Anwar Ali football zinkawng a tawp ?

Kum 2017 FIFA U-17 World Cup – a India defender Anwar Ali chu a lung (heart) lam fel lo avangin football a chawlhsan a ngai maithei. Kum 20 a upa hriselna chungchang hi vawiin khan AIFF Sports Medical Committee chuan ngaihtuahin “football khelh chawlhsan rih”  turin AIFF – ah rawtna an thlen a, AIFF hian AFC – ah an thawn chhawng ve leh.

Dr Vece Paes – a ho a thu khawm Sports Medical Committee hian lung lama harsatna nei Anwar Ali dinhmun hi ngun takin an zirchiang a, an rawtna thehluh thu kal zel dan a zirin Ali hi AIFF hnuaia eng inelnaah mah a inziak lut thei dawn lo a ni. “A hriselna dinhmun hi AFC hnenah thawn a ni a, thutlukna an siam hma chu inkhel tawh rih lo tura hriattir a ni. Tunkar tawp hian a dinhmun tur chu a chian a rinawm,” tiin I-League CEO Sunando Dhar chuan a sawi.

Punjab – a piang Ali hi Minerva Punjab FC atanga inzirchho niin India tan age level hrang hrangah a khel tawh a, nikum khan India senior team probables – ah koh ni mahse a hriselna dinhmun that loh vang hian camp pawh a zawm lo. Mumbai City leh Indian Arrows tan khel tawhin a lung lam fel lo avang hian club tam takin an hnawl a, season thar atan Second Division I-League khel tur Mohammedan SC chuan an lalut fel tawh.

India rama rawlthar beiseiawm zinga sawi ve thin Ali hi Mumbai City FC tana a khelh laiin a lung lam fel lo hi hriat chhuah a ni a, nikum khan India coach Igor Stimac hian France rama University Hospital of Rennes – a Sports Medicina lama an hotu Dr. Francois Carre pan turin a rawn a, chutah chuan ‘hah takin a inkhel a nih chuan heart attack neihna chance sang tak’ a nei niin an hmuchhuak.

Hemi hnu hian India ramah rawn haw in training a chhunzawm a, Jalandhar, Punjab – a lung lam doctor (cardiologist) hnen atangin fitness certificate a la a, Mohammedan hi a zawm ta tho a ni. Kolkata club hian cardiologist rawn ve lehin a thisen test a nih bakah CT Scan leh MRI tih a ni bawk a, ‘a dinhmun hian that lam pan mahse heart attack vanga thi thut thei’ a nih thu tarlan a ni a, AIFF hnenah kal lehin tun dinhmun hi an thleng ta a ni.

“Vawi tam tak test a ni tawh a, ramchhung leh rampawn doctor thiam thlengin rawn an ni tawh. Kan rawlthar te zinga talent tha ber pawl a ni a, dam takin inkhel thei se kan duh ngawih ngawiha mahse a hriselna in a tuar erawh kan phal lo,” tiin AIFF General Secretary Kushal Das chuan a sawi.