Arsenal hian league-ah beiseina an nei sâng tawh lo tih an starting XI aṭangin a hriat theih a. An regular player tam zawk dahṭha in tunkar tawpa FA Cup semi-final a Manchester City an khelh tur an thlir zâwk tih a hriat hle.
Liverpool erawh Premier League a season khata point hmu tam ber record siam thei dinhmunah an la din avangin an player ṭhate nen inkhel bul an ṭan thung a, game 3 khelh hmabak la awmte an chak vek a nih chuan point 102 hmu in record thar an siam thei dawn a ni.
Inkhelh ṭan tirh aṭangin inkhel hmuhnawm tak kan hmu nghâl a, mi tam zawkin an rin lâwk angin Liverpool chu ball chang tam zawkah an ṭang nghâl. Ball chang tam zawk na na na chu minute 20-naah Sadio Mane hmangin Reds chuan khual mualah an hmahruaina goal an khung a, Arsenal tlarhnung an ṭhiat hneh hle.
Liverpool hian ball an chang tam chhunzawm zel a, Arsenal goal lamah pawh ball an pet tam a mahse Gunners goalkeeper Emi Martinez tana hna hautak lutuk erawh a tam lem lo.
Minute 32-naah Liverpool captain armband hrengtu Virgil Van Dijk chuan an goalkeeper Alisson pass a tum chu a pêt sual a, Arsenal hmatawng Alexandre Lacazette chuan Alisson chu ball lâk khalhin French hmatawng hian Arsenal si phur a sût a, 1-1 a ni.
Half time hma hretin Liverpool tlarhnung bawk an chesual leh a. An goalkeeper Alisson chuan ball a petchhuak sual a, chu chu Gunners goal hmasa khungtu Lacazette bawk chuan rang taka la in box chhunga chângtu nei lo Reiss Nelson chu a pe lut a, Arsenal winger kum 20 mi hian buai hauh lovin ‘cool’ takin Arsenal goal hnihna a khung a, first half ah 2-1 in Arsenal in hma an hruai.
Second half ah Liverpool hian goal khung tumin an nawr na hle a, ball pawh an chang tam sâwt hle bawk. Mahse Mikel Arteta naute an ṭang khawng ve tlat a, Reds hmatawngte a bikin goal hmaah an hlauhawm hleithei lo.
Liverpool hmatawng zingah Sadio Mane a langsar bik deuh a, Roberto Firmino leh Mohamed Salah te erawh Arsenal defender ten an dang hneh angreng a, a bikin Kieran Tierney hmaah Salah a che hleithei lo a ni ber mai. Tin Arsenal center-back Rob Holding chuan Sadio Mane a bitum deuh rawt emaw tih turin a vêng hneh hle bawk.
Second half ah hian Reds in ball 90% zet maite an chang a, mahse Arsenal goal lamah a hmawr an bâwk hleithei lova. Second half a Gunners in goal an chhuah lohna kawngah an goalkeeper Emi Martinez a khel ṭha in Mohamed Salah leh Alexander-Arnold te pêt a save te kha pui tak a ni.
Arsenal hian hun tawp dawn lamah Joe Willock hmangin goal khungna hun ṭha tak mai an nei a, mahse midfielder kum 20 mi hian a hlah hlauh. Gunners hian hun tawp thlengin an goal an venghim thei ta a, mi tam zawkin chak lo turin ring mahse kumina Premier League a Liverpool hneh theitu team pathum zingah an tel ve ta a ni.
Inkhel chhung zawng hian Arsenal hian Liverpool goal lamah vawi 3 chiah pêtin chuta vawi 2 chu goal zawnah an pêt a, chu chu an goal hnih khungte an ni a. Liverpool erawhin Arsenal goal lamah vawi 24 zet mai an pêt thung a, mahse goal khung theihna hun ṭha ‘clear chance’ erawh vawi 3 chiah an nei thung a ni.
Tihian Arsenal khelmualah hian Liverpool chu kum 19 chhungin vawi 3 chiah hnehna an la chang tihna a ni ta a, chutihrual chuan nizan kha Arsenal in April 4, 2015 hnu a Liverpool an hneh lehna hmasaber a ni thung a, game 10 hnuah Gunners hian Reds hi an hneh ve thei ta chauh tihna a nih chu.
Arsenal hian Liverpool an hneh avang hian league kaltanga Europa League khelh theih an in beisei thar lehin a rinawm a. Aston Villa leh Watford te an la hmachhawn dawn a, anni team hnih hi khelh harsa tur niin lang lo mahse an chunga awmte chak leh chak lovah erawh an hmalam hun a innghat thui hle thung dawn a ni.
