Arjuna Award dawng turin Sandesh Jhinghan thlang; Jeje enkân a ni em ?

Ministry of Youth Affairs & Sports in India rama infiammite chawimawina hrang hrang dawng tur a thlan zingah football atangin Sandesh Jhinghan chu Arjuna Award dawng tur a thlan a ni a, vawi 3 lai nominate lo ni tawh Jeje Lalpekhlua hming a lang lo.

AIFF chuan kumina Arjuna Award dawng thei turin Jhinghan leh Jeje bakah hmeichhe football Bala Devi te chu a India sorkar hnenah a nominate a, kum 27 a upa Jhinghan hian a dawng ta a ni.

Ram tan a vawi 38 inlan tawh Jhinghan hi footballer zinga he lawman dawng thei 27-na niin tun hnai kum 20 chhunga dawng thei 8-na chiah a ni a, ani bakah hian India senior team manager hlui Sukhwinder Singh chu Dhyan Chand Award (Lifetime Achievement) dawng tur a thlan a ni bawk.

Jeje enkân a ni em ?

India tan a vawi 56 inlan a goal 23 thun tawh Jeje hi he Award dawng tur hian kum 2017, 2019 leh kumin te khan nominate a lo ni tawh a. Kum 2017 khan hmeichhe footballer Bembem Devi leh India goalkeeper Gurpreet Singh Sandhu te nen an pathum hian nominte an ni a, Bembem Devi hian a dawng.

Kum 2019 khan Gurpreet Singh Sandhu nen hian nominate ni lehin amah aia ram tana la khel tlem zawk Gurpreet hi thlan a ni leh a, kumin hian a vawi thum nan nominate ni leh mahse thlan a ni leh ta chuang lo a ni.

Arjuna Award hi kum 1961 atanga sem tan niin bronze statue leh thuziak (scroll) bakah pawisa fai cheng nuai 5 a keng tel a, he lawmman dawng thei chuan nominate an nih hma kum 4 chhunga India tan international level – a an record en a nih bakah leadership quality leh discipline tha neih a ngai bawk. He lawmman dawng thei tur a ‘criteria’ en hian tunhnaia football atanga dawng te hian Mizo tlangval aiin record an nei chhuanawm bikin a lang lo.