Aritz Aduriz thlah nan….

Kum 29 a nihin an ram Spain tan khel tur a koh a ni ve chauh a, vawi khat a inlan hnuah kum 35 mi a nihin koh a ni leh a, hetah hi chuan goal thunin Spain ram tana goal thun thei upa ber record a siam.
 
“Ka hun a lo thleng ve ta. Football hi i kalsan ngai loin football zawk hian a kalsan ang che tih hi vawi tam ka lo sawi ve tawh thin. Pangngai tak a ka inkhelh zel theih nan ka doctor in nimin (May 19) khan ka khel (hip) thlakna tur ngaihtuah turin surgeon hmu turin min rawn a, mahse ka taksa in a tlin tawk chu ka lo thleng ta reng mai. Hei hi professional athlete te nun chu a ni, a bak a awm lo,” tiin kum 39 a upa Athletic Bibao striker Aritz Aduriz chuan professional football a chawhsan thu a puang.
Spain ramah pawh a fir zual ho awmna, Basque – a piang leh seilian Aduriz hi Athletic Bilbao legend a ni a, Basque club tan hian inelna hrang hrangah goal 172 a thun a, heng zingah hian nikum August ni 19 – a Barcelona laka hun tawp dawn tep a a bicycle kick hmanga chakna goal a thun kha a tel !
 
La Liga – ah a zawn zat a season 15 chhung goal thun thei chu Lionel Messi, Sergio Ramos leh Aduriz te chiah hi an ni a, La Liga – a goal thun tam lamah hian Real Madrid legend Ferenc Puskas pawhin a tluk lo. 2015 Spanish Super Cup final – a Barcelona laka hattrick a siam kha sawi bo theih a ni lo bawk.
 
Ruahman lawk ang chuan thil kal se thla hmasa April ni 18 khan Copa del Rey – final – ah Bilbao hian Real Sociedad hmachhawn tur an ni a, hei hi kum 117 a upa inelna a Basque club pahnih te final-a an inhmachhawn hmasakna ber tur a ni a, tun season tawp a football chawlhsan a tum thu lo puang tawh Aduriz – a match hnuhnung ber tur a ni bawk.
 
A kum upat lamah Europa League ah 2015/16 leh 2017/18 te khan top scorer a ni a, La Liga – a Spanish player goal thun tam ber hnena pek thin Zarra Trophy pawh tum hnih a dawng.
 
“Tunah chuan final ropui tak kan lo suangtuah thin kha theihnghilh ila, mangtha tia thlahna thu sawi a ngai ta zawk a nih hi. Ka zinkawng bultanna atanga a tawp thleng hian hriatreng tlak leh thil ropui tak vek a ni a, hei hi ka thawnthu tawpna chu a ni ta. Thinlung takin lawmthu ka sawi e,” – Aritz Aduriz