Arsenal defender ṭha ber tih theih Thomas Vermaelen chuan Thawhlehni khan contract thar a ziak a, hunrei zawk Arsenal football club ah hian a cham chhunzawm ang. A contract thar hi engti chiaha rei nge tih club in an puang lova, mahse kum 2015 vel thleng a nih rin a ni.\

Kum 25 a upa, Belgium captain Vermaelen hian kum 2009 ah Arsenal a zâwm a, England-a a season hmasa berah defence aṭanga goal 8 thunin Arsenal tlarhnunga rinrawl ber a ni. 2009/10 season hian PFA Premier League Team of the Season-ah thlan a ni nghe nghe. Arsenal tân game 54 a khel tawh a, Belgium national team-ah pawh rinrawl ber niin game 32 a khel tawh a ni.

Arsenal manager Arsene Wenger a lâwm a, “Player quality sâng ber ber lakluh hi kan ‘plan’ a ni a, Thomas (Vermaelen) -a’n contract thar a ziah hian player ṭha tak lalût ang kan ni. Player special tak a ni a, field chhungah a thawhhlâwk em em a, hmalam hunah pawh Arsenal Football Club a a awm zel kan duh a ni.” a ti.

Vermaelen pawhin contract thar a ziak thei chu a lawm zia a sawi a, “Arsenal-a châm reng hi ka duh dan rêng a ni. Club, manager leh fans ten ka lakah beiseina sâng tak an nei niin ka hria a, hei hi ka châm chhan pakhat a ni. Club ropui takah ka khel a, fans ropui tak kan nei a, kan sum dinhmun a ṭha hle bawk. Player naupang, thiam tak takte nen kan inkhel a, anni ho hi an la ṭha telh telh dawn a ni.” a ti. Vermaelen hi tunah a inhliam a dam fel ṭep tawh a, Emirates Stadium-a a inkhelh leh theih hunah Arsenal fans ten an au nasa teh ang chu. source:

source: arsenal.com