Apuia a chhuak dawn em ?

Indian Super League (ISL) chanchin a captain armband hreng thei naupang ber Lalengmawia (Apuia) chuan a khelh mekna Northeast United a chhuhsan dawn niin thuthang a tam hle.

Apuia hian kum 2019 atang khan Northeast United tan a khel tan a, season liam ta phei kha chuan semi-finals an thlen theih nan an player pawimawh ber pawl niin ISL Emerging Player of the Season pek a ni nghe nghe.

“Tuna min be tu zingah hian ATK Mohun Bagan leh Mumbai City FC bakah club dang pawh an awm a, mahse Northeast United – ah hian 2022 thleng contract ka la nei. Club dang zawm leh zawm loh hi chu ka club te’n chhuah an phal leh phal loh a ni mai,” tiin vawiin khan ZoFooty a hrilh.

Apuia hian kum 6 a nihin football a khel tan a, Subroto Cup – ah te khel ve lauh lauhin Kolasib – a Regional Sports Training Centre ah hun engemawchen a awm hnuah India rama rawlthar tha zual te enkawlna AIFF Elite Academy a zawm leh a, hnunglam a hawi tawh lo.

FPAI Young Player of the Year nilai Mizo tlangval hi season tharah club dang jersey ha a kan hmu a nih pawhin thil mak a ni lo ang.