Season thar atan inbuatsaihna ngawrh taka neih a ni a. Players te pawh an club chhuahsanin club thar an zawm hunlai a ni a. Hetihlai hian 2011-2012 season intannan kar khat vel a la awm tihin Arsenal chu season danga an harsatna tawh thin in a tibuai leh ta. Nizana Arsenal Official website in Arsene Wenger a kawmna ah a player inhliam te chanchin kimchangin a tarlang. Zanina Portugal a Benfica nen an inkhelh turah player thahnem tak hruai an ni velo.

Tunhnaiah midfielder Abou Diaby inkhel hmuh tur a la awmlo. Diaby leh Laurent Koscielny te hi tha na vangin chawlhtir an ni. Samir Nasri pawh inhliam te nau a neih avangin chawlhtir a ni bawk. Cesc Fabregas hi inhliam damkawr anih avangin an inkhelh tir mai a la rinawmloh. Season tir ah hmuh hman a beiseiawmloh. Pre-season training naa inhliam Theo Walcott pawhin training a zawm leh thei tawh a, inkhel thei erawh a la nilo. Jack Wilshere-a ke inhliam chu a dam hun hriat theih a la ni rihlo. Diaby, Koscielny, Nasri, Fabregas, Walcott, Wilshere te tello Arsenal hi Portugal ah Benfica in engtin tak lo mikhual ang maw?

Arsenal hian UEFA Champions League qualifier khelh turah Italian club Udinese an hmachhawn dawn a. Udinese hi team tha tak ni mahse tunhnaiah an player tha skipper Gokhan Inler, Cristian Zapata, Alexis Sanchez te’n an chhuahsan tak avangin beisei san a har deuh. Udinese tan Arsenal hi tun ang dinhmuna a la awm anih chuan an hneh thei a ngem?

Arsene Wenger chuan Nicklas Bendtner leh Emmanuel Eboue te chu chhuak tura rin an nih thu a sawi tel a. Club thar an zawm tur nen inbiakna a kal mek tura ngaih a ni.