Tun season ah Arsenal in an khelmual Emirates stadium ah goal an thun ve taa, Southampton lamah goal ruk an thun! Premier league kaithar Southampton hian season bul tan thalo mahse an khelh tawhte (Man City, Wigan leh Man City) ngaihtuah chuan an khelhdanah mipui lawm an hlawh hle.

Line Up
Arsenal: Szczesny, Jenkinson, Mertesacker, Vermaelen (c), Gibbs, Coquelin, Arteta, Cazorla, Gervinho, Chamberlain, Podolski
Southampton: K.Davis, Clyne, Hooiveld, Fonte, Fox, Schneiderlin, S.Davis, Ward-Prowse, Lallana (c), Puncheon, Lambert

Inkhelh tan atangin khelmual neitu Arsenal lamin an nawr nghal a. Robin van Persie ang maia ke veilam nei tha Lukas Podolski in Southampton goal lama a pet hmasakber chu kawh hle mahse goalkeeper zawn anih avangin a hlauhawm hranlo. Inkhel tan anih atanga minute 9 naah Arsenal in goal hmahruai an thun a, Podolski thawhrah Gibbs in a pet chu Southampton defender Hooiveld-a ke ah a fuh palh a, Southampton goal ah a lut hlauh mai. Arsenal defending pawh season dang aiin a tha tih a lang leh a. Minute 30 naah Diaby inhliam kara a hmunruak hnawhkhat Coquelin-a free kick hlawh chu Podolski in mawizet maiin a ke veilamin Southampton goalkeeper Davis dan hmanlohin a pet goal a, Arsenal in 2-0 in hma an hruai. Minute li hnuah Arteta ball pek chu Gervinho in a um hnuah Southampton lamah chiangzet maiin Arsenal goal thumna a thun. Arsenal lamin an nawr fuh laklawh ni tur a ni, minute thum hnu lekah Arsenal left back Gibbs-a pet bawk chu Southampton right back Clyne-a ke ah perin anmahni lamah a lut leh a, Arsenal vanneih leh Southampton vanduai a innangching niin a lang, Arsenal in minute sarih chhungin goal thum an thun. Arsenal in hneh viauin lang mahse minute 45 naa Arsenal goalkeeper inhliam damkawr Szczesny tihsual zarah Southampton defender Fox chuan goal a thun a. Tunhnaia tlar hnung nei tha Arsenal te goal chhuah chuan an manager Arsene Wenger a tilungawilo hle tih a lang. Half time ah Arsenal in 4-1 in hma an hruai a. First half a langsarzual deuh chu Cazorla, Podolski leh Gervinho te ball inpekual mawi lutuk te kha a ni awm e. Ball possesion pawh 63%-37% niin mual neitu an chungnung hle.

Second half khelh tan a ni a. UEFA Champions League leh Manchester City la khel tur Arsenal te hi an inkhek khal deuh niin lang mahse Southampton in an formation an thlak a. Southampton tan an club history a an player manto ber Gaston Ramirez (Bologna atanga 12 million pounds a an lei) an luhtir hnuin 4-4-2 in an khel a. Minute 62 na thleng chu Southampton hian nawr mahse Arsenal an langsar leh zawk a. Southampton a bul tan Arsenal winger Alex Oxlade-Chamberlain in a club hlui lamah goal thun a chak tih a hmuh theih awm e. Arsenal assistant manager Steve Bould in khelmual sirah Aaron Ramsey chu note pad mai ni tawh lovin tunlai thiamna sangzawk hmang tangkaiin i-pad ngatin a khelhdan tur a hrilhfiah hnuah a luhtir a, awmzia a nei hle. Minute 70 naah Ramsey pet goal post a per chu Gervinho bawkin Southampton goal ah a pet lut a, Arsenal in an goal 5 na an thun. Southampton in an striker dah that Jay Rodriguez luhtir mahse awmzia a nei tawhlo. Minute 87 naah Arsenal subsitute Theo Walcott chuan a bul tanna Southampton lamah Arsenal goal 6 na a thun leh a. Amaherawhchu, ama club hlui lama a thun avangin a goal thun hi a lawm hranlo. Inkhel a tawp a. Mi 60,097 hmaah Arsenal in an khelmuala an chak hmasabernaah 6-1 in an chak thei. Emirates stadium a VIP thutna a thu tunhnaia Paralympics a England aiawha medal la, Arsenal fans pathumte pawh an phur hle tih a lang. Inkhelh tawh chinah Arsenal hi top 5 ah an lang a, Southampton erawh a tawpberah an la thu.