Arsenal 1-0 QPR
Arsenal in Robin Van Persie goal hmangin QPR an hneh a, he hnehna vang hian Arsenal hi top 4 ah an inhlang chho ta a ni.

Robin Van Persie in goal kha kum 2011 chhunga Van Persie goal 35-na a ni a, kum khat chhunga petgoal hnem ber Alan Shearer a record vawi 36 chu pha lo mahse Thierry Henry record erawh a lehpel thung. He inkhel hi Thierry Henry pawn a hmunah a en a ni.

Arsenal hi kawng engkimah an chhungnung zawk a, Van Persie pawh hian goal chance tha tak tak a thun thelh nual a, hun tawp lama rawn lut Yao Gervinho pawn clear chance a rawn thelh nual bawk.

Arsenal hi kheltha viau mahse an defender rinrawl Vermaelen minute 54 lekah a bai chhuah avangin an lawm a kim bik kher lovang.

Bolton 1-1 Wolves
Bolton Wanderers in 20o1 match tawp berah Wolverhampton draw mahse Blackburn Rovers in Manchester United an hneh avangin a mawngphah ah an awm phah ta a ni.

Bolton tan minute 22 na lekah Sam Ricketts chuan goal ropui a thun a. Ricketts hi ni 16 February 2011 a Wigan Athletic nen FA Cup replay an khelh tum khan a inhliam a, tun match hi a inhliam hnua a rawn khelh leh hmasak ber a ni. Mahse second half tan atanga minute 4 naah Wolves tan Matt Jarvis cross Steven Fletcher in a thun avangin an in draw ta a ni. He match ah hian Wolves keeper Wayne Hennessey chu a khelh tha leh hle .

Chelsea 1-3 Aston Villa
Stamford Bridge ah Chelsea in Aston Villa an in sawp tir avangin Champion tura rin chu an har ta talh mai.

Minute 23 lekah Chelsea tan Didier Drogba in ama penalty hlawhchhuah chu goal ah a chantir a, mahse minute 5 hnuah Stephen Ireland in Aston Villa tan a rawn sut a, first half ah goal dang a luh belh lo.

Second half lamah Chelsea lamin chak ngei tumin Frank Lampard leh Fernando Torres te an rawn luhtir a. Torres phei chuan a ball khawih hmasa berah crossbar rawn pet per nghalin Chelsea fans tan beiseina thar a rawn pe leh a. Mahse minute 83 ah Stiliyan Petrov goal hmangin Aston Villa in hma an hruai a, chumi hnu minute thum ah Lampard tihsual chu Stephen Ireland chuan khalh pheiin Darren Bent chu pe leh in, annin goal awlsam tak a lo thun in Aston Villa chu 3-1 in a chakpui ta a ni.

Norwich 1-1 Fulham
Fulham in an goal an humhim theihloh avangin 2011 chhungin away-ah vawi khat chiah an chak ta a ni.

Fulham tan minute 7 lekah Orlando Sa chuan goal mawi tak a thun a, hemi hnu pawh hian goal a thun leh tep a, mahse Kyle Naughton in goal line atangin a lo pet chhuak hman a. Fulham hian first half-ah chuan hneh deuh zawk mahse second half ah chuan mual neitu Norwich an chungnung zawk a. An chungnung zawkna chu a tawpah vanneih puiin minute 94 naah Simeon Jackson-an Elliott Bennet cross chu lo head goal in 1-1 in an in draw ta a ni. He goal hi tun season a goal hmasaber a ni a, nikum khan Championship lamah Norwich tan goal 13 a thun.

Stoke City 2-2 Wigan Athletic
Player 10 chauh a khel Wigan Athletic chuan hun tawp dawn a Ben Watson-a penalty hmangin Stoke City an draw.

Hugo Rodallega cross atangin Vitor Moses chuan Wigan Athletic tan goal hmahruai a thun a. Mahse minute 77 ah Gary Caldwell an Cameron Jerome tih goal ngei tur a lo khawih avangin red card a hmuh mai bakah penalty a chawi bawk a. Jon Walters penalty petna lam chu Al Habsi in ring dik mahse a kawh em avangin a dang hman lo. Minute 84 naah Jerome a rawn lang leh a, Stoke City chakna goal ni ngei tura ngaih chu a rawn thun a. Mahse minute 87 naah Ryan Shotton in tul lo taka Rodallega kawr a lo pawh avangin penalty a chawi a. Chu penalty chu substitute atanga rawn lut hlim hlawl Ben Watson chuan pet goal in, Stoke City leh Wigan Athletic hu an in draw ta a ni.

Swansea 1-1 Tottenham
Manchester United in Blackburn Rovers an hnehloh avangin Tottenham tan league hmahruaitu Manchester City chu point li (4) chauh a thlauh theihna an nei a. Mahse Swansea an draw avangin point 6 in an inthlauh phah ta a ni.

Tottenham hian Swansea hi an home Liberty Stadium ah hian September 1946 hnu khan vawikhatmah an la hneh leh lova. Chumai bakah Swansea hi British Football team zinga home a goal chhuah tlem ber a ni a. Tun season ah pawh hian goal 16 chiah la chhuahin mahni home a la chhuah tlem ber anni.

Tottenham tan hian minute 44-naah Van der Vaart-an Benoit Assou-Ekotto siam chu a thun a. Hemi bakah hian chance tha tak tak a nei bawk a. Emmanuel Adebayor siam Van der Vaart an keeper nen chauh an awm tawh hnua a lo thun loh te chu a uihawm zual a ni. Goal thunlo mahse an chak mai dawn emaw tih laiin minute 84 naah ding lam atanga Angel Rangel-a cross chu Friedal chuan lo dang sual a, ball per chu Scott Sinclair chuan goal ruak ah lo thunin an in draw ta a ni.