Arsenal – in lunghlu chân

Estimated read time 2 min read

Arsenal – ah khuan mi pakhat a awm a, a hming chu Francis Cagigao a ni. Kum 24 zet Arsenal tan hian a thawk a, player enthlatu (scout) niin hun rei tak chhung Head of International Scouting/Head of Recruitment niin tunhnai khan inhriatthiamnain Arsenal nen an inzawmna an chhu chat.

“Kum 15 lek ka nih lai khan min rawn zawng chhuak lo la chu ka zinkawng hi a danglam khawp ang. Eng club pawh zawm dawn la, nang ang pa thluak tha an nei tur hi an vannei a ni,” tiin Arsenal – a a player lakluh zinga mi leh social media lama amah fak fo thintu Cesc Fabregas chuan a sawi.

Kum 51 a upa Cagigao hian a thiante nen tangrualin tun kum zabi chhungin Arsenal – ah player langsar tak tak an lalut a, an zingah hian Fabregas bakah Lauren, Jose Antonio Reyes, Alexander Hleb, Santi Cazorla, Nacho Monreal, Mikel Arteta, Alexis Sanchez, Granit Xhaka, Robin van Persie, Hector Bellerin leh tunhnai deuha an lakluh William Saliba leh Gabriel Martinelli te an tel.

Cagigao hian tunhnaia a interview – ah kum 2003 khan Arsenal hian Lionel Messi chu an lakluh thelh thu a sawi a. “Arsene Wenger khan manager a nih laiin Lionel Messi kan lakluh teuhzia kha a sawi tawhin ka hria. A aiawh (representative) te nen pawh  kan inbe hman a, work permit – ah khan harsatna a nei ta tlat a ni. Kan lalut hman teuh hle tih bak ka sawi belh lo ang,” tiin a sawi a, Manchester United in Gerard Pique an lakluh hma khan thui tak an indawr hman tih a sawi bawk.

Arsenal – ah hian hming ka chher ve hman hlein ka hria a, ka lawm takzet. He club – hian hun tha min pe a, an tana ka thawk thei kha ka lawm takzet a ni,” tiin football khawvela scout ropui ber pawl chuan a sawi.

C Tlanthianghlima

Football tui ve tak

You May Also Like

More From Author