ANZHI MAKHACHKALA – CLUB HAUSA THUT CHUAI ZUI LEH TA CHU !

Estimated read time 6 min read

Kum 2011 khân Russia ah club rawn hausa thut an awm a, an boruak a rawn lianin Europa League ah Round of 16 te hial an rawn thleng chhova, khatih hunlaia khawvela footballer hlawh hnem ber an kawl bawk. Mahse vawiinah chuan Russia a third division league-ah 15-na niin hun an hmang ta, chu club chu FC Anzhi Makhachkala a ni.

He club bul lo inṭanna chu kum 1991 khân a ni a. Din a nih hnu lawk khan Soviet Union chu a kehdarh zui a, Anzhi Makhachkala pawh hi Russian third division league club-ah dah luh an ni zui a. Russian club anga season an khelh hmasakber ṭum hian league-ah 5-na an ni nghâl a. Kum 1993 ah third division a Zone 1 groupah a sangber niin Russian second division-ah kaisang tur an ni a. Mahse Russia rama league khelh dân kalphung tih danglam a nih avangin vanduaithlak takin second division hi an kai thei lo hlauh a ni.

Kum 1996 a lo inherchhuak chuan Anzhi chu second division ah an in pêt tling ta a, hemi ṭum hian league-ah 3-na an ni. Second division-ah hian rei an awm lova, 1999 ah second division champion niin Russian Premier League (Russia a league sangber) ah an in pet tling leh. Mahse vanduaithlak takin kum 3 hnu lekah division hniamah an tla thla zui leh ta a.

Second division club ni a hun an hman chhoh ngar ngar hnuah kum 2009 khân Russian Premier League a khel turin a tling leh ta a. Kum 2011 a lo nih chuan Anzhi Makhachkala chuan bung thar a kai a, January ni 18 ah Russian pa hausa tawntaw Suleyman Kerimov chuan club neitu nihna rawn changin cluba share zawng zawng chu a lei vek a ni.

Suleyman Kerimov-a ruahmanna ah chuan a bulṭanna atan a club tana €200m vel dah phawt a, chumi hmanga UEFA in European football khel tur clubte an beisei anga an khelmual mi 40,000 tal lenga sak a, club training ground leh academy te tihchangtlun chhoh a ni.

Kum 2012 ah chuan Suleyman Kerimov-a ruahmanna ang chuan stadium siamṭhat hna leh academy tihchangtlun hna chu thawh a ni chho ta a. Mahse an stadium hi mi 26,500 leng chauhin an ti lian a, hei hi UEFA in a phût 40,000 erawh a la pha lo hle.

Kerimov-a thuneihna hnuaia transfer bazar inhawng hmasaberah Anzhi chuan Brazilian hranghlui Roberto Carlos an lalut nghâl a, ani bâkah hian Brazilian club Corinthians aṭangin Jucilei chu €10m in an lalut a, tin Anderlecht aṭangin €8m sêngin Moroccan international Mbark Boussoufa an lalut bawk.

Kum 2011 aṭanga 2013 inkar chhung khân Anzhi hian Samuel Eto’o, Lassana Diarra, Christopher Samba, Yuri Zhirkov, Igor Denisov, Willian, Lacina Traore, Aleksander Kokorin, Fyodor Smolov leh midang an lalut a, Eto’o phei hi chu khawvela football hlawh tam ber ni turin an lalut a nih kha. Chu mai ni lovin manager hriat hlawh Guus Hiddink pawh sum tam tham tak hlawh turin an lalut bawk.

Hiddink hian 2012/13 season-ah Anzhi hi Russian Premier League-ah pathumna a nih pui a, Europa League-ah Round of 16 thlenpuiin Newcastle United hneh lovin an tla ta hlauh a ni.

Hetia rawn hausa thuta sum an hman tam tâk thut avang hian UEFA chuan Financial Fair Play (FFP) an bawhchhia niin a ngai a, warning a pe zui. Hemi avang hian Anzhi club neitu Kerimov-a chuan an playerte hlawh chu a tihhniamsak ta duai mai a. Tin August 7, 2013 ah an club kumkhat budget hmun thuma ṭhena hmun hnih chu Kerimov-a hian a paih hlawk bawk. Heti ang a nih chhoh tâk avang hian Guus Hiddink pawhin Netherlands National Team enkawl turin a chhuahsan zui nghâl a.

Hiddink a bân hnu hian Anzhi hian Manchester United a coach hlui Rene Meulensteen chu manager lailawk atan an ruai zui a, sum an in hrêk nasat chu result ah lang chhovin 2013/14 a tawp meuh chuan Russian Premier League mawngphah niin season an khâr a, season tluanin game 3 chiah chakin point 20 chiah an hmu a ni.

Anzhi neitu Kerimov-a a dam lo chho a, a sumdawnna kawngah US sorkar aṭangin harsatna a tawk chho bawk nen sum lamah buaina a tâwk a. Chuvang chuan December 2016 khân Osman Kadiev hnenah Anzhi chu a hralh ta a. Kadiev hi Makhachkala a football club dang Dynamo president ṭhin a nih avangin Anzhi chhungkua leh an club ṭantute pawhin an club neitu tharah beiseina an nei sâng chho leh hle

Kadiev-a ho hian Anzhi chu ramdang mi player lakluh vak aiin ramchhung mi man to vak lova lakkhawm a academy a awmte nena chher chu an tum chho ta a. Chutiang chuan theihtawp chhuahin bul an ṭan ṭha leh a. An hlawhtling chho ṭan dawna a lan laiin 2017/18 seasonah Russian Premier League ah an inham tâng zo ta lova.

Mahse vanneihthlak takin June 13, 2018 khân Russian Premier League club FC Amkar Perm chu Russian Football Union in chhan eng emaw avangin an license an tihtawpsak a. FC Amkat Perm hmunruak hi Anzhi chu an hnawhkhah tir leh ta hlauh a ni.

2018/19 season chu an han khêl leh ta a. Anzhi chuan beisei an pha lo chho a, season a tawp meuh chuan second division ah an tla thla leh ta a. 2019/20 season ṭan dawnah Russian Footba Union chuan Anzhi chu sum lamah an tlakchhiat avangin Russian Football National League (second division) pawh khel thei lo turin an license an hlihsak zui ta a.

Chutah chuan Russian Football Union chuan Russian Professional Football League (third division) an khel thei nge thei lo an han ngaichang leh ta a. Kum 2019 June thla khân Anzhi chuan third division league khel thei turin sum an nei e tih an finfiah hnuah third division league chu khelh phalsak an ni ta a ni.

Anzhi senior player tam zawk chu an club a tlakhniam avang chuan an chhuak deuh vek a. Chumi avang chuan 2019/20 season chu under-20 player eng emaw zat leh senior player a chhuak bâng tlêm nen an khel ta a, tunah hian Russian Professional Football League Zone South-ah 15-na niin an awm mêk a. Covid-19 avanga Russia sorkar in football league a lo titawp bawk nen engtiang chiahin nge Anzhi hmalam hun hi ni dawn hriat a la ni rih lova, chutihrual chuan team 16 awmna league a 15-na an nih avangin season thar lo awm turah chuan Russian Amateur Football League ah an tla thla dawn niin a lang ta ber a ni.

C Tlanthianghlima

Football tui ve tak

You May Also Like

More From Author