh tlang a pet chu Milan defender Tomori chuan lo dang pialin goal ah lut a Liverpool goal khat in hma an hruai nghal. Liverpool in an nawr chhunzawm zel a, Robertson-a shot box chhungah Bennacer kut a fuh avangin minute 14 naah penalty an hlawh chhuah chu Mo Salah chuan pet in AC Milan keeper Maignan chuan tha zet in a dan sak bakah ball lo let leh Jota head chu Maignan hian a save leh bawk.
Liverpool lamin ball an chang hnem a, amaherawhchu goal an chantir thei lo. Minute 42-naah AC Milan lam in counter attack atangin Liverpool tlarhnung thiat in Ante Rabic chuan goalah a chantir a, stadium boruak a dang nghal. Liverpool player te insiam that hma in minute 44-naah AC Milan in nawr chhunzawmin Liverpool defender te buai karah Brahim Diaz chuan goal ruak a khung leh nghal a 2-1 in AC Milan in 1st half ah hma an hruai ta zawk a, Liverpool lam team ang a an inthlahdah zeuh chu AC Milan lamin an hmang tangkai a, van Dijk awm lohna tlarhnung a buai hle, a team tha ber khelh tir lo a siksawi tu Jurgen Klopp tan half time ah ngaihtuahna thar sen tham a awm phah ta bawk.Team pahnih te inthlak danglam lo in 2nd half bul an tan a, an tan chiah tihah AC Milan lamin an ti goal leh nghal na in a pet tu Simon Kjear alo offside hlauh a, Liverpool an vannei. Liverpool lam in nawr let ve nghal in Origi leh Fabinho te AC Milan defender an te bum hnuah, Origi ball pass a mawi tak chu Mo Salah chuan min 48 naah goal a chantir a, 2-2 a ni.
CAPTAIN FANTASTIC V.2? : Liverpool lamin game an thunun zawm zel a, amaherawh chu goal hlauhawm an nei thei meuh loh hnuah Captain chet hun a lo thleng, minute 69 naah Liverpool lamin corner an hmuh AC Milan defender clear that tawk loh chu penalty box pawn hret a lo awm Captain Henderson ke ah tla in, Milan keeper Maignan dan rual loh a kawh in goal ah a pet lut a, fans thawm a ring hle. Goal dang a luh belh lo a 3-2 in Liverpool an chak ta a ni.
