Russian club Anzhi Makhackala chuan thla 18 chhung atan Dutch manager Guus Hiddink chu contract an ziahpui. Anzhi team hi Turkey ah training neiin an awm mek a, Hiddink hian rei lote hnuah a player tharte hi a zawm dawn a ni.

Nipui transfer laia Inter Milan aṭanga Samuel Eto’o laluttu Anzhi hian coach langsar an melhna a rei tawh a, tunah chuan khawvela football manager langsar berte zing ami Hiddink an lalut ta a ni. Hiddink hian kumkhatah  €10 million (£8.3m) vel a hlawh dawn nia tarlan a ni bawk.

Hiddink hian football-ah hnuhma a nei chhe lo khawp mai a. Team ropui ni lo dinhmun ropui taka a hlangkai thei ṭhin hi a ropuina a ni awm e. FIFA World Cup 2002 ah South Korea chu semi final a thlen pui a, Euro 2008 ah Russia chu semi final a thlenpui bawk a ni. A team enkawl hnuhnung ber Turkey national team erawh Euro 2012 a thlenpui zo lo thung.

Hetia Anzhi lamah Hiddink a luh takah chuan Chelsea manager Andre Villas-Boas dinhmun a him sawt niin sap chanchinbu lam chuan an lo ziak leh hman tawh nia.